5
1 हे भइवन-बहिनियन, परभु के आवे के उ दिन आऊ घरी के बारे में तोहिन से कुछु लिखेला जरूरी नई हई ।2 सचो में तोहिने ठीक जानत हां कि जइसे रतिया में चोर एकबइग आवा हई, ओइसही परभु के आवे के दिन होतई ।3 जखनी लोगन कहते होतथीन, “सब कुछ ठीके हई, कुछ डर नखई” त ओकिन परे एकबइग बिनास आ जतई जइसे गरभवती के परसोती के दरद एकबइग आवा हई; आऊ अदमिनियन कवनो तरी से नई बचे परतथीन ।
4 बाकि हे भइवन-बहिनियन, तोहिन त अन्हार में नई हां कि परभु के आवे के उ दिन तोहिन परे चोर जइसन एकबइग अतई । 5 तोहिन सचो मे इंजोत आऊ दिन के बाल-बचा हां, काहेकि तोहिन भलाई के काम करा हां । हमिन रात के आऊ अन्हार के नई हियई, काहेकि हमिन खराब काम नई करा हियई। 6 इहेसे हमिन दुसर जइसन सूतल मत रहिहां, बाकि परभु के आवे के उ दिन खातिर जागल आऊ चेतल रहिहां । 7 काहेकि जेकिन सुता हथीन ओकिन रतिये में सुता हथीन, आऊ जे निसा में मातल रहा हथीन ओकिन रतिये में मातल रहा हथीन । 8 बाकि हमिन त इंजोत के हियई, इहेसे परेम आऊ बिसवास के अंगरखा आऊ मुक्ती के आसरा के टोप पेहन के चेतल रहिहां ।
9 काहेकि परमेस्वर हमिन के डंड़ देवेला नई, बाकि हमिन के आपन परभु यीसु मसीह के चलते मुक्ती पावेला ठहरउले हथीन । 10 यीसु मसीह हमिन खातिर इहेला मू गलथीन ताकि हमिन जीयत चाहे मूवल हियई, जखनी उ दुबारा अतथीन त हमिन उनकर साथे जीयत रहबई । 11 इहेसे एक दूसर के ढाढ़स दिहां आऊ एक दूसर के मदत करिहां, जइसन तोहिन अभीयो करबो करा हां ।
कलीसिया खातिर आखिरी सलाह
12 हे भइवन-बहिनियन, हमिन तोहिन से बिन्ती करत हिवा कि जेकिन मसीह जिन्गी में तोहिन के अगुवा हथीन, आऊ जेकिन तोहिन के सिक्छा देवत हथीन आऊ जेकिन तोहिन के बीच में मेहनत करत हथीन, ओकिन के इजत करिहां । 13 आऊ ओकिन के काम के चलते ओकिन के परेम से ढेरे इजत करा । अपनन में मिल-जुल के रहिहां ।
14 हे भइवन-बहिनियन हमिन तोहिन से कहत हिवा कि कोरहियन के समझावा, डरपोकवन के हिम्मत दा, कमजोर लोगन के सहारा दा, सब अदमिनियन के सहनसक्ती देखावा ।
15 तोहिन धेयान रखिहां कि कवनो केकरो से बुराई के बदला बुराई नई करिहां । बाकि हरमेसा अपनन में आऊ सब आदमिनियनो से भलाई करे के कोसिस करिहां ।
16 हरदम खुसी से रहिहां । 17 हरदम पराथना में लगल रहिहां । 18 हर बतिया में धन्यबाद करिहां, काहेकि यीसु मसीह के नाता में तोहिन खातिर परमेस्वर के मरजी इहे हई ।
19 पबितर आत्मा के काम के रोकेला कोसिस मत करिहां । 20 परमेस्वर देने से बोलेवोलन के बतिया के नीच नई समझिहां । 21 सब बतिया के परखिहां, आऊ जवन बढ़िया हई ओकरा पकड़ले रहिहां । 22 आऊ सब तरी के पाप करे से बचल रहिहां ।
जोहार
23 हम अइसन पराथना करत हियई कि सांति देवेवोला परमेस्वर अपने ही तोहिन के पूरा रीति से पबितर करतथीन आऊ तोहिन के आत्मा आऊ जीव आऊ देह हमिन के परभु यीसु मसीह के आवे तक पूरे-पूरे बेकसूर रखतथीन । 24 आऊ परमेस्वर ओइसही करतथीन, काहेकि तोहिन के बोलावेवोला परमेस्वर बिसवास लायक हथीन ।
25 हे भइवन-बहिनियन, हमिनो खातिर पराथना करिहां ।
26 सब भइवन-बहिनियन के मसीह के परेम से जोहार करिहां।
27 हम तोहिन से परभु के अधिकार से हुकुम देवत हिवा कि इ चिट्ठी सब बिसवासियन के बीच में पढ़ के सुनइहां ।
28 हमिन के परभु यीसु मसीह के दया तोहिन के संगे होवत रहतई ।