8
1 इ सब घटना के बाद यीसु सहर-सहर आऊ गांव-गांव में जाके परमेस्वर के राज के बढ़िया खबर के परचार करत आऊ सुनावत घुमे लगलथीन, आऊ बारहों खास चेलवनो के उनकरा संगे लेलथीन । 2 आऊ कुछ अउरतियन, जेकिन के यीसु भूतवन से आऊ बिमारी से छोड़उले हलथीन, ओकिनो उनकरा संगे हलथीन । ओकिन में से मरियम मगदलीनी (उ मगदाला गांव के हलई), जेकर में से यीसु सातगो भूतवन के निकलले हलथीन, 3 आऊ हेरोदेस के देख-ताक करेवोला खोजा के मेहरारु योअन्ना; आऊ सूसन्नाह, आऊ ढेरेला दूसर अउरतियनो हलथीन । एकिन आपन धन-दउलत लगा के यीसु के आऊ उनकर चेलवन के सेवा करा हलथीन ।बिहन बुनेवोला के कथा
(मत्ती 13:1-9; मरकुस 4:1-9)
4 जखनी ढेरे भीड़ जुटल हलथीन आऊ सहर-सहर के लोगन यीसु भीर चलल आवत हलथीन, तखनी यीसु एगो कथा बता के ओकिन के समझउलथीन: 5 “एगो खेतीहर बिहन बुने निकललई । बुने घरी कुछ बिहन डहर के किनारे गिरलई, आऊ रउनल गलई, आऊ चिरइयन ओकरा खा गलथीन । 6 कुछ बिहन धर्ती के पखल पर गिरलई, आऊ जाम गलई, बाकि पानी नई मिले से सूख गलई । 7 कुछ बिहन झाड़ियन के बिच में गिरलई, आऊ झाड़ियन साथे-साथे बढ़लई आऊ बिहनवा के जांत देलई । 8 आऊ कुछ बिहन बढ़िया जमीन परे गिरलई, आऊ जाम के ओकरा में सो गुना अनाज पइदा होलई ।” इ कथा कहे के बाद यीसु जोर से कहलथीन, “तोहिन में जवन सुनेला तइयार हां उ सुना आऊ समझा ।”
कथा के मतलब
(मत्ती 13:10-17; मरकुस 4:10-12)
9 यीसु के चेलवन उनकरा से पूछलथीन कि इ कथा के मतलब का हई ? 10 यीसु जबाब देलथीन, “तोहिन के परमेस्वर के राज के छिप्पल बतिया समझेला गेयान देवल गइल हई, बाकि बाहरी लोगनa से इ सब बतिया छिपावेला हम इ कथा में सुना देवत हियऊ, ताकि पबितर किताब में जे कुछ लिखल हई उ पूरा होतई कि
"हम जे कुछ करा हियऊ ओकिन देखा हथीन,
बाकि सचमुच में ओकिन नई देख पउतथीन;
हम जे कुछ कहा हियऊ ओकिन सुना हथीन,
बाकि समझ नई पउतथीन ।"
11 कथा के मतलब इ हई : बिहन परमेस्वर के वचन हई । 12 जे बिहन डहर के किनारे गिरलई, एकिन उ लोगन के देखावा हई जेकिन वचन के सुना हथीन, बाकि सइतान आके ओकिन के मनवा में से वचन उठा के ले जा हई ताकि ओकिन वचन पर बिसवास नई करतथीन आऊ मुक्ती नई पउतथीन । 13 आऊ पखलउर जगह में गिरल बिहन उ लोगन के देखावा हई, जेकिन परमेस्वर के वचन के सुना हथीन, आऊ खुसी से वचन के गर्हन करा हथीन, बाकि जरी नई धरे से ओकिन थोड़े देर तक बिसवास करा हथीन आऊ परीछा आवे घरी बहक जा हथीन । 14 झाड़ियन के बीच में गिरल बिहन उ लोगन के देखावा हई, जेकिन परमेस्वर के वचन के सुना हथीन, बाकि आगे चल के फिकिर, धन-दउलत आऊ जिन्गी के मोहमया में फंस जा हथीन आऊ ओकिन आत्मिक जिन्गी में कहियो पक्किया नई हो पावा हथीन । 15 बाकि बढ़िया जमीन परे गिरल बिहन उ लोगन के देखावा हई, जेकिन परमेस्वर के वचन के सुना हथीन, आऊ ओकरा अपनावा हथीन आऊ टिकल रह के बढ़िया उपज लाना हथीन ।
ढिब्री के कथा
(मरकुस 4:21-25)
16 “कवनो आदमिन ढिब्री जरा के बरतन से नई तोपा हई, आऊ खाटी के नीचे नई रखा हई, बाकि दिरखा पर रखा हई कि भीतरे आवेवोलन के इंजोत पउतई । 17 जवन कुछ अब तक छिप्पल हई, उ साफ-साफ देखतई आऊ सब के सामने देखावल जतई ।
18 इहेसे जे कुछ तोहिन सुनत हां ओकरा पर बढ़िया से धेयान लगावा । जेकिन हमर सिक्छा मानेला तइयार हथीन, ओकिन के ढेरे गेयान देवल जतई, बाकि जेकिन सुनेला नई चाहा हथीन, ओकिन से उहो लेवल जतई जेकरा ओकिन आपन समझा हथीन ।
यीसु के माई आऊ भाई
(मत्ती 12:46-50; मरकुस 3:31-35)
19 एक दिन यीसु के माई आऊ उनकर भाई उनकर भीर अलथीन, बाकि भीड़ के चलते उनकरा भीर नई जाय परलथीन । 20 तखनी एगो आदमीन यीसु से कहलई, “राउर भाई आऊ माई बहरे डीड़ी हथीन । आऊ रउवा से मिलेला खोजत हथीन ।” 21 यीसु जबाब देके ओकिन से कहलथीन, “हमर माई आऊ हमर भइवन एकिने हथीन, जे परमेस्वर के वचन सुना हथीन आऊ माना हथीन ।”
यीसु आंन्ही-तुफान के रोकलथीन
(मत्ती 8:23-27; मरकुस 4:35-41)
22 एक दिन यीसु आऊ उनकर चेलवन नाव पर चढ़लथीन, आऊ यीसु ओकिन से कहलथीन, “आवा, हमिन बड़का झील के ओह पार चला ।” त ओकिन सब नाव पर चढ़लथीन आऊ चल देलथीन । 23 बाकि जखनी नाव चलत हलई, त यीसु सुत गलथीन : तखनी बड़का झील में आंन्ही-तुफान अलई, आऊ नाव में पानी भरे लगलई आऊ ओकिन खतरा में पड़ गलथीन ।
24 ओकिन यीसु भीर जाके उनकरा चिलिया के जगउलथीन आऊ कहलथीन, “हे परभू ! हे परभू ! हमिन पानी में डूबल जात हिये ।” तखनी यीसु उठके आंन्ही-तुफान आऊ पानी के लहरा के डांटलथीन आऊ आंन्ही-तुफान रुक गलई आऊ उहां सांत हो गलई । 25 तखनी यीसु ओकिन से कहलथीन, “तोहिन के बिसवास कहां गलऊ ?” बाकि ओकिन डेरा गलथीन आऊ चकचिहा गलथीन आऊ अपनन ही में कहे लगलथीन, “इ कवन हथीन ? इ त आंन्ही-तुफान आऊ पानियो के हुकुम देवा हथीन, आऊ ओकिन उनकरा माना हथीन ?”
भूत से पकड़ल आदमीन के यीसु ठीक करत हथीन
(मत्ती 8:28-34; मरकुस 5:1-20)
26 यीसु आऊ उनकर चेलवन नाव से उतर के गिरासेनियों के इलाका में पहुंचलथीन, जे ओह पार गलील के सामने हई । 27 जखनी यीसु आरा परे उतरलथीन त उ सहर के एगो आदमीन उनकरा से भेंटलई जेकर में ढेरे भूतवन हलथीन । उ ढेरे दिन से कपड़ा नई पहिनत हलई आऊ घर में नई रहत हलई, बाकि उ गड़ात में रहत हलई ।
28 उ यीसु के देख के चिलियलई आऊ उनकरा भीर गिर के ऊंचा अवाज से कहलई, “हे परम परधान परमेस्वर के बेटा यीसु ! हमरा रउवा से का काम ? हम रउवा से बिन्ती करत हिये, हमरा डड़ नई दिहूं ।” 29 काहेकि यीसु उ दुस्ट आत्मा के उ आदमीन में से निकलेला हुकुम देवत हलथीन, इहेला कि उ ओकरा हाली-हाली पकड़त हलई । अगर अदमिनियन ओकरा सिकर आऊ हथकड़ी से बान्हत हलथीन तबो में उ बान्हल के तोड़ देवा हलई, आऊ दुस्ट आत्मा ओकरा भगा के बिरान जगह में ले जा हलई ।
30 यीसु ओकरा से पूछलथीन, “तोहर नाम का हऊ ?” तखनी उ कहलई, “सेना,” काहेकि ढेरे भूतवन ओकरा में लिटकल हलथीन । 31 ओकिन यीसु से बिन्ती करलथीन कि हमिन के अथाह गबड़ा में जायला हुकुम नई दिहूं ।
32 उहां पहाड़ पर सुवरियन के एगो बड़का गोंहड़ा चरत हलथीन, इहेसे भूतवन यीसु से बिन्ती करलथीन कि हमिन के उ गोंहड़ा में पेठा दिहूं । त यीसु भूतवन के जाय देलथीन । 33 तखनी भूतवन उ आदमीन में से निकल के सुवरियन में लिटक गलथीन आऊ उ गोंहड़ा पहाड़ पर से झपट के झील में जाके गिरलथीन आऊ डूब के मू गलथीन ।
34 जखनी सुवरियन के चरवाहवन जवन होइल हलई ओकरा देख के भाग गलथीन, आऊ अगल-बगल के सहर में आऊ हर गांव में जाके ओकर खबर देलथीन । 35 अदमिनियन जवन होइल हलई ओकरा देखेला निकललथीन, आऊ यीसु भीर आके जवन आदमीन से भूतवन निकलल हलथीन, ओकरा यीसु के गोड़वा भीर कपड़ा पेन्हले आऊ सही दिमाग में बइठल देख के डेरा गलथीन । 36 सब देखेवोलन दूसर आदमिनियनो से बतउलथीन कि भूत लिटकल उहे आदमीन कइसे ठीक हो गलई । 37 गिरासेनियों इलाका के अगल-बगल के सब अदमिनियन यीसु से बिन्ती करलथीन कि हमिन के इहां से चल जाऊं, काहेकि ओकिन ढेर डेरा गलथीन । तखनी यीसु नाव पर चड़ के लउट गलथीन । 38 जवन आदमीन में से भूतवन निकलल हलथीन उ यीसु से बिन्ती करे लगलई कि हमरा आपन संगे रहे दिहूं, बाकि यीसु ओकरा विदा कर के कहलथीन, 39 “आपन घरे घुर जो आऊ अदमिनियन से बताव कि परमेस्वर तोहर खातीर केतना बड़का-बड़का काम करले हथीन ।” फिन उ जाके सब सहर में यीसु ओकरा खातिर केतना बड़का-बड़का काम करले हथीन, ओकर बारे में बतावे लगलई ।
बिसवास के देख के यीसु बढ़िया करत हथीन
(मत्ती 9:18-26; मरकुस 5:21-43)
40 जखनी यीसु लउटलथीन त अदमिनियन उनकरा खुसी संगे मिललथीन, काहेकि ओकिन सब उनकरा आसरा देखत हलथीन । 41 उहां याइर नाम के एगो आदमीन हलई, जवन यहूदी धरम सभा घर के मुखिया हलई । उ आके यीसु के गोड़वा परे गिर के उनकरा से बिन्ती करे लगलई कि हमर घरे चलूं, 42 काहेकि ओकरा बारह साल के एकेगो बेटी हलई, उ मूवे पर हलई । जखनी यीसु जात हलथीन, तखनी बड़का भीड़ उनकरा जांतत हलथीन । 43 उ भीड़ में अइसही एगो अउरत हलई जेकरा बारह साल से लहु बहे के रोग हलई । उ आपन सब धन बइदवन के पीछे गवा देलई, तबो में केकरो हाथ से ठीक नई होलई । 44 उ पीछे से आके यीसु के कपड़ा के आचरा के छुलई, आऊ तूरतिये ओकरा लहु बहेला बन हो गलई ।b
45 यीसु पूछलथीन, “हमरा कवन छुलई ?” जखनी सब पिछड़े लगलथीन, तखनी पतरस यीसु से कहलई, “हे गुरुजी, रउवा त भीड़ में चिपात हिये आऊ राउर पर केतना गिरत-पड़त हथीन ।” 46 बाकि यीसु कहलथीन, “कवनो हमरा छुइले हई, काहेकि हम जान गलियऊ कि हमर में से चंगाई देवेला सक्ती निकलल हई ।” 47 जखनी उहे अउरत देखलई कि ‘हम लुकाइल नई पारब‘, त कापते अलई आऊ उनकर गोड़वा परे गिर के सब अदमिनियन के सामने कहे लगलई कि ‘उ काहेला यीसु के छुलई आऊ कइसे तुरतिये ठीक हो गलई । 48 यीसु ओकरा से कहलथीन, “बेटी तोहर बिसवास तोहरा ठीक कइले हऊ, सांति से चल जो ।”
49 जखनी यीसु अइसन कहते हलथीन, उहे धरी धरम सभा के मुखिया याइर के घरे से एगो आके कहलई, “तोहर बेटी मू गइल हऊ : अब गुरुजी के परेसान करे के जरूरी नखई ।”
50 बाकि यीसु इ सुनके धरम सभा के मुखिया से कहलथीन, “नई डेरो; खाली बिसवास कर, त तोहर बेटी बच जतई ।”
51 जखनी यीसु उ मुखिया घरे अलथीन, त उ आपन संगे पतरस, यूहन्ना, याकूब आऊ लइकी के माई-बाप के छोड़ के आऊ केकरो आपन संगे भीतरे नई आवे देलथीन । 52 सब अदमिनियन लइकी खातिर करेजा पीट-पीट के रोवत हलथीन, बाकि यीसु कहलथीन, “तोहिन नई रोवा, इ मूवल नखई बाकि सुतत हई ।”
53 बाकि ओकिन यीसु के बतिया सुन के उनकरा मजाक उड़ावे लगलथीन, काहेकि ओकिन इ जानलथीन कि इ लइकी मू गइल हई । 54 फिन यीसु लइकी के हाथ धरलथीन, आऊ जोर से कहलथीन, “हे मंइया उठ जो !” 55 तखनिये लइकी के जीव फिन घूरलई, आऊ उ तुरती उठ के बइठ गलई, फिन यीसु माई-बाप से कहलथीन कि एकरा कुछ खायला दा । 56 एकरा परे लइकी के माई-बाप चकचिहा गलथीन, बाकि यीसु ओकिन से बतउलथीन कि इहां जे कुछ होइल हई उ सब केकरो से नई कहिहा ।