तिमुथियूस खातिर यीसु मासीह के खास चेला पउलुस के लिखल पहिला चिट्टी
पउलुस के जोहार
1
1 हम पउलुस, हमिन के मुक्ती देवेवोला परमेस्वर आऊ हमिन के आसरा के जरिया यीसु मसीह के हुकुम से यीसु मसीह के खास चेला बन गलियई ।2 हे तिमुथियुस, तू यीसु मसीह में बिसवास करे से हमर सच्चा बेटा तरी हई । आऊ तोहर खातिर हम इ चिट्ठी लिखत हिवा ।
पिता परमेस्वर आऊ हमिन के परभु यीसु मसीह देने से अनुग्रह, दया आऊ सांती मिलते रहे ।
झुठा सिक्छा देवेवोलन खातिर चेतावनी
3 जइसे हम मकिदुनिया इलाका जाय घरी तोहरा समझउले हलियई कि इफिसुस सहर में रह के कुछु लोगन के हुकुम दा कि झुठा सिक्छा नई देवे, इहे बतिया हम दोहरावत हिवा । 4 आऊ अइसही कह दिहां कि उ सब बनावटी किसा आऊ पुरखवन के खंदानी बतिया में मन नई लगावे, जेकरा से बकझक होखा हई, बाकि एकरा से परमसर के मुक्ती के योजना के गेयान नई मिला हई, जे खालि बिसवास से मिला हई ।
5 साफ मन आऊ बढ़िया सोच आऊ बेहुटुक बिसवास से उगल पेयार-दुलार ही हमिन के हुकुम के मतलब हई। 6 कइएक अदमिनियन इ सब बतिया के छोड़ के बेमतलब के बकझक में भटक गइल हथीन । 7 आऊ ओकिन मुसा के नियम के सिखावेवोलन बनेला चाहत हथीन, बाकि जवन बतिया ओकिन कहा हथीन, ओकरा जोर दे के त बोला हथीन, ओकरा समझबो नई करा हथीन ।
8 बाकि हमिन त जानत हियई कि अगर जे कवनो, नियम के बढ़िया तरी से मान के काम में लावा हई, त उ नियम बढ़िया हई । 9 हमिन इहो जानत हियई कि नियम धरमी आदमीन खातिर नई हई, बाकि इ त नियम के तोड़ेवोलन, मनमानी करेवोलन, परमेस्वर के नई मानेवोलन, पापियन, अपबितर आऊ अधरमी आदमीन, माई-बाप के मुवावेवोलन, हत्यारवन, 10 बेबिचारीयन, पुरुसगमनियन*, अदमिनियन के बेचेवोलन, झुठ बोलेवोलन आऊ झुठा किरिया खाएवोलन आऊ सच्चा उपदेस के सब बिरोधियन खातिर ठहरावल गइल हई । 11 इ सच्चा सिक्छा धन्य परमेस्वर के महिमा के बढ़िया खबर के मुताबिक हई, जेकर परचार करेला हमरा जिमा देवल गइल हई ।
पउलुस यीसु के अनुग्रह खातिर धन्यबाद करत हई
12 हम आपन परभु यीसु मसीह के जवन हमरा सामरथ देले हथीन, धन्यबाद करत हियई कि उ हमरा बिसवास-जोग जान के आपन सेवा खातिर चुन के अलगे कइले हथीन । 13 हम त पहिले उनकरा सिकायत करेवोला आऊ सतावेवोला आऊ गोसगर आदमीन हलियई, तबो में हमरा परे दया करलथीन, काहेकि हम उनकरा पर बिसवास नई करत हलियई आऊ बिन जानले-बुझले इ काम करत हलियई । 14 आऊ बिसवास आऊ दुलारa जवन यीसु मसीह में हई, ओकरा साथे हमिन के परभु के अनुग्रह हमरा परे ढेर से ढेर होलई ।
15 इ बतिया सचो के हई, आऊ हर तरी से माने लायक हई कि यीसु मसीह पपियन के मुक्ती देवे खातिर इ दुनिया में अलथीन, जेकिन में सबसे बड़हन पापी हम हियई । 16 बाकि हमरा परे इहेला दया होलई, हम त सबसे बड़हन पापी हियई, जेकरा में यीसु मसीह आपन पूरे सहनसक्ती देखउलथीन, ताकि जे अदमिनियन अमर जिन्गी पावे खातिर उनकर परे बिसवास करतथीन, ओकिन खातिर हम एगो नमुना बनबई । 17 अब हरदम राज करेवोला राजा जे कहियो नई मरतथीन, जे नई देखा हथीन, एकेगो परमेस्वर हथीन, उनकर आदर आऊ महिमा जुगजुग होते रहतई, आमीन ।
पउलुस तिमुथियुस के ढाड़स बान्हत हई
18 हे बेटा तीमुथियुस, अगमजानियन तोहर बारे में जे कुछ पहिले ही से बतावल गइल हलई, ओकर चलते हम तोहरा इ हुकुम देवत हियई कि तू ओकर मुताबिक बिसवास आऊ बढ़िया सोंच-बिचार के पकड़ के झुठा सिक्छा के बिरोध में बढ़िया लड़ाई लड़ते रहिहें, 19 केतनो एकरा नई मानलथीन, इहेसे ओकिन बिसवास के नास करलथीनb । 20 ओकिन में से हुमनियुसवा आऊ सिकंदरवा हथीन जेकिन के हम कलिसीया से बहरी निकाल देलियई, ताकि ओकिन परमेस्वर के सिकायत करेला नई सीखतथीन ।