कुरनेलियुस पतरस के बोलावत हई
10
1 कइसरिया सहर में कुरनेलियुस नाम के एगो आदमीन हलई । उ इतालियानी नाम के एगो सेना के मालीक हलई । 2 उ एगो भक्त आदमीन हलई आऊ आपन सब घराना संगे परमेस्वर से डेरात हलई, आऊ यहूदी लोगन के ढेरे दान देवत हलई, आऊ बरबरे परमेस्वर से पराथना करत हलई । 3 दोपहर के बाद लगभग तीन बजे घरी उ एगो दरसन देखलई । उ दरसन में परमेस्वर के एगो दूत ओकर भीर भीतरहीं आके कहलई, “हे कुरनेलियुस !”4 कुरनेलियुस सरगदूत के गउर से देखलई आऊ डेरा के कहलई, “हे परभु, का हई ?” सरगदूत ओकरा से कहलई, “तोहर सब पराथना आऊ गरीबकन खातिर तोहर दान अरपन कइल चीज जइसन परमेस्वर मंजूर कइले हथीन । 5 अभिये याफा सहर में आदमीन के पेठा के समोन के, जवन पतरस कहावा हई, ओकरे बोला लेहीं । 6 उ पतरस चमड़ा के रोजगार करेवोला समोन के घर में पहुना हई, जेकर घर समुंदर के आरा पर हई ।”
7 जखनी उ सरगदूत जवन कुरनेलियुस से बतियात हलई, चल गलई, तखनी कुरनेलियुस दूगो नउकरवन आऊ ओकरा भीर जे हाजीर रहत हलथीन, ओकर में से एगो भक्त सिपाहिया के बोलउलई । 8 आऊ ओकन के सब बतियन समझा के याफा सहर में पेठउलई ।
पतरस के दर्सन
9 दूसरका दिन ओकिन हिठत-हिठत सहर भीरा पहूंचलथीन, तखनिये करीब-करीब दोपहरिया में पतरस छत परे पराथना करे गलई । 10 उ घरी ओकरा खूब भुख लगलई आऊ कुछ खायला चाहत हलई, बाकि जखनी खाना तइयार होवत हलई, तखनिये उ निनुवा गलई । 11 आऊ उ देखलई कि आसमान खुल गलई; आऊ एगो बरतन बड़का चदर तरी चारो कोनवन से लटकल धर्ती पर उतरत हलई । 12 जेकरा में धरती के सबे तरह के चार गोड़वोला आऊ रेंगेवोला जीव आऊ आसमान के चिरइँयन हलथीन । 13 उ घरी एगो अइसन आवाज सुनलई, “हे पतरस उठ, इ सब के मूवा के खो ।
14 तखनिये पतरस कहलई, नई परभु, कहियो नई; काहेकि हम कहियो यहूदी नियम के मुताबिक कवनो असुध आऊ बरजल चीज नखियई खइले ।
15 फिन उहे तरी दूसरका बार आवाज होलई, “जे कुछो परमेस्वर सुध ठहरउले हथीन, ओकरा तू असुध नई कहहीं ।” 16 तिनो खंवा अइसही होलई, तखनी तुर्ती उ बर्तन आसमान में उठा लेवल गलई ।
17 पतरस इ देखल दर्सन के मतलब के बारे में आपन मन में दुविधा में हलई, उहे घरी कुरनेलियुस के पेठावल अदमिनियन समोन के घर के दुहारी पर आके डीड़ी होलथीन, 18 आऊ चाल कर के पूछलथीन, “का समोन जेकरा पतरस कहावा हई, इहां पहुना हई ?
19 जखनी पतरस उ दर्सन परे सोचते हलई, तखनिये पबितर आत्मा ओकरा से कहलई, “देख, तीनगो आदमीन तोहरा खोजत हथीन । 20 इहेला तू उठ के नीचे जो, आऊ बेझिझक ओकिन संगे जो, काहेकि हम ही ओकन के भेजले हियई ।
21 तखनिये पतरस उतर के अइलका अदमिनियन से कहलई, “देखा, जेकरा तोहिन खोजत हहूं, उ हम ही हियई । तोहिन के आवे के का ओजह हई ?”
22 ओकन कहलथीन, “हमिन रोमी सेना के मालीक कुरनेलियुस से पेठावल अदमिनियन हियई । उ एगो भक्त आऊ परमेस्वर से डेरायवोला आऊ सबे यहूदी लोगन में नामी आदमीन हई, उ एगो पबितर सरगदूत से इ हुकुम पउले हई कि रउवा के आपन घरे बोला के रउवा से वचन सुनतई ।” 23 तखनी पतरस ओकिन के भीतरे बोला के ओकिन के पहुनाई कलई ।
दूसरका दिना उ ओकिन संगे गलई, आऊ याफा सहर के कइएक भइवन ओकरे संगे गलथीन ।
कुरनेलियुस के घरवा में पतरस
24 अगिला दिन ओकिन कइसरिया सहर में पहूंचलथीन, आऊ कुरनेलियुस आपन हितनात आऊ जिग्री साथिवन के बोला के ओकिन के आसरा देखत हलई । 25 जखनी पतरस भीतरे अलई, त कुरनेलियुस ओकरा से मुलकात कलई, ओकर गोड़ पर गिर के परनाम कलई । 26 बाकि पतरस ओकरा उठा के कहलई, “डीड़ी होहीं, हमहूं त आदमीन हियई ।” 27 आऊ ओकर साथे बातियाते भीतरे गलई, आऊ ढेरे अदमिनियन के जूटल देखलई ।
28 आऊ ओकिन से कहलई, “तोहिन जानत हहूं कि कवनो यहूदी आदमीन के कवनो गेइर-यहूदी के घरे जाके संगती करेला नियम के बिरोध हई । बाकि परमेस्वर हमरा बतउलथीन कि कवनो आदमीन के अपबितर चाहे असुध नई कहहीं । 29 इहेला जखनी तोहिन बुलउला, त हम कुछु नई बोललियऊ आऊ चल अलियऊ, अबही हम पूछत हियऊ कि तपहिन हमरा काहेला बोलउले हही ?”
30 कुरनेलियुस कहलई, चार दिना पहिले इहे घरी हम दोपहर के बाद लगभग तीन बजे घरी पराथना करत हलियई, त देखलियई कि एगो आदमीन चमकत कपड़ा पहिनले, ठीक हमर सामने डीड़ी होलई । 31 आऊ कहलई, “हे कुरनेलियुस, तोहर पराथना सुन लेवल गलई हई आऊ गरीबकन खातिर तोहर दान अरपन कइल चीज जइसन परमेस्वर मंजूर कइले हथीन । 32 इहेला कवनो के याफा सहर में पेठा के समोन जे पतरस कहलावा हई, ओकरा बोला लेहीं । उ समुंदर के आरा परे चमड़ा के रोजगार करेवोला समोन घरे पहुना हई । 33 तखनिये हम तुरती रउवा भीर तीनगो के पेठउली, आऊ बढ़ियां होलई कि रउवा चल अइली । आऊ हमिन सब इहां परभु भीर हियई, ताकि जे कुछु परमेस्वर रउवा से कहले हथीन, उ सब के सुनबई ।
गेइर-येहूदियन पतरस से बढ़िया खबर सुना हथीन
34 फिन पतरस ओकिन से कहे लगलई, “अबही हमरा एकदम पक्का होलई कि परमेस्वर कवनो के पाटी-बंधी नई करा हथीन, 35 बाकि सब जतियन में जे उनकरा से डेरा हई आऊ उनकर नजर में ठीक काम करा हई, ओकरा से परमेस्वर खुस रहा हथीन । 36 तोहिन जानत हहूं कि परमेस्वर सब के परभु यीसु मसीह के पेठा के सांति के बढ़िया खबर उनकरा से इस्राएली लोगन के सुनउलथीन, 37 तोहिन इहो खबर जानत हहूं कि यूहन्ना के बपतिस्मा के परचार के बाद इहे खबर गलील सहर से सुरु होके सउसे यहूदिया सहर में फइल गलई । 38 तोहिन इहो खबर जानत हहूं कि परमेस्वर कवन तरी से नासरत के यीसु के पबितर आत्मा आऊ साम्रथ के उझीललथीन; इहे यीसु भलाई करत आऊ जेकिन सइतान से सतावल हलथीन, ओकिन के ठीक करत चललथीन, काहेकि परमेस्वर उनकरा संगे हलथीन ।
39 उ सउसे यहूदिया इलाका आऊ यरूसलेम सहरो में जेतना काम कलथीन, उ सब काम के हमिन गोवाह हियई । आऊ ओकिन उनकरा कुरुस परे टांग के मूवा देलथीन । 40 बाकि परमेस्वर उनकरा तीसरका दिन जिलउलथीन आऊ देखा देले हथीन । 41 सब लोगन परे नई, बाकि उ गोवाहवन परे जेकिन के परमेस्वर पहिलही से चुन लेले हलथीन, मतलब हमिन परे जेकिन संगे उ मूवलकन में से जी उठे के बाद खलियई आऊ पिलियई । 42 आऊ उहे यीसु हमिन के हुकुम देलथीन कि सब लोगन के बीचे में परचार कर, आऊ गोवाही दे कि इ उहे हथीन जिन्करा परमेस्वर जीयत आऊ मुवलकनो परे फइसला करेवोला ठहरउले हथीन । 43 इ उहे हथीन जिन्कर बारे में परमेस्वर देने से बोलेवोला सब अदमिनियन गोवाही देवत हथीन कि जे कवनो उनकरा परे बिसवास करतई, ओकरा उनकर नाम से पाप के छेमा मिलतई ।
गेइर-यहूदियन परे पबितर आत्मा उतरत हई
44 जखनिये पतरस इ बतिया कहते हलई पबितर आत्मा उ वचत के सब सुनेवोलन परे उतरई । 45 जेतना यहूदी बिसवासियन पतरस संगे अइल हलथीन, ओकिन सब इहेला चकचिहा गलथीन कि गेइर-यहूदियनो परे पबितर आत्मा के दान उझलल गलई । 46 काहेकि ओकिन गेइर-यहूदियन नखथीन सिखल भासा बोलत परमेस्वर के बड़ाई करत सुनलथीन । एकरा परे पतरस कहलई, 47 अगर जइसन हमिन पबितर आत्मा के पउलियई, ओइसही एकिनो पबितर आत्मा पउले हथीन त “का कवनो पनिया के रोक सका हई कि एकिन बपतिस्मा नई पउतथीन ?” 48 फिन पतरस ओकिन के यीसु मसीह के नाम में बपतिस्मा देवेला हुकुम देलई । तखनी ओकिन पतरस से बिन्ती कलथीन कि उ आऊ कुछ दिना ओकिन संगे रहतई ।