बरनबास आऊ साऊल के भेजेला
13
1 अंताकिया के मसीही मंडली में परमेस्वर देने से बोलेवोला कइएक अदमिनियन आऊ सिक्छा देवेवोलन हलथीन । ओकिन में से बरनबास आऊ समोन जे नीगर कहावा हई; आऊ कुरेनी देस के लूकियुस, आऊ रोमी सासक हेरोदेस के बढ़िया साथी मनाहेम आऊ साऊल हलथीन । 2 एक दिन ओकिन उपास साथे परभु से पराथना करत हलथीन । उहे घरी पबितर आत्मा कहलई, “हमर खातिर बरनबास आऊ साऊल के उ काम खातिर अलगे करहीं जेकरा खातिर हम ओकिन के बोलउले हियई ।” 3 तखनी ओकिन उपास आऊ पराथना कर के ओकिन दूनो परे हाथ रख के ओकिन के भेज देलथीन ।पउलुस के पहिलका परचार-यात्रा
4 पबितर आत्मा के चलते भेजल बरनबास आऊ साऊल सिलूकिया सहर में गलथीन; आऊ उहां से पानी-जहाज पर चढ़ के साइपरस टापू में अलथीन; 5 ओकर बाद ओकिन सलमीस सहर में पहूंचलथीन आऊ परमेस्वर के वचन यहूदी धरम सभा घर में परचार करेला सुरु करलथीन । उहे घरी यूहन्नाa सेवकाई में ओकिन के मदत करत हलई ।
6 ओकर बाद ओकिन उ सउसे टापू में घुमते पाफुस सहर तक पहूंचलथीन । उहां ओकिन के बार-यीसु नाम के परमेस्वर देने से बोलेवोला कर के झूठ बोलेवोला एगो ओझा मिललई । 7 उ उहे टापू के हाकिम सिरगियूस पउलुस के साथी हलई । उ हाकिम अकिलवन आदमीन हलई । उ बरनबास आऊ साऊल के अपना भीर बोला के परमेस्वर के वचन सुनेला चाहलई । 8 बाकि उहे ओझवा इलीमासb ओकिन के बिरोध कर के हाकिम के बिसवास करे से रोकेला चालहलई । इलीमास के मतलब ओझाई करेवोला हई ।
9 फिन साऊल जेकर दूसर नाम पउलुस हई, पबितर आत्मा से भरपूर होके ओझवा देने एकटकी देखलई आऊ कहलई, 10 “हे सउसे छल आऊ सब होसियारी से भरल सइतान के बेटा, तू सब सच्चाई के दुसमन हई, का तू परभु के सोझ रास्ता के टेढ़ करेला नई छोड़बहीं ? 11 अभिये देख, परभु के हाथ तोहर बिरोध में हई; कुछ घरी तक तू आन्हर हो जइबे आऊ सूरज के नई देखे परबे ।” तखनी तुरतिये धुन्राह आऊ अन्हार ओकर अखिया परे छा गलई, आऊ उ एने-ओने टमड़े लगलई ताकि कवनो ओकरा हाथ धर के डोरिया के लेगतई ।
12 उहे घरी जे होइल हलई, हाकिम ओकरा देख के आऊ परभु के बारे में सिक्छा से ढेर अचरज होके बिसवासी बनलई ।
पउलुस आऊ बरनबास पिसिदिया के अंताकिया में
13 पउलुस आऊ ओकर साथीवन पाहुस सहर से पानी-जहाज से पंफुलिया इलाका के पिरगा सहर में अलथीन; आऊ यूहन्ना (मरकुस) ओकिन के छोड़ के यरूसलेम सहर में लउट गलई । 14 पिरगा सहर से अगाड़ी जाके ओकिन पिसिदिया इलाका के अंताकिया सहर में पहूंचलथीन; आऊ पबितर दिन में यहूदी धरम सभा घर में जाके बइठ गलथीन । 15 मूसा के नियम आऊ परमेस्वर देने से बोलेवोलन के किताब से पढ़े के बाद धरम सभा के मुखिवन एकिन भीर इ कह के पेठउलथीन, “हे भइवन, अगर अदमिनियन के ढाढ़स देवेला तोहर मन में कवनो बात हई, त कह सका हहूं ।
16 तखनी पउलुस डीड़ी होके हाथ से सुनेला इसारा देके कहे लगलई, “हे इस्राएली लोगन आऊ परमेस्वर के डेरायवोला गेइर-यहूदियन सब सुनहूं:
17 इहे इस्राएली लोगन के परमेस्वर हमिन के पुरखवन के चुन लेलथीन, आऊ जखनी एकिन मिस्र देस में परदेसी होके रहत हलथीन, तखनी ओकिन के तरक्की कलथीन; आऊ आपन ताकतवर हाथ से निकाल के लानलथीन । 18 उ परमेस्वर चालिस साल तक बिरान जगह में ओकिन के सहत रहलथीन, 19 आऊ कनान देस के सात जातिवन के मिटा के ओकिन के देस लगभग चार-सउ पचास साल में इस्राएलियन के पुरखउती कर देलथीन । 20 एकर बाद परमेस्वर परमेस्वर देने से बोलेवोला समुएल के घरी तक ओकिन परे अधिकार करे खातिर पइसला करेवोलन के देलथीन । 21 ओकर बाद ओकिन एगो राजा मांगलथीन । तखनी परमेस्वर बिन्यामीन गोतिया से कीस नाम के एगो आदमीन के बेटा साऊल के ओकिन परे राज करेला देलथीन । उ चालीस साल तक राज कलई । 22 फिन परमेस्वर ओकरा हटा के दाऊद के ओकिन के राजा बनउलथीन, जेकर बारे में उ अइसन गोवाही देलथीन, ‘हमरा आपन मन के मोताबिक एगो आदमीन, यिसउ के बेटा दाऊद मिलल हई; उ हमर सब मर्जी के पुरा करतई ।’
23 इहे आदमीन के अगाड़ीवोला खंदान से परमेस्वर आपन वादा के मोताबिक इस्राएल भीरा एगो मुक्ती देवेवोला यीसु के पेठउलथीन । 24 यीसु के आवे से पहीले बपतिस्मा देवेवोला यूहन्ना सब इस्राएली लोगन के बीचे में अइसन परचार कलई कि पाप छोड़ के परमेस्वर भीरा आवा आऊ बपतिस्मा ला । 25 जखनी यूहन्ना आपन सेवकाई पुरा करे पर हलई, त उ कहलई, ‘ तोहिन हमरा का समझत हहूं ? हम उ नखियई जिनकरा पेठावेला परमेस्वर वादा कइले हथीन ! देखहूं, हमर बाद एगो आवेवोला हथीन, जिनकर गोड़वा के जुतवो खोले लायक हम नखियई ।’
26 “हे भइवन, तोहिन जे अबराहम के अगाड़ीवोला खंदान के हहूं; आऊ तोहिन जे परमेस्वर से डेरयवोला गेइर-यहूदियन हहूं, इ मुक्ती के खबर हमिन खातिर पेठावल गइल हई । 27 बाकि यरूसलेम सहर के सब यहूदियन आऊ ओकिन के नेतवन यीसु के नई चिन्हलथीन आऊ अगमजनियन के उ वचन नई समझलथीन, जे हर एक पबितर दिन में पढ़ल जा हई । इहे चलते उनकरा गलती ठहरा के अगमजनियन के कहल वचन के पूरा कलई । 28 ओकिन यीसु परे मूवावे लायक कवनो गलती नई पउलथीन, तबो में पिलातुस से बिन्ती कलथीन कि उ मूवा देवल जाई ।
29 जखनी ओकिन उनकर बारे में लिखल गइल सब बतिया पूरा कलथीन, त उनकरा कुरुस पर से उतार के कब्र में रखलथीन । 30 बाकि परमेस्वर उनकरा मुवलकन में से जीयउलथीन, 31 फिन उ जे उनकर संगे गलील से यरूसलेम आइल हलथीन, ओकिन के ढेरे दिना तक देखाते रहलथीन; अबही ओकिने ही अदमिनियन भीरा उनकर गोहाह हथीन ।
32 हमिन इ बढ़िया खबर अबही तोहिन के सुनावत हियई । एकर वादा हमिन के बापदादवन से कइल गइल हलई । 33 इ वादा के परमेस्वर यीसु के जीया के हमिन के बाल-बच्चा खातिर पूरा कलथीन; भजन के किताब के भाग दू में भी इ लिखल हई,
‘तू हमर बेटा हई;
आजु हमही तोहरा जनमउले हियई ।’
34 परमेस्वर यीसु के मुवलकन में से जीयउलथीन, आऊ ओकर दहिया के कहियो नई सड़े देतथीन । एकर बारे में परमेस्वर इहे तरी से कहले हथीन,
‘हम दाऊद के कहलका पबितर आऊ
बिसवास-लायक वादा के तोहिन के देबई ।’
35 इहे तरी से एगो आऊ भजन में भी उ कहलथीन,
रउवा आपन पबितर आदमीन के सड़े नई देबई ।’
36 इ सब बतियन दाऊद के बारे में नखई, कहेकि उ आपन जुग में परमेस्वर के योजना के पूरा कर के आपन पुरखवन तरी गाड़ल गलई आऊ सड़ियो गलई । 37 बाकि परमेस्वर यीसु के मुवलकन में से जीयउलथीन आऊ उनकर दहिया नई सड़लई । 38 इहेला, हे भइवन-बहिनियन, तोहिन जान लेहूं कि इहे यीसु के चलते सब पाप के छेमा के बढ़िया खबर तोहिन के देवल जा हई; 39 इनकर चलते सब बिसवास करेवोलन परमेस्वर के नजर में बेकसूर ठहरा हथीन, बाकि परमेस्वर देने से बोलेवोला मूसा के नियम के चलते अइसन नई हो सकलई । 40 इहेसे सतरके रहिहा, अइसन नई होखे कि परमेस्वर देने से बोलेवोलन के कहलका तोहिन परे आ जाई:
41 ‘हे निन्दा करेवोलन, देखा, आऊ चकचिहा, आऊ सिरा जा;
काहेकि हम तोहिन के दिना में एगो काम करत हियऊ,
अगर कवनो तोहिन भीर अइसन काम के परचार करतई,
त तोहिन ओकरा परे कहियो बिसवास नई करबहूं’ ।
42 पउलुस आऊ बरनबास धरम सभा घर से बहरे निकले घरी, अदमिनियन ओकिन से आवेवोला पबितर दिन में इ सब बितियन के बतावेला बिन्ती करलथीन । 43 जखनी सभा में से लोगन उठलथीन त ढेरे येहूदियन आऊ परमेस्वर के मानेवोला गेइर-यहीदियन पउलुस आऊ बरनबास संगे आवे लगललथीन, त पउलुस आऊ बरनबास एकिन के समझा के कहलथीन कि परमेस्वर के किरपा में बनल रहा ।
गेइर-यहूदियन में पउलुस के परचार के सुरुवात
44 अगाड़ी के पबितर दिन में सहर के सब अदमिनियन परभु के वचन के सुनेला जुटलथीन । 45 बाकि यहूदी लोगन भीड़ के देख के जरे लगलथीन, आऊ सिकायत करत पउलुस के बतिया के बिरोध में बोले लगलथीन । 46 तखनी पउलुस आऊ बरनबास निडर होके कहलथीन, “इ जरूरी हलई कि परमेस्वर के वचन पहिले तोहिन के सुनावल जतियऊ; बाकि जखनी तोहिन ओकरा इनकार कर के अलगे रहा हहूं, आऊ खुदे अमर जिन्गी के लायक नई ठहरा हहूं, त देखा, हमिन गेइर-यहूदियन के बीच में जात हियई । 47 कहेकि परभु हमिन के इहे हुकुम देले हई,
‘हम तोहरा गेइर-यहूदियन खातिर इंजोत ठहरउले हियऊ,
ताकि तू दुनिया के आखिरी छोर तक मुक्ती के पहूंचाव’ ।”
48 इ सुन के गेइर-यहूदियन खुसी होलथीन, आऊ परभु के वचन के बड़ाई करे लगलथीन; आऊ परमेस्वर संगे अमर जिन्गी खातिर जेतना ठहरावल गइल हलथीन, ओकिन सब बिसवास कलथीन । 49 त परभु के वचन उ सउसे इलाका में फइले लगलई ।