सातगो सेवकवन चुनल गलथीन
6
1 उ दिना में ढेरे अदमिनियन यीसु के चेला बन गलथीन, बाकि युनानी भाषा बोलेवोला यहूदियन इबरानी भाषा बोलेवोला यहूदियन पर अइसन कुटकुटाय लगलथीन कि रोज दिन के खाना में हमिन के मसोमतियन परे धेयान नई देवल जा हई ।2 तखनिये उ अब बारहो खास चेलवन मसीही मंड़ली के सब चेलचन के आपन भीर बुला के कहलथीन, “इ ठीक नखई कि हमिन परमेस्वर के वचन के परचार के छोड़ के खिलावे-पिलावे के सेवा में रहियई । 3 इहेला, हे भइवन-बहिनियन अपनन में से सातगो बढ़िया अदमिनियन, जेकिन पबितर आत्मा से आऊ बुधि से भरपूर होखे, ओकिन के चुन लेहीं, ताकि हमिन इ काम के ओकिने के जिमा दियई । 4 बाकि हमिन त पराथना में आऊ वचन के परचार में लगल रहबई ।”
5 इ बतीया सब चेलवन के बढ़िया लगलई, आऊ ओकिन स्तेफानोस नाम के एगो आदमीन के, जवन बिसवास आऊ पबितर आत्मा से भरपूर हलई, आऊ फिलिप्पूस, आऊ परखुरुस, आऊ निकानोर, आऊ तिमोन, आऊ परमिनास, आऊ अंताकीया सहर के रहेवोला नीकुलाउस के जवन गेइर-यहूदी से यहूदी मत के मंजूर कइले हलई, एकिन सब के चुन लेलथिन । 6 एकिन के खास चेलवन भीरा ड़ीड़ी कलथीन आऊ ओकिन पराथना कर के ओकिन परे हाथ रखलथीन ।
7 परमेस्वर के वचन फइलत गलई आऊ यरूसलेम सहर में चेलवन के गिन्ती दिन-दिन में ढेरे बढ़ते गलई; आऊ ढेरे याजकवनो एकिन संगे परभु पर बिसवास करेवोलन हो गलथीन ।
स्तेफानोस के पकड़वावल
8 स्तेफानोस किरपा आऊ सामरथ से भरपूर होके लोगन के बीच में बड़का-बड़का अजगुत काम आऊ अजगुत चिन्हा दिखावल करा हलई । 9 तखनी यहूदी धरम सभा घर, जे ‘अजादियन के’ कहलावत हलई, ओकर में से कइएक अदमिनियन उठ के स्तेफानोस से बहस करे लगलथीन । एकिन सब कुरेनी, आऊ सिकंदरिया, आऊ किलिकिया, आऊ आसिया इलाका के हलथीन । 10 बाकि उ गेयान आऊ पबितर आत्मा जेकरा से स्तेफानोस बतिया करत हलई, कवनो ओकरा सामने नई टीकलथीन ।
11 एकरा परे ओकिन कइएक अदमिनियन के इ कहेला चुप के उकसउलथीन कि हमिन एकरा परमेस्वर देने से बोलेवोला मूसा आऊ परमेस्वर के बिरोध में निन्दा के बतियन कहते सुनले हियई । 12 ओकिन आऊ लोगन, यहूदी नेतवन आऊ नियम के गुरुयन के गोसवा के स्तेफानोस भीर लानलथीन आऊ ओकरा घर के महासभा में ले गलथीन ।
13 आऊ झूठा गोवाहवन के डीड़ी कलथीन, उहे अदमिनियन कहलथीन, “ इ आदमीन इ पबितर जगह आऊ नियम के बिरोध में बोलेला नखई छोडत । 14 काहेकि हमिन एकरा इ कहते सुनले हियई कि इहे नासरत के यीसु इ जगहिया के गिरा देतई, आऊ उ परमेस्वर देने से बोलेवोला मूसा से हमिन के देवल गइल रीति-रिवाज के बदल देतई ।
15 तखनी सब अदमिनियन जेकिन सभा मे बइठल हलथीन, स्तेफानोस पर नजर गड़ा के देखलथीन, त ओकर मूंहवा सरगदूत जइसन देखालई ।