तिमुथियूस खातिर यीसु मसीह के खास चेला पउलुस के लिखल दूसरा चिट्टी
पउलुस के जोहार
1
1 हम पउलुस, परमेस्वर के हुकुम से यीसु मसीह के खास चेला हियई, कि हम अइसन परचार कर सका हियई कि परमेस्वर अमर जिन्गी के वादा करलथीन जवन मसीह यीसु मेंa बिसवास करे के चलते मिला हई ।2 हमर दुलरुवा बेटा तिमुथियुस, तोहर खातिर हम इ चिट्ठी लिखत हियऊ । पिता परमेस्वर आऊ हमिन के परभु यीसु मसीह देने से तोहरा अनुग्रह, दया आऊ सांती मिलते रहे ।
तिमुथियुस खातिर सलाह
3 हम रात चाहे दिन आपन पराथना में बरबरे तोहरा इयाद कर के परमेस्वर के धन्यबाद करत हियई, आऊ उनकर सेवा जइसन हमर पुरखवन करलथीन, ओइसही हम सुध मन से करा हियई । 4 तू कइसे रोइले हलहीं, उ इयाद कर के तोहरा देखेला हमरा ढेरे मन करत हई, ताकि हम खुसी से भर जाइब ।
5 हम तोहर सच्चा बिसवास के इयाद करत हियऊ; इहे बिसवास पहिले तोहर नानी लोइस आऊ तोहर माई यूनिके भीर हलई । आऊ हमरा इ पक्का भरोसा हई कि इहे बिसवास तोहरो भीर हई । 6 इहेसे हम तोहरा इयाद करावत हियऊ कि परमेस्वर के उ बरदान जवन हमर हाथ रखे से तोहरा मिलल हई, ओकरा पूरे तरी से काम में लावल करिहें। 7 काहेकि परमेस्वर के आत्मा हमिन के डरपोक नई बनावा हथीन, बाकि साम्रथ, परेम आऊ संयम देवा हथीन ।
8 इहेसे हमिन के परभु के बारे में बतावे में मत लजइहें, आऊ हमरो खातिर मत लजइहें, काहेकि हम अबही परमेस्वर के सेवा करे के चलते कइदी हियऊ, बाकि परमेस्वर के सक्ती से बढ़िया खबर सुनावेला हमर संगे दुख उठइहें । 9 परमेस्वर हमिन के मुक्ती देलथीन आऊ हमिन के पबितर जिन्गी जीयेला चुनले हथीन । इ हमिन के बढ़िया काम के चलते नई, बाकि परमेस्वर के योजना आऊ अनुग्रह के चलते हई; इहे अनुग्रह सब कुछ सिरजे के सुरुवात से पहिले-पहल यीसु मसीह के चलते हमिन के मिललई । 10 अब इ अनुग्रह हमिन के मुक्ती देवेवोला मसीह यीसु के आवे के चलते दिखावल गलई, जे मउवत के खतम कलथीन आऊ बढ़िया खबर के चलते अमर जिन्गी के डहर दिखउलथीन । 11 परमेस्वर हमरा इ बढ़िया खबर के परचार करे खातिर परचार करेवोला आऊ खास चेला आऊ सिक्छा देवेवोला ठहरउलथीन ।
12 इहे चलते हम इ दुख के भी उठावत हियई, बाकि नई लजात हियई, काहेकि जे मसीह पर हम बिसवास कइले हियई उनकरा हम जानत हियई, आऊ हमरा पक्का आसरा हई कि उ हमरा सोंपल गइल अनमोल बढ़िया खबर के आपन दुबारे आवे तक देख-भाल करे में सामरथी हथीन ।
13 जवन कुछ बातिया तू हमरा से सुनले हें, ओकरा सच्चा सिक्छा के एगो नमुना बना के रखिहें, आऊ मसीह यीसु साथे तोहर नाता के चलते उनकरा पर बिसवास कर सका हें आऊ दूसर के पेयार-दुलार भी कर सका हें। 14 आऊ इ अनमोल बढ़िया खबर जे तोहरा सोंपल गइल हई, ओकरा पबितर आत्मा जे हमिन में बसल हई, उनकर मदत से रखवारी करिहें । 15 तू जानत हें कि आसिया राज में सब अदमिनियन हमरा छोड़ देलथीन, ओकिनो में फूगिलुस आऊ हिरमुगिनेस हथीन ।
16 उनेसिफुरुस के परिवार के परभु दया करतथीन, काहेकि जखनी हम जेल में हलियई, तखनी उ हमरा से मुलकात करे में नई लजलई, आऊ बरबरे हमरा भीर आके हमर मन के जुड़उलई । 17 बाकि जखनी उनेसिफुरुस रोम नगर में अलई, त ढेरे घेयान दे के हमरा खोज के मुलकात कलई । 18 आऊ इफिसूस नगर में उ हमरा कइसे मदत कइले हई, उ सब तू बढ़िया तरी से जानत हें, हम पराथना करत हियई कि परभु के नयाय करेला आवे के दिन में ओकरा पर परभु के दया होवे ।