कलीसिया के मुखिवन कइसे होखेला चाही
3
1 जवन कलीसिया के मुखिया बनेला चाहा हई, त उ बढ़िया काम करे के मन रखत हई । इ बिसवास-जोग बतिया हई । 2 कलीसिया के मुखिया खातिर इ जरूरी हई कि उ अइसन जिन्गी जीयेला चाही, जेकरा पर कवनो तरह के दोस नई लगा सकतई, आऊ ओकर ऐकेगो मेहारु होखेला चाही, आऊ संयमी, बढ़िया बोल-चाल करेवोला, जे आचरन में बढ़िया, पहुनाई करेवोला आऊ बढ़िया खबर के बढ़िया तरी सिखावेवोला होखेला चाही । 3 उ पियांक चाहे मार-पीट करेवोला आऊ जगड़ेलु नई, बाकि सील मानेवोला होखेला चाही । आऊ धन-दउलत के लालची करेवोला भी नई होखेला चाही । 4 उ आपन घर-परिवार के जेरूरी के पूर्ती करेवोला आऊ ओकर बाल-बचा भी ओकरा आदर साथे मानेवोला होखेला चाही । 5 जे कवनो घर-परिवार के पुर्ती करे नई जानतई, उ परमेस्वर के कलीसिया के देख-रेख कइसे करतई ।6 आऊ उ एगो नाया बिसवासी भी नई होखेला चाही, अइसन नाया होतई, त उ घमंड़ कर के सइतान के, जे डंड़ परमेस्वर देले हथीन, उहे पा सकतई । 7 आऊ उ यीसु मसीह परे बिसवास नई करेवोलन के बीचे में इजतदार होवेला चाही, ताकी ओकिन ओकरा सिकायत नई करतथीन आऊ उ सइतान के फाना में नई बझतई ।
8 ओइसही कलीसिया के सेवकवन पियांक आऊ झूट के कमाई के लालची आऊ दोटुकी भी नई, बाकि आदर के जोग होखेला चाही । 9 ओकिन सुध मन से परमेस्वर के परगट होइल सच्चा खबर पर बिसवास करेवोलन होखेला चाही । 10 आऊ पहिले ओकिन के जांचेला चाही, अगर ओकिन इ सब गुन में बढ़िया हथीन, त ओकिन के कलीसिया के सेवक के काम करे देहीं ।
11 इहे तरी कलीसिया के सेवकियनa के भी आदर के जोग होखेला चाही; कुटनी नई, बाकि सब बतिया में संयमी आऊ बिसवास-लायक होखेला चाही ।
12 कलीसिया के सेवकवन एकेगो मेहारु के मरद होवे आऊ आपन बाल-बचा आऊ आपन घर-परिवार के बढ़िया से देखरेख करेला चाही । 13 काहेकि जेकिन कलीसिया के सेवक के काम बढ़िया तरी से करा हथीन, ओकिन आपन खातिर बढ़िया इजत पउतथीन आऊ इहे चलते ओकिन के, जे बिसवास यीसु में हई ओकर परे बड़ी हिम्मत से जीये परतथीन ।
14 सचो में हम तोहर भीर तुरतिये आवेला आसरा करत हियई, तबो में हम इ चिट्ठी तोहरा इहेला लिखत हियई, 15 कि अगर हमरा आवे में देरी हो जतई, त तू इ जान लेहीं कि परमेस्वर के घराना, जे जीयत परमेस्वर के कलीसिया आऊ सच्चाई के खंभा आऊ नेव हई, ओकरा में परमेस्वर के लोगन कइसे अचरण करेला चाही ।
16 जे सच्चाई परमेस्वर अभी परगट करलथीन, उ एकदम गहिड़ बतिया हई, ऐकर में एको दाना झूट नखई । उ इहे हई कि
परमेस्वर देही रूप में दिखाई देलथीन,
आऊ उनकर काम के परमेस्वर के आत्मा सच्चा ठहरउलथीन,
आऊ सरगदुतवन उनकरा देखलथीन,
जाती-जाती में उनकर परचार कइल गलई,
दुनिया में अदमिनियन उनकर परे बिसवास करलथीन,
आऊ परमेस्वर उनकरा सरग में उठा लेलथीन ।