परभु यीसु आपन चेलवन के पेठावत हथीन
10
1 एकर बाद परभु यीसु सतरगोa आऊ चेलवन के चुनलथीन, जवन-जवन नगर आऊ जगह में उनकरा जायला हलई, उहां जाय से पहिले उ चेलवन के दू-दू कर के पेठा देलथीन । 2 यीसु ओकिन से कहलथीन, “पाकल फसल त ढ़ेर हथीन, बाकि मजदूर कमे हथीन; इहेला परभु परमेस्वर, जे खेत के मालीक हथीन, उनकरा से बिन्ती करा कि उ आपन खेत के फसल के काटेला मजदूर भेजतथीन । 3 अभी जा; आऊ इयाद रखिहां कि हम तोहिन के लकड़वन के बीच में भेड़ी तरी पेठावत हियऊ । 4 इहेला जाय घरी तोहिन आपन खातिर पइसा, झोला, आऊ चट्टी मत लिहां; आऊ डहर में केकरो से जोहार मत कहिहां । 5 केकरो घर में तोहिन जइबा, त उ घर के पहिले इ आसिस दिहां कि परमेस्वर के सांति उ घर में बनल रहे । 6 अगर सांति के लायक अदमिनियन उहां रहत हथीन, त उ आसिस ओकिन के मिलतई; अगर ओकिन एकर लायक नई होतथीन त उ आसिस तोहिन भीर लउट अतई । 7 जखनी कोनो सहर में पहूँचबा, त एक घर से दूसर घर मत घुमिहा | एके घर में रहिहा आऊ जे कुछ खायला तोहिन के देतथुन, उहे खइहा-पिहा, काहेकि मजदूर के आपन मजदूरी मिलेला चाही । 8 अगर कोनो सहर के लोगन तोहिन के खुसी से मंजूर करा हथीन, त जे कुछ तोहिन के आगा में परोसल जतवा उहे खइहा । 9 उहाँ के रोगीयन के ठीक करिहा आऊ ओकिन से कहिहा, ‘परमेसर के राज तोहिन भीरा आ गइल हई ।’ 10 अगर कोनो सहर के लोगन तोहिन के मंजूर नई करतथीन, त ओकिन के गली में जाके कहिहा, 11 तोहिन के सहर के धुर भी जे हमिन के गोड़ में लगल हई, ओकरा हमिन तोहिन के बिरोध मेंb झार देवत हियऊ; बाकि इ जान लेहीं कि परमेस्वर के राज तोहिन भीर आ पहूँचल हई ।’ 12 हम तोहिन से एकदम कहत हियऊ कि परमेस्वर नयाय करे के दिन में सदोम जइसन दुस्ट नगर के डड़ से जादे डड़ इ नगर के मिलतऊ ।cअबिसवासी इलाका के उपरे हाय
(मत्ती 11:20-24)
13 “हे खुराजीन, हे बइतसइदा ! बड़ी दुख तोहिन पर आवेवोला हई ! जे अजगुत काम हम तोहिन दूनो के इलाका में करले हियई, अगर उहे अजगुत काम सूर आऊ सइदा के दुस्ट इलाका में कइल जतियई, त उहां के अदमिनियन टाट ओढ़ के आऊ राख में बइठ के अइसन देखउतियथीन कि ओकिन पाप छोड़ के परमेस्वर देने फिरलथीन । 14 बाकि परमेस्वर नयाय करे के दिन में सूर आऊ सइदा के डड़ से तोहिन के डड़ ढेरे जादे होतऊ । 15 हे कफरनहूम के लोगन, का तोहिन के सरग तक ऊँचा कइल जतई ? नई, तोहिन त अधोलोक तक नीचे जइबे ।
16 फिन यीसु आपन चेलवन से कहलथीन, "जे कवनो तोहिन के बात के माना हई, उ हमरा माना हई; आऊ जे कवनो तोहिन के इनकार करा हई, उ हमरा इनकार करा हई; आऊ जे हमरा इनकार करा हई, उ हमरा भेजेवोला परमेस्वर के इनकार करा हई।”
सतरगो चेलवन घुर के अलथीन
17 जखनी उ सब सतरगो चेलवन घुरलथीन, त ओकिन खुसी से कहे लगलथीन, “हे परभु, राउर नाम से भूतवनो हमिन के बात माना हथीन ।” 18 यीसु ओकिन से कहलथीन, "हम सइतान के सरग से बिजुली तरी गिरते भर में देखत हलियई । 19 देखा, हम तोहिन के सब सपवन आऊ बिछुवन के रउंने के, आऊ तोहिन के दुसमन सइतान के सबे सामरथ के ऊपरे अधिकार देले हियऊ; तोहिन के कवनो चीज से कुछो हानि नई होतऊ । 20 तबो में तोहिन एकर चलते खुस मत होइहा कि दुस्टात्मवन तोहिन के हुकुम के माना हथीन, बाकि इहेला खुस होखा कि तोहिन के नाम सरग में लिखल हई ।"
यीसु पिता परमेस्वर के धन्यबाद करलथीन
(मत्ती 11:25-27; 13:16-17)
21 उहे घरी यीसु पबितर आत्मा से भरपूर होके के खुस होलथीन आऊ कहलथीन, “हे पिता, सरग आऊ धरती के परभु, हम राउर धन्यबाद करत हिये कि रउवा इ बतिया के जे अपने आप के गेयानी आऊ समझदार समझा हथीन, ओकिन से छुपा के रखले हिये, बाकि जे लइकवन तरी हथीन, ओकिन परे इ बातिया के परगट करले हिये | हाँ, ''हे पिता, काहेकि रउवा के इहे बढ़िया लगलई ।
22 हमर पिता हमरा सब कुछ अधिकार देले हथीन; आऊ कोनो नखई जानत कि उनकर बेटा कवन हथीन, खाली परमेस्वर पिता जानत हथीन, आऊ कोनो नखई जानत कि पिता कवन हथीन, उनकरो कोनो नखई जानत, खाली बेटा जानत हथीन, आऊ जेकरा परे बेटा पिता के परगट करा हथीन उहे इ जानत हथीन ।”
23 फिन यीसु चेलवन देने घुम के अकेले में कहलथीन, "जे कुछ तोहिन अभी देखत हां ओकरा देखे खातिर तोहिन के आंख केतना भगसाली हई । 24 काहेकि हम तोहिन से कहत हिवा कि ढेरे परमेस्वर देने से बोलेवोलन आऊ राजवन उ बतिया के देखेला आऊ सुनेला चाहत हलथीन जवन बतिया के तोहिन हमरा करते देखले हां आऊ कहते सुनले हां, बाकि ओकिन उ बतिया के देखे नई परलथीन आऊ सुने नई परलथीन ।"
25 एक दिना एगो नियम के गुरु यीशु के परीछा लेवेला पूछलई, “हे गुरु, परमेस्वर संगे अमर जिन्गी पावे खातिर हम का करियई ?” 26 यीसु ओकरा जबाब देलथीन, “मूसा के नियम में का लिखल हई ? ओकरा तू कइसे समझत हें ?” 27 उ जवाब देलई, “तोहिन आपन परभु परमेस्वर के आपन पूरे मन से आऊ आपन पूरे परान आऊ आपन पुरे सक्ती से आऊ आपन पुरे बुधी साथे परेम करा । आऊ आपन साथी से आपन तरी परेम-दुलार करा ।" 28 यीसु ओकरा से कहलथीन, “तू सही जवाब देले, अइसने तू करबे त तू अमर जिन्गी पइबे ।" 29 बाकि उ अपने आप के बढ़िया देखायला यीसु से पूछलई, “त हमर साथी कवन हई ?”
एगो बढ़िया सामरी के कथा
30 यीसु एगो कथा बता के जबाव देलथीन, “एगो आदमीन येरूसलेम से यरीहो में जात हलई, त डाकु ओकर कपड़वा के लूट लेलथीन, आऊ मार-पीट के अधमुवा कर के चल गलथीन । 31 आऊ अइसन होलई कि उहे डहरिया से एगो याजक जात हलई, बाकि जखनी उ अधमुवा आदमीन के देखलई, त उ दूसर डहर में चल गलई । 32 अइसही परमेस्वर के मंदिर में सेवा करेवोला एगो लेवी आदमीन उ जगह पर अलई, आऊ उहो उ अधमुवा अदमीन के देख के दूसर डहर में चल गलई ।
33 बाकि एगो सामरी आदमीन उहे डहर में जात हलई, आऊ जखनी उ अधमुवा अदमीन के देखलई त ओकरा परे मोह-माया अलई । 34 सामरी अदमीन उ अधमुवा आदमीन भीर आके ओकर घाव में तेल आऊ दवाई लगउलई आऊ पटी बन्हलई, आऊ आपन गाधा परे चढ़ा के सराय में ले गलई, आऊ ओकरा इजत-पानी करलई । 35 दूसरका दिन सामरी दू दिना के कमाई निकाल के सराय के मालिक के दे देलई, आऊ बोललई, ‘एकर इजत-पानी करिहें आऊ जादे खरच होतऊ, त हम घुम के अबई त तोहरा दे देबई ।’
36 फिन यीसु पूछलथीन, 'अब तोहर समझ में इ तीनगो में से डाकु से मारल आदमीन के साथी कवन हई ? 37 उ नियम के गुरु यीसु से कहलई, “उहे जे ओकर परे दया करलई ।" यीसु ओकरा से कहलथीन, “जो ! तुहूं ओइसही कर ।”
यीसु मारथा आऊ मरियम के घरे जात हथीन
38 यीसु आऊ उनकर चेलवन जात हलथीन त ओकिन एगो गांव में पहूँचलथीन, जहां मारथा नाम के एगो अउरत यीसु के आपन घरे बुलउलई । 39 मारथा के एगो बहिन हलई, जेकर नाम मरियम हलई । उ परभु के गोड़ के नीचे बइठ के उनकर वचन के सुनत हलई । 40 बाकि मारथा सेवा करते-करते परेसान हो गलई | उ यीसु भीर आके बोललई, “हे परभु, का रउवा के कुछु धेयान नइखे कि हमर बहिन हमरा अकेले सेवा करेला छोड़ देले हई ? रउवा ओकरा कहूं कि उ हमरा मदत करतई ।”