पतरस आपन सेवा के बारे में बतावत हई
11
1 फिन खास चेलवन आऊ भइवन जेकिन यरूसलेम सहर में हलथीन, इ सुनलथीन कि गेइर-यहूदियनो परमेस्वर के वचन मानले हथीन । 2 बाकि जखनी पतरस यरूसलेम में अलई, त यहूदी बिसवासियन पतरस से बहस करे लगलथीन, 3 “रउवा त गेइर-यहूदी लोगन भीर जाके ओकिन संगे खइली ।4 तखनी पतरस ओकिन से सब बतिया सुरु से लेके आखिरी तक कह के सुनउलई : 5 हम याफा नाम के एगो सहर में पराथना करत हलियई, तखनी हम निनुवाइल में एगो दरसन देखलियई । ओकरा में एगो बरतन बड़का चदर तरी चारो कोनवन से लटकावल आसमान से हमरा भीर अलई । 6 जखनी हम ओकरा गउर से देखलियई, त ओकरा में धरती के चार गोड़वोला आऊ जंगली जनावर आऊ रेंगेवोला जीव आऊ आसमान के चिरइँयन के देखलियई; 7 उ घरी एगो अइसन आवाज सुनलई, “हे पतरस उठ, इ सब के मूवा के खो ।”
8 बाकि हम कहलियई, नई परभु, नई; काहेकि यहूदी नियम के मुताबिक कवनो असुध आऊ बरजल चीज हम कहियो नखियई खइले ।
9 एकर जबाब में आसमान से फिन उहे तरी दूसरका बार आवाज होलई, “जे कुछो परमेस्वर सुध ठहरउले हथीन, ओकरा तू असुध नई कहहीं ।” 10 तिनो खंवा अइसही होलई, तखनी सब कुछ आसमान परे तिर लेवल गलई ।
11 आऊ देखहीं, तुरतिये तीनगो कइसरिया से पेठावल अदमिनियन उहे घर के दुहारी परे डीड़ी होलथीन, जवन में हमिन हलियई । 12 पबितर आत्मा हमरा से ओकिन संगे बेझिझक जायेला कहलई, आऊ हमर संगे छवगो भइवनो हलथीन, आऊ हमिन सब उ आदमीन घरे गलियई । 13 उहंई कुरनेलियुस हमिन से ओकर दरसन के बारे में बतउलई । ओकरा में उ एगो सरगदूत के आपन घरे डीड़ी होइल देखलई आऊ उ सरगदूत ओकरा से कहलई, “ याफा सहर में केकरो पेठा के समोन के जवन पतरस कहावा हई ओकरा बोला लेहीं । 14 उ तोहरा से अइसन बतिया कहतई, जेकरा से तू आऊ तोहर पूरा घराना मुक्ती पउतथून ।
15 जे घरी हम बतिया करे लगलियई, तखनी पबितर आत्मा ओकिन परे ओही तरी उतरलई जवन तरी सुरु में हमिन परे उतरल हलई । 16 फिन हमरा परभु के उ वचन इयाद अलई, जवन परभु कहले हलथीन, “यूहन्ना त पनिया से बपतिस्मा देलई, बाकि तोहिन पबितर आत्मा से बपतिस्मा पइबा ।” 17 जखनी हमिन परभु यीसु मसीह पर बिसवास करे से जे बरदान मिललई, ओइसही उहे बरदान परमेस्वर ओकिनो के देलथीन । इहेसे हम कवन हियई कि परमेस्वर के रोक सका हियई ?”
18 इ सुन के सब सुनेवोलन चुप रहलथीन, आऊ परमेस्वर के बड़ाई कर के कहे लगलथीन, “तबे त परमेस्वर गइर-यहूदियनो के पाप छेमा आऊ अमर जिन्गी पावे के मोका देलथीन ।
अंताकिया सहर के मसीही मंडली
19 जखनी इस्तेफानुस के मूवावे के ओजह से जवन सताव अलई, ओकर से यीसु के पीछे चलेवोलन जने-तने हो गलथीन; ओकिन गुमत-गुमत फीनिके इलाका आऊ सइपरस टापू आऊ अंताकिया सहर में पहूंचलथीन; बाकि यहूदी लोगन के अलवा आऊ दूसर कवनो के बढ़िया खबर नई सुनावत हलथीन । 20 बाकि ओकिन में से कइएक लोगन साइपरस आऊ कुरेनी टापू के हलथीन, जेकिन अंताकिया सहर में आके यूनानी भासा बोलेवोलन के बीचे में परभु यीसु के बढ़िया खबर सुनावे लगलथीन । 21 परभु के हाथ ओकिन पर हलई, आऊ ढेरे अदमिनियन परभु परे बिसवास कर के उनकर चलेवन बन गलथीन ।
22 जखनी ओकिन के चर्चा यरूसलेम के मसीही मंडली के पता चललई, तखनी ओकिन बरनबास भाई के अंताकिया सहर में पेठउलथीन । 23 उ उहां जाके परमेस्वर के किरपा के देख के ढेर खुस होलई, आऊ ओकिन के अइसन ढाढ़स देलई ताकि ओकिन पूरे मन से परभु खातिर बिसवास-लायक बनल रहतथीन । 24 बरनबास एगो बढ़िया आदमीन हलई, आऊ पबितर आत्मा आऊ बिसवास में भरपूर हलई; एकर चलते आऊ ढेरे दूसर लोगन उहां परभु परे बिसवास करलथीन ।
25 फिन बरनबास साऊल के खोजेला तरसुस सहर में चल गलई । 26 जखनी उ साऊल से मिललई, त ओकरा अंताकिया सहर में लानलई; सालो भर एकिन दूनो मसीही मंडली संगे भेंट-मुलकात करत आऊ बढ़िया खबर सुनावत रहलथीन; आऊ सब से पहिले इहे अंताकिया सहर में अदमिनियन परभु के चेलवन के ‘मसीही लोगन’ कहलथीन ।
27 उ घरी कइएक परमेस्वर देने से बोलेवोलन यरूसलेम सहर से अंताकिया सहर में अलथीन । 28 ओकिन में से अगबुस नाम के एगो आदमीन डीड़ी होके पबितर आत्मा के अगुवाई से इ बतउलई कि सउसे दुनिया में अकाल परतई- उ अकाल कलउदियुस सम्राट के राज घरी परलई । 29 इहेसे अंताकिया के बिसवासी चेलवन सलाह करलथीन कि हर कवनो आपन-आपन अवकाद के मोताबिक यहूदी इलाका में रहेवोला बिसवासियन के मदत करेला कुछ भेजल जाई । 30 ओकिन अइसही कर के बरनबास आऊ साऊल के हाथ से यरूसलेम के मसीही मंडली के नेतवन भीरा कुछ भेज देलथीन ।