Sɔlʋ palɩa ‑Zeluzalɛmʋʋ leglizɩ 'klɩyɩe 'wʋ
8
Sɔlʋ ‑yɔ ‑wa 'bhaa Etiɛnɩ ka dlɩ ‑bhlo.
Wee 'ylɩ ‑bhloo 'dɛ nya,
wa bhlia ‑Zeluzalɛmʋʋ leglizɩ 'klɩyɩe 'wʋpalɩe.
'Ɩn ‑Lagɔnyɩma weee yia lamneni Zudee ‑yɔ Samalii ‑dʋdʋ ‑gʋ.
‑Zezuu tietienya 'dɛkpʋa ‑tʋa ‑Zeluzalɛmʋ.
2 'Ɩn nyɩma ‑wa zʋa ‑bha ‑Lagɔ,
yia Etiɛnɩɩ 'kwie ‑gʋ wili bhabha,
'ɩn wa yia ɔ 'bhlu.
3 Sɔlʋ 'tɛmanɩa 'kʋa la,
ɔ 'ka leglizɩ lasa,
‑zugba ɔ mnɩ ‑budunya zɔ ‑bhlo ‑bhlo,
'ɩn ɔ kpa ‑Lagɔnyɩma,
nʋkpasia ‑yɔ 'ŋwnɩ ɔ pa wa ‑kaslʋ 'wʋ.
Filipʋ gbaa ‑Lagɔgbʋ Samalii ‑dʋdʋ ‑gʋ
4 ‑Lagɔnyɩma ‑wa mnenia la dʋdʋ weee ‑gʋ,
wa mnɩ mɔ,
wa yi mɔ,
‑Lagɔgbʋʋ gbagbɩe nya.
5 Filipʋ yia Samaliii 'gbe 'kadʋ yabhlo nʋkplɛ mnɩ,
'ɩn ɔ yia ‑mɔ nyɩma ‑yla ‑Lagɔɔ ‑Bhasanyɔɔ gbʋ ‑gbagbɩe bhli.
6 Nyɩmaa ‑zlo pʋlʋa Filipʋʋ wɛlɩ yukwli flɩlɩɩ,
‑we wa 'nʋa,
'ɩn gwɛdigbʋ ɔ nʋa lɛ,
wa yɩa ‑yɔɔ 'gbʋ.
7 Nɩɩ,
zuzu 'nyii yia guzʋnyaa ‑zlo 'wʋtla 'wʋkpɩkpɩe nya,
'ɩn 'kukunya ‑yɔ 'tɩgɩtɩgɩnya duun yi 'yaa 'pʋ.
8 'Ɩn we yia 'mʋna 'kadʋ ‑zɛ,
wee 'gbe ‑mɩnɩ nʋkplɛ.
9 We bhla,
nyɩmɛ yabhlo mɩ 'cɩn wee 'gbe nʋkplɛ,
'mɔ wa laa 'Simɔɔ.
‑Dlabhia ‑nyakpɔɔ nʋnyɔ ‑wa.
'Ɩn ɔ sʋbhalɩa Samalii ‑nyɩma weee ŋwɛgaga.
'Ɩn ɔ laa ɔ 'dɛ nyɩmɛ ‑zɔnʋ.
10 'Ɩn we 'ka 'nyɛnyɛyua ‑yɔbhu,
we 'ka nyɩma kpasɩ ylɩ,
wa 'dɛ weee pʋlʋa ɔ yukwli flɩlɩɩ.
Wa nɛɛ:
«Ɔɔ nyɩmɛ ‑mɔnɩ,
‑Lagɔɔ 'tɩtɛ ‑wa,
‑we wa laa 'Tɩtɛ 'Kadʋ.»
11 Ɔ ka ‑dlabhia ‑nyakpɔ nʋda ‑gwlɛ,
‑zugba we sʋbhalɩ nyɩma ŋwɛgagaa 'gbʋ,
wa pʋlʋa ɔ wɛlɩ yukwli flɩlɩɩ.
12 'Ɩn ‑Lagɔɔ nyɩmaa 'wlulapɩlɩgbʋ ‑yɔ ‑Zezu Klisɩɩ gbʋ ‑zɔnʋ Filipʋ gbaa.
‑Wa weee ŋwnua we ‑yɔ,
nʋkpasia ‑yɔ 'ŋwnɩ,
'ɩn ɔ yia wa batizee.
13 'Simɔɔɔ 'dɛ ka we ‑yɔŋwnu,
'ɩn wa yia ɔ batizee.
Ɔ yia Filipʋ kwesi ‑tʋ.
Gwɛdigbʋ ‑yɔ gbʋ 'kadɩ mɩa lɛnʋda,
‑we ɔ yɩa ‑yɔ,
'ɩn we yia ɔ ŋwɛgaga ‑sʋbhalɩ.
14 ‑Zezuu tietienya mɩa ‑Zeluzalɛmʋ 'nʋa nɩɩ,
Samalii ‑nyɩma ka ‑Lagɔgbʋ ‑yɔŋwnu,
'ɩn wa yia wa ‑gbɛ Piɛlɩ ‑yɔ Zaan tie.
15 Da Piɛlɩ ‑yɔ Zaan nynia Samalii ‑dʋdʋ ‑gʋ,
'ɩn ‑maa yia ‑Lagɔ bhubhoe,
‑wa ŋwnua ‑Lagɔgbʋ ‑yɔ,
wa 'ka Zuzu 'Pʋpa 'yɩɩ 'gbʋ.
16 Nɩɩ,
Zuzu 'Pʋpa 'nɩ wa glaa nyɩmɛ yabhlogbɔɔ ‑gʋ lasibhli ‑slɔ.
Nyɩmaa ‑Kanyɔ ‑Zezuu 'ŋnɩ nya ‑bhlogbɔɔ wa batizea wa.
17 'Ɩn Piɛlɩ ‑yɔ Zaan 'sɔ yia wa sɔ 'wluo lapalɩ,
'bhie,
wa yia Zuzu 'Pʋpa 'yɩ.
18 Da 'Simɔɔ 'yɩa we ‑yɔ nɩɩ,
‑Zezuu tietienya ‑ka nyɩma ‑wa ŋwnua ‑Lagɔgbʋ ‑yɔ sɔ 'wluo lapalɩ,
'ɩn wa yɩa ‑Lagɔɔ Zuzu nɩ,
'ɩn ɔ yia Piɛlɩ ‑yɔ Zaan 'gwɛzi ‑la.
19 'Ɩn ɔ nɛɛ:
«A 'nyɛ 'ya ‑amɩ wee se ‑mɩnɩ,
'ɩn ‑ɔ ɩn ‑ka sɔ 'wluo lapalɩ,
‑mɔɔ 'ka Zuzu 'Pʋpa 'yɩ!»
20 'Ɩn Piɛlɩ yia we 'bɩgʋpalɩ ɔ ‑ylaɛ:
«‑Ɩn ‑yɔ ‑na 'gwɛzi 'bhʋ la dabʋdʋ!
‑We ka gbʋ ‑wa,
‑mɩ dlɩɩ,
‑Lagɔɔ wlawlalu mɩa,
wa mneni wa 'ka we zɔ 'gwɛzi nya!
21 ‑Na dlɩ 'nɩ 'ylinanɩ ‑Lagɔ 'yliya 'wʋʋ 'gbʋ,
‑ɩn 'nɩ ‑lu yabhlogbɔɔ ‑ka gbʋ ‑mɩnɩ 'wʋ.
22 ‑Ɩn 'bhiti ‑na dlɩ,
‑ɩn bhubhoe Jejitapɛ,
‑de ɔ mneni ɔ 'ka ‑na 'wlukʋʋn lapʋpalɩe 'nyuu ‑yɔgbʋ 'wʋtɩɩ?
23 Na yɩ we ‑yɔ nɩɩ,
‑ɩn 'tɛ dlɩ kalɔ,
'ɩn ‑ɩn mɩ gbʋnyuuu gaylo nya.»
24 'Ɩn 'Simɔɔ nɛɛ Piɛlɩ ‑yɔ Zaan ‑ylaɛ:
«Amɩaa 'dɛ bhubhoe ‑Lagɔ na ‑nʋ nya.
‑Delee gbʋ ‑we a gbaa da,
we yi 'mɩ ylɩ.»
25 ‑Mʋʋ 'bɩgʋ,
wa bhɩa ‑we ka da wa 'yɩa,
we ‑yɔ ‑Lagɔgbʋʋ gbagbɩe,
'ɩn waa ‑Zezuu tietienya 'sɔ yia lʋbhiti ‑Zeluzalɛmʋ.
Wa mɩ mnɩda,
‑zugba wa ‑yɔ ‑Lagɔgbʋʋ gbagbɩe mnɩa Samaliii 'gbe duun nʋkplɛ.
Filipʋ ‑yɔ Etiopiyu gbelia
26 Jejitapɛɛ 'anzɩ yabhlo nɛɛ Filipʋ ‑ylaɛ «'Ylʋʋ 'wʋsɔlʋda lilisɔlʋ,
'yoo ‑we 'bhʋa ‑Zeluzalɛmʋ,
'ɩn we yia ‑Gazaagbe 'wʋ mnɩ,
‑ɩn ‑sɔ 'wʋ,
‑ɩn mnɩ ‑mɔ.»
‑Bʋsɛ ‑dʋdʋ bɛblɛɛ ‑gʋ ‑wa.
27 ‑Bha ‑bhlokpadɛ,
Filipʋ ‑sɔa 'wʋ,
'ɩn ɔ yia mnɩ.
'Ɩn ɔ ‑yɔ nyɩmɛ yabhlo yia gbeli,
lɛlɩlɛlɩnyɔ yabhlo ‑wa.
Etiopii ‑dʋdʋ ‑gʋʋ 'wlulapɩlɩŋwnɔ Kandasɩɩ lubho ɔ nʋa,
'ŋnɩmnɩlii 'yliyɔzʋnyɔ 'kadʋ ‑wa.
‑Zeluzalɛmʋ ɔ yia,
ɔ 'ka ‑Lagɔ bʋbɔ,
28 'ɩn ɔ mɩa ɔ dʋdʋ ‑gʋ lʋmnɩda.
Ɔ mɩ ɔ nɩmɛsʋʋn ‑wotloo 'wʋ,
‑zugba ɔ zɛlɩ 'sɛbhɛ ‑we ‑Lagɔgbʋʋ ‑falɩpanyɔ Ezaii cɛlɩa.
29 ‑Lagɔɔ Zuzu nɛɛ Filipʋ ‑ylaɛ «‑Ɩn mnɩ,
‑ɩn nyni ‑wotloo mɩa nɩ ‑yɔ.»
30 Filipʋ ‑yɔ ‑gwagwɩe yia we ‑yɔnyni,
ɔ 'nʋa ‑Lagɔgbʋʋ ‑falɩpanyɔ Ezaiii 'sɛbhɛ Etiopiyu mɩa zɛlɩda nɩ,
'ɩn ɔ yia ɔ layɩbha.
Ɔ nɛɛ ɔ ‑ylaɛ:
«‑We ‑na zɛlɩa dɛ,
‑na nʋ we 'wʋlaa?»
31 ‑Mɔɔ nɛɛ ɔ ‑ylaɛ:
«Nyɩmɛ 'nɩ 'mɩ ‑yla we gwe ‑sa,
sa ɩn 'ka we 'wʋlanʋa?»
'Ɩn ɔ nɛɛ Filipʋ ‑ylaɛ:
«‑Ɩn ‑gbla ‑wotloo 'wʋ,
‑ɩn ‑dɩ 'mɩ kwesi la.»
32 ‑Lagɔsɛbhɛɛ 'ya ‑we ɔ mɩa zɛlɩda mʋ nɩ:
«Ɔ 'wlʋ sa bhlabhlɛ ‑we wa kwa we 'bhalɩda,
ɔ 'nɩ ŋwɛ gba.
'Ɩn ɔ 'wlʋ sa bhlabhlɛyu ‑we'e gba,
we nyanɩɩ ‑gʋdɩnyɔ 'yu,
ɔ 'nɩ ŋwɛ gba.
33 Wa ka ɔ 'wʋtɩ 'kienyi,
ɔ 'nɩ ‑gʋgbʋgbanyɔ tɩklɩɩ 'yɩ.
Nyɔɔ 'ka ɔnʋʋ 'yuaa 'dɩ ‑sa?
Nɩɩ,
wa ka ɔ lasa dʋdʋ ‑gʋ.»
34 Etiopiyu nɛɛ Filipʋ ‑ylaɛ:
«‑Na zukpa ‑wa,
nyɔɔ ka gbʋ ‑Lagɔgbʋʋ ‑falɩpanyɔ gba sa?
Ɔ 'dɛɛ gbʋ ‑wa yaayɩɩ,
nyɩmɛ ‑putuu gbʋ ɔ gbaa yɩ?»
35 Tɔʋn Filipʋ yia we ‑gʋsa.
'Ɩn ɔ yia wee ‑Lagɔsɛbhɛɛ 'ya kibhe ‑mɩnɩ ‑gʋ ‑Zezuu gbʋ ‑zɔnʋʋ gbagbɩe bhli ɔ ‑yla.
36 Wa mɩ sa mnɩda,
'ɩn wa yia 'yloogblʋʋ da yabhlo 'nyu ylɩ,
'ɩn Etiopiyu nɛɛ:
«Nyu mɩa da!
Lɛɛ ‑lu ka 'gbʋ ‑ɩn 'na 'ka 'mɩ batizea?» [
37 Filipʋ nɛɛ ɔ ‑yla:
«Wa mneni wa 'ka ‑mɩ batizee,
‑zugba ‑ɩn ‑ka ‑Zezu dlɩ ‑gʋ zʋ dlɩ weee nya.»
Etiopiyu nɛɛ:
«Ɩn zʋ we dlɩ ‑gʋ nɩɩ,
‑Zezu Klisɩ mɩ ‑Lagɔɔ 'Yu nya.»]
38 Tɔʋn,
ɔ yia ‑wotloo 'yligbeli,
'ɩn Filipʋ ‑yɔ ɔ 'sɔ yia 'nyu lʋ ‑bho,
'ɩn Filipʋ yia ɔ batizee.
39 Da wa 'tlaa 'nyu lʋ nɩ,
'ɩn ‑Lagɔɔ Zuzu yia Filipʋ ‑bha lasalɩ,
Etiopiyu 'nɩ 'maslɛɛn ɔ 'yɩ.
Tɔʋn,
'ɩn ɔ yia ɔ 'yloogblʋ 'wʋbhu 'mʋna nya.
40 Filipʋ mɩa nɩ,
‑mɔɔ mɩ Azɔtʋ!
‑Lagɔgbʋ ‑zɔnʋ ɔ gbaa 'gbenya nʋkplɛ.
Danya ɔ plɩlɩa tɩklɩɩ,
ɔ 'ka Sezalee nyni.