यीसु चेलवन के पराथना करेला सिखावत हथीन
(मत्ती 6:9-13)
11
1 एक दिन यीसु एगो जगह में पराथना करत हलथीन । जखनी उ पराथना कर लेलथीन, त उनकर चेलवन में से एगो कहलई, “हे परभु, जइसे यूहन्ना आपन चेलवन के पराथना करेला सिखउलई ओइसही रउवा हमिनो के सिखा देऊं/ दिहूं ।2 यीसु ओकिन से कहलथीन, “तोहिन इहे तरी पराथना करिहां,
“हे पिता,
राउर नाम पबितर मानल जाई,
राउर राज आई ।
3 ‘हमिन के रोज दिन के खायला हमिन के दिहूं,
4 ‘आऊ हमिन के पाप के माफ करूं,
जइसे हमिन आपन अपरधियन के माफ करा हियई,
आऊ हमिन के पाप में नई गिरे दिहूं' ।"
पराथना के बारे में यीसु के सिक्छा
(मत्ती 7:7-11)
5 फिन पराथना करे के बारे में आऊ कुछ सिखावेला यीसु उदाहरन देके ओकिन से कहलथीन, "मान लेहीं कि तोहिन के एगो साथी हई, आऊ तोहिन आधा रात में जाके ओकरा भीर कहबहीं, ‘हे दोस्त हमरा तीनगो रोटी पइंचा देहीं । 6 काहेकि हमरा एगो दोस्त हमर घर में आइल हई, आऊ हमरा भीर ओकरा खियावेला कुछु नखई ।’ 7 मान लेहीं कि तोहर साथी भीतरे से जबाब देतऊ, ‘हमरा परेसान मत कर, अब त दुहारी बंद हो गइल हऊ, आऊ हमर बाल-बच्चा हमर साथे सुतल हथीन, इहे चलते हम उठके तोहरा कुछु नई देवे परबई । 8 हम तोहिन से कहत हियई कि उ ओकर साथी होवे पर भी उठके नई देतई, तबो में उ टिक के मांगे के चलते जेतना जरूरी होतई, ओतनाही देतई ।
9 इहेसे हम तोहिन से कहत हियई कि परमेस्वर से मंगबा त तोहिन के देवल जतई; खोजबा त तोहिन पइबा; ठोक-ठोकइबा, त तोहिन खातिर दुहारी खोलल जतवा । 10 काहेकि जे कोनो परमेस्वर से मांगा हई, ओकरा मिला हई; आऊ जे कोनो खोजा हई, उ पावा हई; आऊ जे कोनो ठोक-ठोकावा हई, ओकरा खातिर खोलल जा हई ।
11 मान लेहीं, तोहिन में से एगो बाप के एगो बेटा होतई; जे घरी बेटा ओकर बाप से रोटी मांगतई, त ओकरा का पखल देतई; आऊ मछरी मांगतई, त मछरी के बदले ओकरा का सांप देतई ?a 12 चाहे आंड़ा मांगतई, त ओकरा का बिछ देतई ? 13 अइसन कहियो नई हो सका हई । जखनी तोहिन पापी होके आपन बाल-बाच्चा के बढ़िया चीजवन देवे जाना हां, त तोहिन के पिता जे सरग में रहा हथीन आपन मांगेवोलन के पबितर आत्मा काहे नई देतथीन ?
यीसु आऊ दुस्टात्मवन के मालिक
(मत्ती 12:22-30; मरकुस 3:20-27)
14 एक दिन यीसु एगो दुस्ट आत्मा से लिटकल आदमीन से दुस्ट आत्मा के निकललथीन । उ दुस्ट आत्मा ओकरा गुंग बनउले हलई । जखनी उ दुस्ट आत्मा निकलली त उ गुंग आदमीन बोले लगलई आऊ इ देख के लोगन के अचम्भा होलई । 15 बाकि ओकिन में से कुछ लोगन कहलथीन, “इ त सइतान जे दुस्टात्मवन के मुखिया हई, ओकर मदत से दुस्टात्मवन के निकाला हई ।” 16 यीसु परमेस्वर के सामरथ से अजगुत काम करा हथीन, एकर साबुत देखावेला आऊ कुछ दूसर लोगन यीसु से कहलथीन, “तू एगो अजगुत काम कर के देखाव ।"
17 बाकि यीसु ओकिन के मन के बात के जान के ओकिन से कहलथीन, “जवन-जवन राज के लोगन अपननही में लड़ा हथीन, त उ राज उजड़ जा हई; आऊ जवन-जवन घर के आदमीन अपननही में लड़ा हथीन, त उ घरवो उजड़ हो जा हई । 18 तोहिन हमर बारे में कहत हां कि हम दुस्टात्मवन के मालिक के मदत से दुस्टात्मा के निकाला हई, बाकि सइतान अपने बिरोध में हो जतई, त ओकर राज कइसे बनल रहतई ? 19 अगर हम दुस्टात्मवन के मालिक के मदत से दुस्टात्मवन के निकाला हियई, त तोहिन के बेटवन केकर मदत से निकाला हथून ? इहेला ओकिने इ साबित करतथीन कि जे तोहिन कहा हां उ गलत हऊ । 20 बाकि हम परमेस्वर के सक्ती से दुस्ट आत्मवन के निकाला हियई, त समझ लेहीं कि परमेस्वर के राज तोहिन भीरा आ गइल हऊ । 21 जखनी एगो ताकतवर आदमीन सब हथियार के साथे आपन घर के रखवारी करा हई, त ओकर धन सम्पति बचल रहा हई । 22 बाकि जखनी ओकरा से बड़का कोनो ताकतवर आदमीन ओकर परे चढ़ाई करके जीत जा हई, त उ ओकर सब हथियार के लूट लेवा हई जेकरा परे ओकर भरोसा हलई, आऊ ओकर धन सम्पति के लुट के बाँट देवा हई । 23 जे हमर साथे नखई उ हमर बिरोध में हई, आऊ जे हमरा संगे जमा नई करा हई उ छितरावा हई ।b 24 “जखनी दुस्टात्मा कोनो आदमीन से निकल जा हई, त बढ़िया जगह में अराम खोजा हई, आऊ जखनी नई पावा हई त कहा हई, "हम उहे आदमीन भीरा लउट जबई, जाहाँ से हम निकलल हियई ।" 25 त आपस आके उ आदमीन के झारल-बहारल आऊ साफ-सुतरा एगो घर जइसन पावा हई । 26 तखनी उ जाके आपन से आऊ बुरा सातगो दुस्टात्मवन के आपन साथे लेके आवा हई, आऊ ओकिन उ अदमीन में पइठ के वास करा हथीन, आऊ उ अदमीन के दसा पहिले से भी ढेरे खराब हो जा हई ।”
27 यीसु इ बात कहत हलथीन, त भीड़ में से एगो अउरत चिलिया के यीसु से कहलई, “धन्य हथीन उ माई जे रउवा के जन्म देलई, आऊ रउवा के आपन दूध पीयउलई ।” 28 तखनी यीसु कहलथीन, “हाँ; बाकि धन्य ओकिन हथीन जे परमेस्वर के वचन के सुना हथीन आऊ माना हथीन ।”
योना के चिन्हा
(मत्ती 12:38-42)
29 भीड़ बढ़ते जात हलई, तखनी यीसु कहे लगलथीन, “इ जुग के अदमिनियन खराब हथीन; ओकिन बार-बार अजगुत चिन्हा खोजा हथीन, बाकि जे चिन्हा परमेस्वर योना के जिन्गी में करले हलथीन, ओकरा छोड़ के कोनो आऊ चिन्हा ओकिन के नई देवल जतई ।c 30 जइसे योना नीनवे नगर के लोगन खातिर एगो चिन्हा ठहरावल हई, ओइसही 'आदमीन के बेटा' इ जुग के लोगन खातिर चिन्हा ठहराबई । 31 दखिने देस सीबा के रानी परमेस्वर नयाय करे के दिन इ पीढ़ी के लोगन साथे उठके ओकिन के दोसी ठहरउतई, काहेकि उ सुलेमान राजा के गेयान के सुने खातिर ढेरे दूर से अलई, आऊ सुना, इहां एगो हथीन उ सुलेमान से भी बड़हन हथीन । 32 नीनवे नगर के अदमिनियन परमेस्वर नेयाय करे के दिन में इ पीढ़ी के लोगन साथे डीड़ी होके ओकिन के दोसी ठहरउतथीन; काहेकि ओकिन योना के परचार के सुन के पाप छोड़ के परमेस्वर देने फेरलथीन, आऊ सुना, इहां एगो हथीन उ योना से भी बड़हन हथीन ।d
इंजोत पावा हई
33 “कवनो आदमीन ढिब्री जरा के ओकरा बासन से नई ढाका हई, आऊ लुका के नई रखा हई, बाकि ओकरा दिरखा पर रखा हई, ताकि भीतरे आवेवोलन के इंजोत मिलतई ।
34 तोहर अखिया तोहर देह के ढिबरी हई, इहेसे जखनी तेहर अखिया बढ़िया हई त तोहर पूरा देह भी इंजोत हई; बाकि जखनी तोहर अखिया खराब हई त तोहर देह भी अन्हार हई । 35 इहेसे चेतल रहा कि जे इंजोत तोहिन में हई उ कहंऊ अन्हार नई हो जाई । 36 अगर तोहर पूरा देह इंजोत में रहा हई आऊ ओकर कोनो भाग अन्हार में नई रहा हई, त तोहर पूरा देह अइसन इंजोत में रहतई, जइसन जखनी ढिबरी आपन इंजोत से तोहिन के इंजोत देवा हई ।”
यीसु नियम गुरुयन आऊ फरीसियन के डाटलथीन
(मत्ती 23:1-36; मरकुस 12:38-40)
37 यीसु बात करत हलथीन, त कोनो फरीसी आदमीन उनकरा से बिन्ती कर के कहलई, 'रउवा हमर घरे खाना खायला चलूं' । त यीसु भीतरे जाके खाना खायला बइठलथीन । 38 फरीसी इ देख के अचम्भा होलई कि यीसु यहूदियन के रीति-रिवाज के मोताबिक खाय घरी हाथ नई धोलथीन । 39 परभु ओकरा कहलथीन, "हे फरीसियन, तोहिन डूभा आऊ छिप्पी के ऊपरे-ऊपरे मांजेला ढेर धेयान देवा हां, बाकि तोहिन के भीतरे लालच आऊ बुराई भरल हऊ । 40 हे मुरखवन, जे परमेस्वर बाहरी के बनउले हथीन, का उ भीतरे के नखथीन बनउले ? 41 बाकि गरीबकन के दान कर के भीतरे के सुध करिहां, आऊ देख, सब कुछ तोहिन खातिर सुध हो जतई ।
42 “बाकि हे फरीसियन, बड़ी दुख तोहिन पर ! काहेकि तोहिन त पुदेना आऊ सुदाब के आऊ सब किसीम के साग-पात के दसवां-अंस देवा हां, बाकि नयाय के आऊ परमेस्वर के परेम के टाल देवा हां; तोहिन पहिलका काम नई छोड़ के दूसर काम करबहीं त केतना बढ़िया होतियई । 43 “बाकि हे फरीसियन, बड़ी दुख तोहिन पर ! काहेकि तोहिन त धरम सभा के घर में मुख्य-मुख्य अस्थान/बइठलका आऊ बाजार में घुमे घरी गोड़ लगवावेला चाहा हां । 44 बड़ी दुख तोहिन पर ! काहेकि तोहिन उ बिना चिन्हा लगावल गड़ात के जइसन हां, जेकर परे अदमिनियन भीतरेवोला गन्दगी के अनजाने हिठा हथीन ।
45 तखनी एगो नियम के गूरु उनकरा जबाब देलई, “हे गुरूजी, इ बात कह के रउवा हमिन के बेजती करत हिये ।" 46 बाकि यीसु कहलथीन; “हे नियम के गुरुयन, बड़ी दुख तोहिन पर ! काहेकि तोहिन अइसन बोझ जेकिन के उठावेला ढेरे मुसकिल हई, ओकिन परे लादा हां, बाकि तोहिन खुद उ बोझ के आपन एको अंगुरी से भी नई छुवा हहीं । 47 बड़ी दुख तोहिन पर ! तोहिन परमेस्वर देने से बोलेवोलन के गडांत बनावा हहीं, जेकिन के तोहिन के बाप-ददवन मूवा देलथीन । 48 इहेसे तोहिन एकर गोवाह हहीं, आऊ आपन बाप-दादवन के काम में सहमत हहीं; काहेकि ओकिन परमेस्वर देने से बोलेवोलन के मूवा देलथीन आऊ तोहिन ओकिन के गडांत बनावा हहीं । 49 इहेला परमेस्वर आपन गेयान से कहले हथीन, ‘हम ओकिन भीर हमर देने से बोलेवोलन आऊ खास चेलवन के पेठाबई, आऊ ओकिन में से कुछ लोगन के मूवा देतथीन, आऊ कुछ लोगन के सतउतथीन । 50 इहेसे परमेस्वर देने से बोलेवोला ढेरे लोगन के खून दुनिया के सुरुवे से बहावल गइल हई, उ सब के हिसाब इ जुग के लोगन से लेवल जतई : 51 हम तोहिन से एकदम कहत हियई, "हाबील के खून से लेके जकरयाहe के खून तक जेकरा सिरा आऊ मंदीर के बीच में मुवावल गइल हलई । इ सब के हिसाब इ जुग के लोगन से लेवल जतई । 52 नियम के गुरुयन खातिर इ केतना खराब हालत होतई ! काहेकि तोहिन गेयान के चाभी के अदमिनियन से छुपा के रखले हहीं । तोहिन त खुदे परमेस्वर के राज में नई घुसबा, आऊ दूसरकनो के घुसे से तोहिन रोकत हहीं ।”