Sɔlʋ 'bhitia dlɩ, 'ɩn ɔ yia ɔ 'dɛ ‑Zezu yoo 'nyɛ
9
We bhla,
Sɔlʋ gbaa 'kɔmʋʋ ɔ 'ka Nyɩmaa ‑Kanyɔɔ 'bɩnɔnya 'bha,
'ɩn ɔ yia ‑Lagɔbʋbɔnyaa ‑kanyɔ 'kadʋ 'yɩa mnɩ ‑Zeluzalɛmʋ.
2 'Ɩn ɔ nɛɛ ‑mɔɔ ‑yla,
‑mɔɔ cɛlɩ 'sɛbhɛnya ‑Lagɔbudunya 'wʋ ‑Damasɩgbe nʋkplɛ.
Nyɩma ‑wa mɩa ‑Zezuu 'Yloogblʋ ‑gʋ,
ɔ ‑ka ‑mɔ wa ylɩ,
ɔ kpa wa,
we yi nʋkpasia ‑zɛoo,
we yi 'ŋwnɩ ‑zɛoo,
ɔɔ Sɔlʋ 'ka wa 'llukpe palɩ,
'ɩn ɔ 'ka wa ‑Zeluzalɛmʋ kwa.
3 Ɔ mɩ sa ‑Damasɩ mnɩda,
ɔ 'ka wee 'gbee ŋwɛ ‑yɔbɛa yi,
tɔʋn,
san yabhlo yia yalɩ 'bhʋ,
'ɩn we ‑nyumalɩ yia ɔ gbeli.
4 'Ɩn ɔ yia bhli dʋdʋ,
'ɩn ɔ yia wɛlɩ yabhlo 'nʋ.
‑Mʋʋ nɛɛ ɔ ‑ylaɛ:
«Sɔlʋ,
Sɔlʋ,
lɛɛ ka 'gbʋ ‑na palɩ 'mɩ 'klɩyɩe 'wʋa?»
5 'Ɩn ɔ yia we 'bɩgʋpalɩ:
«Na ‑Kanyɔ,
nyɔɔ ‑ɩn ‑mɩa?»
«‑Amɩ ‑Zezu,
‑ɩn mɩa 'klɩyɩe 'wʋpalɩda,
‑amɩ ‑wa.
6 ‑Ɩn ‑sɔ 'wʋ,
‑ɩn pla gbe nɩ 'wʋ,
'ɩn ‑we ‑ɩn 'kaa lɛnʋ,
wa 'ka we ‑mɩ ‑yla gba.»
7 Nyɩma ‑wa ‑yɔ Sɔlʋ 'sɔ mɩa,
wa yia 'yligbe,
wa'a ‑sa gbʋ ‑gʋ nyanɔ nya.
Wɛlɩ ‑we gbaa 'nʋ wa nʋ we,
'ɩn wa'a 'yɩ nyɩmɛ yabhlogbɔɔ ‑yɔ.
8 Sɔlʋ 'kaa dʋdʋ 'wʋsɔ,
ɔ 'yli mɩ ‑bloda,
‑zugba ɔ'ɔ 'yɩ ‑lu yabhlogbɔɔ ‑yɔ.
Ɔ sɔ wa kpaa la,
'ɩn wa ‑yɔ ɔ 'sɔ yia ‑Damasɩ pla.
9 Ɔ li 'ylɩ ta,
ɔ'ɔ 'yɩ la,
'ɩn ɔ'ɔ li,
ɔ'ɔ 'ma.
10 ‑Zugba ‑Zezuu 'bɩnɔnyɔ yabhlo wa laa Ananiasɩ ɔ mɩ ‑Damasɩ.
Nyɩmaa ‑Kanyɔ nɛɛ ɔ ‑yla ‑mɔ ɔ 'yli 'wʋ:
«Ananiasɩ!»
'Ɩn ɔ yia ŋwnu,
ɔ nɛɛ:
«Nyɩmaa ‑Kanyɔ,
‑amɩ nɩ.»
11 Nyɩmaa ‑Kanyɔ nɛɛ ɔ ‑ylaɛ:
«‑Ɩn ‑sɔ 'wʋ dɛslɛɛn,
‑gwele wa laa 'Wʋsna ‑Gwele,
‑ɩn 'plɩlɩ we ‑gʋ.
‑Ɩn mnɩ Zudasɩɩ ‑budu zɔ,
Talɩsɩyu yabhlo wa laa Sɔlʋ,
ɔ mɩ ‑Lagɔ bhubhoeda,
‑ɩn 'yɩbha ɔ ‑yɔla.
12 'Ɩn ‑mɔ ɔ 'yli 'wʋ,
ɔ ka nʋkpasu yabhlo wa laa Ananiasɩ ‑yɔyɩ plada,
'ɩn ‑mɔɔ yia ɔ sɔnya ‑gʋ lapalɩ,
'ɩn ɔ 'ka lalolu 'yɩ.»
13 Ananiasɩ yia we 'bɩgʋpalɩ:
«'A!
Na ‑Kanyɔ,
ɩn ka 'nʋ nyɩma duun ŋwɛɛ nɩɩ,
nyɩmɛ nɩ ka ‑na nyɩma tɩklɩɩ gbʋnyuu 'wluo nʋ ‑Zeluzalɛmʋ.
14 'Ɩn ‑seli ɔ yia da,
‑Lagɔbʋbɔnyaa ‑cɩan ka we se ɔ 'nyɛ,
nɩɩ,
nyɩma weee,
‑wa gbaa ‑na 'ŋnɩ,
ɔ kpa wa,
'ɩn ɔ 'ka wa 'llukpe palɩ.»
15 Nyɩmaa ‑Kanyɔ nɛɛ ɔ ‑ylaɛ:
«‑Ɩn mnɩ!
Nɩɩ,
ɩn ka ‑bha nyɩmɛ ‑mɔnɩ ‑sa na lubhonʋlu yabhlo nya.
Nyɩma ‑wa 'nɩa Zuifʋ klaa,
wa dʋdʋʋ 'wlulapɩlɩnya klaa,
Izlaɛlɩnyɩma klaa,
ɔ 'ka wa na 'ŋnɩ ‑slolu.
16 Sa ɔ 'kaa sɩa na 'ŋnɩɩ 'gbʋ,
na dɛ yia ‑mʋʋ ɔ ‑slolua.»
17 Tɔʋn,
Ananiasɩ yia mnɩ.
Ɔ nynia wee ‑budu zɔ,
'ɩn ɔ yia Sɔlʋ sɔnya ‑gʋ lapalɩ.
'Ɩn ɔ nɛɛ ɔ ‑ylaɛ:
«Sɔlʋ,
na bheli,
da ‑ɩn mɩa yida nɩ,
Nyɩmaa ‑Kanyɔ ‑Zezu ka ‑mɩ 'klʋtlalɩ 'yloogblʋ.
Mɔ tiea 'mɩ,
‑ɩn 'ka lalolu 'yɩ,
'ɩn Zuzu 'Pʋpa 'ka ‑mɩ ye.»
18 ‑Bha ‑bhlokpadɛ,
‑lu yabhlo 'bhʋa Sɔlʋ 'yliya 'wʋ gaza ‑kwɩkwɩ 'bhisa,
we yia bhli,
'ɩn ɔ yia layɩyɩe lolu bhli.
Ɔ ‑sɔa 'wʋ,
'ɩn wa yia ɔ batizee.
19 Tɔʋn,
ɔ bhɩa lilie,
'ɩn 'kʋa yia ɔ 'yli yi.
Sɔlʋ gbaa ‑Lagɔgbʋ ‑Damasɩ
Sɔlʋ ‑yɔ ‑Zezuu 'bɩnɔnya ka ‑tʋ 'ylɩ sanɩmɛ nya ‑Damasɩ.
20 Ɔ yia ‑bha ‑bhlokpadɛ ‑Zezuu gbʋʋ gbagbɩe bhli ‑Lagɔbudu zɔ.
Ɔ nɛɛ:
«‑Zezu mɩ ‑Lagɔɔ 'Yu nya.»
21 Nyɩma ‑wa 'nʋa ɔ wɛlɩ,
ŋwɛgaga yia wa sʋbha,
'ɩn wa nɛɛ:
«Nyɩmɛ ‑ɔ palɩdaa nyɩma ‑wa gba ‑Zezuu 'ŋnɩ 'klɩyɩe 'wʋ,
mɔ 'nɩ dɛ mɩɩ?
'Ɩn gbʋ ‑gble sa,
ɔ 'nɩ dɛ wa kpaa yi,
'ɩn ɔ 'ka wa ‑Lagɔbʋbɔnyaa ‑cɩan kwaa?»
22 'Ylɩ weee nya,
Sɔlʋ gbaa ‑Zezuu gbʋ 'tɩtɛ nya.
Da ɔ gbaa ‑Zezu ‑wa ‑Lagɔɔ ‑Bhasanyɔ nɩ,
Zuifʋnya mɩa ‑Damasɩ,
‑we wa 'kaa gba,
we 'nɩ ‑mɩ.
23 'Ylɩ sanɩmɛ plɩa,
'ɩn Zuifʋ yia 'wʋlanʋnnʋ,
wa 'ka Sɔlʋ 'bha.
24 'Ɩn Sɔlʋ yia we 'nʋ.
'Ylɩ weee nya,
zlɩ ‑yɔ sabɔ,
‑zugba wa mɩ gbee plalɩdanya ŋwɛgʋda,
wa 'ka ɔ 'bhaa 'gbʋ.
25 'Ylɩ yabhlo nya,
sabɔ,
nyɩma ‑wa ‑yɔ Sɔlʋ 'sɔ mɩa,
wa yia ɔ ‑cɩcɛ 'wʋ ladɩ.
'Ɩn wa yia ɔ 'suo ‑we gbelia 'gbe,
we 'wlubita ‑lalɩ,
'ɩn wa yia ɔ we lʋʋ lasibhli.
Sɔlʋ mɩ ‑Zeluzalɛmʋ
26 Sɔlʋ nynia ‑Zeluzalɛmʋ nɩ,
'ɩn ɔ yia ‑Zezuu 'bɩnɔnya lʋbhobhoe layla.
‑Maa weee yia ɔ sɔsʋe bhli.
Wa 'yabhlo 'nɩ we dlɩ 'wʋdɩ nɩɩ,
Sɔlʋ mɩ ‑Zezuu 'bɩnɔnyɔ nya.
27 Banabasɩ yia ɔ 'wʋbhu,
'ɩn ɔ ‑yɔ ɔ 'sɔ yia tietienyaa ‑gbɛ mnɩ.
'Ɩn ɔ yia wa ‑yla Sɔlʋʋ gbʋ gba.
Sa Sɔlʋ ‑yɔ Nyɩmaa ‑Kanyɔ 'sɔ gbelia,
'ɩn ɔ yia ɔ ‑yla gbʋ gba klaa,
'ɩn sa Sɔlʋ gbaa ‑Lagɔgbʋ ‑Zezuu 'ŋnɩ nya ‑Damasɩ,
‑zugba nyanɔ 'nɩ ɔ dlɩɩ ‑mɩ,
Banabasɩ yi 'yaa ‑mʋʋ gba wa ‑yla.
28 ‑Mʋʋ bhla,
Sɔlʋ ‑yɔ tietienya mɩ.
Ɔ mnɩ,
'ɩn ɔ yia wa ‑gbɛ ‑Zeluzalɛmʋ,
‑zugba ɔ gba ‑Lagɔgbʋ Nyɩmaa ‑Kanyɔɔ 'ŋnɩ nya,
nyanɔ 'nɩ ɔ dlɩɩ ‑mɩ.
29 Zuifʋ ‑wa gbaa glɛkɩwɛlɩ,
ɔ ‑yɔ wa yia 'wʋgbeli,
'ɩn wa yia wɛlɩ 'wʋsɩsalɩ.
Nɩɩ,
‑maa mɩ ɔ dideda,
wa 'ka ɔ 'bha.
30 ‑Lagɔnyɩma 'nʋa sa we,
'ɩn wa yia Sɔlʋ Sezalegbe 'wʋ kwa.
'Bhie,
wa yia ɔ yoo 'pa Talɩsɩgbe nʋkplɛ.
31 ‑Mʋʋ bhla ‑leglizɩɩ ‑yɔ ‑dlɔɔ,
Zudee ‑yɔ Galilee ‑yɔ Samalii ‑dʋdʋ weee ‑gʋ.
‑Zugba wa tɛmanɩ dlɩ,
'ɩn wa zʋ Nyɩmaa ‑Kanyɔ 'nʋŋwɛ.
'Ɩn Zuzu 'Pʋpa yia wa 'wʋsa,
'ɩn wa yia 'wʋzumanɩe bhli.
Eneee puepuegbʋ
32 We ‑ka Piɛlɩ,
‑mɔɔ mɩa dʋdʋ weee ‑gʋ 'plɩlɩda ‑Lagɔnyɩma 'wʋtalɩe nya.
'Ylɩ yabhlo nya,
'ɩn ɔ yia ‑Lagɔnyɩma ‑wa mɩa Lidaagbe nʋkplɛɛ ‑gbɛ mnɩ.
33 'Ɩn ɔ yia ‑mɔ nyɩmɛ yabhlo wa laa Enee 'yɩ,
‑zugba ‑mɔɔ pɩ ‑mɔɔ ‑bita ‑gʋ la ‑zʋ gbeta,
ɔ 'kukuee 'gbʋ.
34 Piɛlɩ nɛɛ ɔ ‑ylaɛ:
«Enee!
‑Zezu Klisɩ ka ‑mɩ pue.
‑Ɩn ‑sɔ 'wʋ,
‑ɩn glɩ ‑na ‑bita ‑na 'dɛ nya.»
‑Bha ‑bhlokpadɛ Enee ‑sɔa 'wʋ.
35 Lidaa ‑nyɩma weee ‑yɔ Salɔɔn ‑dʋdʋ ‑gʋ ‑nyɩma weee 'yɩa ɔ ‑yɔ nɔda nɩ,
'ɩn wa yia ‑Lagɔ pla.
Tabitaa sɔa 'wʋ tlɩtlɩe lʋ
36 Nɩɩ,
'ŋwnɔ yabhlo mɩ ‑Zopeegbe 'wʋ,
‑Zezuu 'bɩnɔŋwnɔ ɔ mɩa.
'Mɔ wa laa Tabitaa,
we ji ‑wa «lue»a glɛkɩwɛlɩ 'wʋ.
'Ylɩ weee nya,
ɔ nʋa gbʋzɔnʋ gbʋ lɛ,
'ɩn ɔ bɛa bobabhanya ‑yɔ.
37 'Ylɩ yabhlo nya,
'ɩn ɔ yia gu bhli,
'ɩn ɔ yia tlɩ.
Wa budoa ɔ 'kwie,
wa yia we lapalɩ ‑budu 'wlu,
‑mɔ komi yabhlo zɔ.
38 ‑Zezuu 'bɩnɔnya ‑wa mɩa ‑Zopee,
wa ka 'nʋ nɩɩ,
Piɛlɩ mɩ Lidaagbe 'wʋ,
‑we mɩa ‑Zopee kwesi.
Wa yia nyɩma 'sɔ tie,
nɩɩ,
wa mnɩ ɔ laa wɛlɩ nɩ nya:
«‑Na zukpa ‑wa,
‑ɩn 'na ‑gwlɛlɩ ‑mɔ ‑nɩ.
‑Ɩn yi!»
39 Tɔʋn,
Piɛlɩ ‑sɔa 'wʋ,
'ɩn ɔ ‑yɔ wa yia mnɩ.
Da ɔ nynia ‑mɔ,
'ɩn wa yia ɔ wee komi ‑we mɩa ‑budu 'wlu zɔ kwa.
‑Dʋgbaŋwnɩ weee bɛa ɔ kwesi wie nya.
Zɔbana ‑yɔ ‑bana ‑we Tabitaa nʋa lɛ,
‑zugba ɔ ‑ga 'yliyɔ,
'mʋ wa ‑slolua ɔ 'klʋ.
40 Piɛlɩ wlelia nyɩma weee ‑budu zɔ,
ɔ kʋlʋa 'kukolu 'yli,
'ɩn ɔ yia ‑Lagɔ bhubhoe.
Ɔ 'bhitia 'kwiee gbɛgbɛɩn,
'ɩn ɔ nɛɛ:
«Tabitaa,
a ‑sɔ 'wʋ!»
Tabitaa ‑bloa 'yli,
ɔ 'yɩa Piɛlɩ ‑yɔ,
'ɩn ɔ yia 'wʋsɔ,
ɔ yia ladɩ.
41 Piɛlɩ kpalɩa ɔ sɔ ‑yɔ,
'ɩn ɔ yia ɔ 'wʋbhu.
Ɔ laa ‑Lagɔnyɩma ‑yɔ ‑dʋgbaŋwnɩ,
'ɩn ɔ yia ɔ wa 'klʋslolu,
‑zugba ɔ ‑ga 'yliyɔ.
42 ‑Zopeegbe 'wʋ ‑nyɩma weee yia we 'nʋ.
‑Bha nyɩma duun zʋa Nyɩmaa ‑Kanyɔ dlɩ ‑gʋ.
43 Piɛlɩ ka 'ylɩ sanɩmɛ li ‑mɔ ‑Zopee,
‑zelibhanyɔ yabhlo wa laa 'Simɔɔɔ ‑gbɛ.