स्तेफानोस के भासण
7
1 महा याजक स्तेफानोस से कहलई, का इ बतियन सचो के हई ? 2 तखनी स्तेफानोस कहलई, हे भइवन-बपवन, हमर सुना ! हमर पुरखा अबराहम हरान नगर में रहे से पहिले जखनी मेसोपोटामिया में हलई, त महिमा से भरल परमेस्वर अपने के देखउलथीन । 3 आऊ ओकरा से कहलथीन, ‘तू आपन देस आऊ आपन हित-नात से निकल के उ देस में जो, जेकरा हम तोहरा देखबऊ ।’ 4 तखनी उ कसदियन के देस से निकल के हारान नगर में जाके रहे लगलई । ओकर बपवा मुलई, त परमेस्वर ओकरा उहां से इ देस में लान के रखलथीन, जेकरा में अभियो तू रहत हें ।5 परमेस्वर ओकरा उहां कुछु खंदानी जमीन गोड़ो रखे भर नई देलथीन, बाकि उहे घरी ओकरा कवनो बाल-बच्चा नई होवते भर में अइसन वादा करलथीन कि इ देस के तोहर आऊ तोहर अगाड़ीवोला खंदान के बस में कर देबऊ । 6 परमेस्वर अइसनो कहलथीन कि तोहर अगाड़ीवोला खंदान के लोगन चार सउ बरस तक दूसर देस में परदेसी होतथीन, आऊ उहां के रहेवोलन ओकिन के बंधुवा-नउकर बनउतथीन, आऊ चार-सउ बरस तक दुख देतथीन । 7 परमेस्वर आऊ कहलथीन, “जवन जाती एकिन के बंधुवा-नउकर बनउतई, ओकरा हम डड़ देबई, आऊ एकर बाद ओकिन के निकाल के इ जगह में लनबई, आऊ उहंई हमरा सेवा करतथीन ।
8 आऊ परमेस्वर अबराहम से कहलथीन, “हम तोहरा साथे करार करत हियऊ, ओकरा तू मानलहीं, इहेला तोहर अगाड़ीवोला खंदान के सब लइकन के खतना करावेला होतऊ । आऊ इहे दसा में इसहाक ओकरा से जनमलई, आऊ आटवां दिन ओकर खतना कइल गलई, आऊ इसहाक से याकूब जनमलई आउ याकूब से बारह कुलपती जनमलथीन ।
9 इ सब कुलपती यूसुफ से जल के ओकरा मिस्र देस में जायवोला बेपारी भीर बेच देलथीन, बाकि परमेस्वर यूसुफ साथे हलथीन । 10 परमेस्वर ओकरा सब संकट से बचा के मिस्र देस के राजा फिरोन के नजर में किरपा आऊ बुधि देलथीन आऊ राजा ओकरा आपन राज के ऊपर बड़का हाकिम बनउलई ।
11 तखनी मिस्र देस आऊ कनान के सउसे देस में अकाल पड़लई जेकरा से ढेरे संकट होलई, आऊ हमिन के बाप-दादवन के अनाज नई मिलत हलई । 12 बाकि जखनी याकूब इ सुनलई कि मिस्र देस में अनाज हई, त उ हमिन के बाप-दादवन के पहिले बार उहंई भेजलई । 13 दुबारे में यूसुफ खुद के आपन भइवन के देखउलई, उहे घरी फिरोन राजा के इ मालुम होलई कि यूसुफ कवन परिवार के हई । 14 तखनी यूसुफ आपन बाप याकूब आऊ आपन सब हित-नात के बुला लेलई, ओकिन सब पच्हतरगो आदमीन हलथीन । 15 तब ओकर बाप याकूब मिस्र देस में गलई, आऊ उहां उ मू गलई आऊ हमिन के बाप-दादवनो मू गलथीन । 16 उहां से ओकिन के हड्डी के सेकेम जगह में पहूंचा के उ कबर में रखल गलई जेकरा अबराहम चानी के पइसा देके सेकेम जगह में हमोर के बेटा से मोल लेले हलई ।
17 बाकि जखनी उ वादा जे परमेस्वर अबराहम से कइले हलथीन, ओकरा पूरा होखे के घरी नजदिक अलई, त हमिन के लोगन मिस्र देस में गिन्ती में ढेरे बढ गइल हलथीन । 18 तखनी मिस्र देस में एगो दूसर राजा होलई, जवन यूसुफ के नई जाना हलई । 19 इहे राजा हमिन के जात से होसियारी कर के हमिन के बाप-दादवन के संगे अइसनो खराब बरताव करत हलई कि ओकिन के आपन जनमल रेंगवन के फेंकवा देवत हलई कि मू जतथीन ।
20 उहे घरी परमेस्वर देने से बोलेवोला मूसा जनमलई । उ परमेस्वर के नजर में ढेर सुरतगर हलई । उ तीने महीना तक आपन बाप के घर में पोसलई । 21 जखनी फेंक देवल गलई, त ओकरा फिरोन राजा के बेटी उठा के लानलई, आऊ आपन बेटा तरी पोसलई । 22 मूसा के मिस्र देस के सब बिध्या पढावल गलई, आऊ आपन बोली आऊ काम दुइयों में सामरथी हलई ।
23 जखनी उ चालिस साल के होलई, त उ आपन मन में सोंचलई कि ‘हम आपन इस्राएली भइवन से भेंट करबई । 24 उ एगो आदमीन परे अन्याई होवत देख के ओकरा बचउलई, आऊ मिस्र देस के एगो आदमीन के मूवा के सतावल गइल के बदला लेलई । 25 उ सोचलई कि आपन अदमिनियन समझतथीन कि परमेस्वर ओकरे हाथे ओकिन के मुक्ती करतथीन, बाकि ओकिन नई समझलथीन ।
26 दूसरका दिना जखनी दूगो इस्राएली लोगन अपनने में लड़त हलथीन, त मूसा उहंई अलई, आऊ दूनो में सलटावेला चाहलई आऊ कहलई कि “ हे भइवन, तोहिन त अपने भाई हां, अपनने में कहे लड़त हहीं ।
27 बाकि जवन आपन बगलगीर परे अन्याई करत हलई, उ मूसा के इ कह के अलगे कलई, ‘तोहरा कवन हमिन परे फइसला करेवोला आऊ हाकिम बनउले हई ? 28 का जवन तरी तू कालहू मिस्र देस के आदमीन के मूवउले हें, ओइसही हमरो मूवावेला चाहत हें ?
29 इतना बतिया सुनलई, त मूसा मिध्यान देस में भगलई, आऊ उहां परदेसी होके रहे लगलई आऊ उहंई ओकरा दूगो बेटवन जनमलथीन ।
30 चालीस साल बिते पर, सिनाई पहाड़ के जंगलवा में एगो सरगदूत ओकरा जरते झोंड़ के इंजोत में देखलई । 31 मूसा इ देख के अचरज होलई, आऊ उ भीरी जाके देखेला खोजलई, त परभु के इ आवाज होलई, 32 हम तोहर बाप-दादवन अबराहम, इसहाक आऊ याकूब के परमेस्वर हियऊ,’ इ सुन के मूसा सिहर गलई, इहेसे ओकरा फिर देखेला ताकत नई होलई ।
33 तखनी परभु ओकरा से कहलथीन, ‘आपन गोड़वा के जुता निकाल लेहीं, काहेकि जवन ठीन में तू डीड़ी हहीं, उ पबितर जमीन हई । 34 हम सचो में आपन अदमिनियन के जेकिन मिस्र देस में हथीन, खराब हालत के देखले हियऊ, आऊ ओकिन के रोवे आऊ कराहे के सुनले हियऊ, इहेला ओकिन के छोड़ावेला उतरल हियऊ अबही आव, हम तोहरा मिस्र देस में पेठाबऊ ।’
35 जवन मूसा के ओकिन इ कह के नई मानलथीन कि ‘तोहरा कवन हमिन पर फइसला करेवोला आऊ हाकीम बनउले हई ?’ ओकरे परमेस्वर हाकिम आऊ छुड़ावेवोला ठहरउलथीन, उहे सरगदूत से जवन उहे झोंड़ में देखइले हलई, ओकरे पेठउलई । 36 इहे आदमीन मिस्र देस में आऊ लाल समुंदर में आऊ जंगल में चालीस साल तक अजगुत काम आऊ अजगुत चिन्हां देखा-देखा के ओकिन के निकाल के ले लानलई ।
37 इ उहे मूसा हई, जवन इस्राएली लोगन से कहलई, ‘परमेसर तोहिन के भइवन में से तोहिन खातिर हमरा जइसन एगो आपन देने से बोलेवोला के उठउतथीन ।’ 38 इ उहे हई, जवन जंगलवा में सभा के बिचे उ सरगदूत के साथे सिनाई पहाड़ पर ओकरा से बतियलई आऊ हमिन के बाप-दादवन संगे हलई, ओकरे जीयत वचन मिललई आऊ हमिन भीर पहूंचउलई ।
39 हमिन के बाप-दादवन त ओकरा मनेला नई चाहलथीन, बाकि ओकरा हटा के आपन मन मिस्र देस देने फेरलथीन । 40 ओकिन हारून से कहलथीन, ‘हमिन खातिर एगो अइसन देवता बनाव जे हमिन के अगाड़ी-अगाड़ी हिठतई, काहेकि इ मूसा जवन हमिन के मिस्र देस से निकाल के लानलई, अबही ओकरा का होलई ? हमिन नइखी जानत ।’ 41 उहे घरी ओकिन एगो बाछा के मूर्ती बना के ओकरा पर पूजाई कलथीन, आऊ आपन हथवा के काम में खुसी होवे लगलथीन । 42 बाकि परमेस्वर मूंह मोड़ के ओकिन के छोड़ देलथीन, इहेसे ओकिन आसमान के तरेगन के पूजलथीन, जइसन परमेस्वर देने से बोलेवोलन के किताब में लिखल हई,
हे इस्राएली के घराना, का तोहिन जंगलवा में
चालिस साल तक
अनाज के आऊ जनावर के पूज के हमरे पर चढ़ावत हलहीं ?
43 तोहिन त मोलेक देवता के पालकी
आऊ रिफान देवता के तारा के
लेले चलत हला,
उ सब मूरतियन के जेकिन के
तोहिन डड़वत परनाम करे खातिर बनउले हलहीं,
बाकि हम तोहिन के बेबीलोन के राज में
ले जाके बसबऊ ।’
44 गोवाही के पबितर तम्बू जंगलवा में हमिन के बाप-दादवन के बिचवा में हलई, उ उहे तम्बू हई जे परमेस्वर मूसा से हुकुम देके कहलथीन कि ‘जे नमुना तू देखले हें, ओकरे तरी एकरा बनाव ।’ 45 उहे तम्बू के हमिन के बाप-दादवन पुरनका जबाना में पाके यहोसुवा के साथे इहां लानलथीन, जवन घरी ओकिन दूसर जातियन पर अधिकार पउलथीन जेकिन के परमेस्वर हमिन के बाप-दादवन भीरा से निकाल देलथीन, आऊ उ तम्बू दाऊद राजा घरी तक रहलई ।
46 दाऊद राजा पर परमेस्वर किरपा करलथीन, आऊ बिन्ती करलई कि उ याकूब के परमेस्वर खातिर रहेला घर बनउतई । 47 बाकि सुलइमान राजा उनकर खातिर घर बनउलई । 48 बाकि परम परधान परमेस्वर हाथ के बनावल घर में नई रहा हथीन, जइसन परमेस्वर देने से बोलेवोला कहलई,
49 ‘परभु कहा हथीन, सरग हमर सिंहासन आऊ
धर्ती हमर गोड़ के तरवा रखेला पीढ़ा हई
हमर ला तोहिन कवन तरी के घर बनइबे ?
आऊ हमरा अराम करेला कइसन जगह होतई ?
50 का इ सब चीजवन हमर हाथ के बनावल नखथीन ?’
51 हे जिधी, मनमउजी आऊ कन्कट लोगन, तोहिन हर घरी पबितर आत्मा के बिरोध करा हहूं । जइसन तोहिन के बाप-दादवन करत हलथीन, ओइसही तोहिनो करत हहूं । 52 परमेस्वर देने से बोलेवोलन में से केकरा तोहिन के बाप-दादवन नखथुन सतउले ? ओकिन उ धर्मी-मतलब मसीह के आवे के पहिलहूं खबर देवेवोलन के मूवा देलहूं आऊ तोहिनो उनकरा पकड़वावेवोला आऊ मूवावेवोला होइलहूं । 53 तोहिन सरगदूतवन के चलते जिमा देवल नियम त पउला, बाकि ओकरा नई मानलहूं ।”
स्तेफानोस परे पखल मारेला
54 इ बतियन सुन के ओकिन गोसा में भर के स्तेफानोस पर दांत चबावे लगलथीन । 55 बाकि स्तेफानोस पबितर आत्मा में भरपूर होके सरग देने देखलई आऊ परमेस्वर के महिमा के आऊ यीसु के परमेस्वर के दहिने देने डीड़ी होइल देख के कहलई, 56 “देखा, हम सरग के खुलल आऊ ‘आदमीन के बेटा’ के परमेस्वर के दहिने देने ड़ीड़ी होइल देखत हियई ।”
57 तखनी ओकिन ढेरे जोर से चिलिया के कान मून लेलथीन, आऊ एके साथे ओकरा पर झपटलथीन । 58 आऊ ओकरा सहर के बाहरे लेग के ओकरा पर पखल मारे लगलथीन । गोवाहवन आपन कपड़वा उतार के साऊल नाम के एगो जवान के गोड़वा भीर रख देलथीन । 59 ओकिन स्तेफानोस पर पखल मारते रहलथीन, आऊ उ इ कह के पराथना करत रहलई, “हे परभु यीसु, हमर आत्मा के रखूं ।” 60 तखनी उ ठेहुना टेक के जोर से चाल कलई, “हे परभु, इ पाप एकिन परे नई लगइहां ।” आऊ इ कह के उ मू गलई ।