रोमी सुबेदार के बिसवास
(मत्ती 8:5-13)
7
1 जखनी यीसु लोगन से इ सब बतिया के सिखा लेलथीन, त कफरनहूम गांव में अलथीन । 2 उहां रोमी सेना के सुबेदार के एगो नउकर बिमारी से मरे पर हलई, जवन उ सुबेदार के दुलरुवा हलई । 3 उ सुबेदार यीसु के बारे में सुन के यहूदियन के कइगो नेतवन के यीसु से इ बिन्ती करेला उनकर भीरा पेठउलई कि उ आके ओकर नउकर के जीव बचउतथीन । 4 उ सब नेतवन यीसु भीर अलथीन, आऊ उनकरा से ढेरे बिन्ती कर के कहे लगलथीन, “सुबेदार इ लायक हई कि राउवा ओकर खातिर इ करबहीं, 5 काहेकि उ हमिन के जाति से परेम रखा हई, आऊ उहे हमिन के धरम सभा घर के बनवउले हई ।”6 यीसु ओकिन संगे गलथीन, बाकि जखनी यीसु घरवा के भीरीये हलथीन, त उ सुबेदार उनकरा भीर कइगो साथिवन के इ कहेला पेठउलई, “हे परभु, घरे आवेला तकलिफ नई उठावहीं, काहेकि हम इ लायक नइखी कि रउवा हमर घर के भीतरे अइबहीं । 7 इहे चलते हम अपने आप के इ लाइक भी नई समझली कि रउरा भीर अबई, बाकि खाली आपन मूंह से कह देऊं त हमर नउकर ठीक हो जतई । 8 हमहू कवनो के बस में काम करा हियई, आऊ हमर बस में भी कुछ सिपाहियन हथीन, आऊ जखनी हम एगो के कहा हीं, ‘जो,’ त उ जा हई; आऊ दुसरका से कहा हीं, ‘आ,’ त उ आवा हई; आऊ जखनी कवनो नउकर से कहा हीं, ‘इ कर‘ त उ उहे करा हई ।”
9 इ सुन के यीसु के अचम्भा होलई आऊ उ मूंह फेर के उ भीड़ से कहलथीन जे उनकरा पाछे आवत हलथीन, “हम तोहिन से कहत हिवा कि हम इ गेइर-यहूदी आदमीन में जे बिसवास देखली उ बिसवास हम इस्राएल में भी नई देखलियई ।” 10 फिन पेठावल लोगन घरे घुर के उ बिमरिया नउकर के एकदम ठीक देखलथीन ।
परभु यीसु एगो मसोमात के बेटा के जियउले हथीन
11 एकर बाद तुरती यीसु आपन चेलवन के संगे नाइन नाम के एगो सहर में जाय लगलथीन । उनकरा साथे ढेरे भीड़ भी जात हलथीन । 12 जखनी उ सहर के दुहारी भीरा पहूँचलथीन, त लोगन एगो मूवल के गाड़ेला बहरे ले जात हलथीन; उ आपन माई के एकेगो बेटा हलई, आऊ उ मसोमात हलई; आऊ सहर के ढेरे भीड़ उ मसोमात के साथे हलथीन । 13 जखनी परभु ओकरा देखलथीन त उनकरा बड़ी मोह लगलई, आऊ ओकरा से कहलथीन, “नई रो ।” 14 तखनी यीसु मूवलका भीर आके रन्थी के छुलथीन, आऊ मूवलका के टांगेवोलन रुक गलथीन । फिन यीसु कहलथीन, “हे सेयान, हम तोहरा से कहत हियऊ, उठ जो !” 15 फिन उ मूवलका उठ के बइठ गलई, आऊ बोले लगलई । यीसु ओकरा ओकर माई के सोंप देलथीन ।
16 एकरा से सब अदमिनियन ढेर डेरा गलथीन, आऊ ओकिन परमेस्वर के बढ़ाई कर के कहे लगलथीन, “हमीन के बीच में परमेस्वर देने से बोलेवोला एगो बड़हन आदमीन उठल हथीन, आऊ परमेस्वर आपन लोगन के मदत करे आइल हथीन ।” 17 आऊ यीसु के बारे में इ बतिया पूरा यहूदिया इलाका आऊ अगल-बगल के सब इलाका में फइल गलई ।
18 यूहन्ना बपतिस्मा देवेवोला के चेलवन, जे कुछ यीसु करलथीन ओकर बारे में यूहन्ना से बतउलथीन । 19 तखनी यूहन्ना आपन दूगो चेलवन के परभु भीर इ पूछेला पेठउलई, “का रउवा उहे मसीह हिये जेकर हमिन आसरा देखत हियई, चाहे हमिन कोनो आऊ के आसरा देखबई ? ”
20 जखनी पेठावल चेलवन यीसु भीर आके कहलथीन, बपतिस्मा देवेवोला यूहन्ना हमिन के राउर भीर इ पूछेला पेठउले हथीन कि ‘जवन मसीह के हमिन आसरा देखत हियई, का रउवा उहे हिये, चाहे हमिन कोनो आऊ के असरा देखबई ?
21 उहे घरी यीसु ढेरे बिमरियन के आऊ पीड़ा में पड़ल, आऊ दुस्ट आत्मवन से पकड़ल अदमिनियन के छोड़उलथीन; आऊ ढेरे आन्हर के आंख देलथीन; 22 फिन यीसु ओकिन से कहलथीन, “जे कुछ तोहिन देखले आऊ सुनले हां, जाके यूहन्ना से कह दिहां, कि आन्हर देखत हथीन, लंगड़वन चलत-फिरत हथीन, कोढ़ी ठीक करल जा हथीन, बहिरन सुनत हथीन, मूवल जियावल जा हथीन, आऊ गरीबकन के बढ़िया खबर सुनावल जा हई । 23 धन्य हई उ जे बिसवास करा हई कि हम मसीह हियई ।”
24 जखनी यूहन्ना के पेठावल चेलवन चल गलथीन त यीसु यूहन्ना के बारे में लोगन से कहे लगलथीन, “तोहिन बिरान जगह में का देखे गइल हले ? का हवा से हिलत बखार के जइसन कमजोर आदमीन के ? 25 त फीन तोहिन का देखे गइल हले ? का मोलायम कपड़ा पेन्हल आदमीन के ? देखा, जे चमकेवोला कपड़ा पेन्हले आऊ सुख-अराम से रहा हथीन, ओकिन बिरान जगह में नई, बाकि राजमहल में रहा हथीन । 26 त फिर का देखे गइल हले ? का परमेस्वर देने से बोलेवोला कवनो आदमीन के ? ठीक, हम तोहिन से कहत हियऊ, जेकरा तोहिन देखले हां उ कोनो परमेस्वर देने से बोलेवोला से भी बड़का हथीन । 27 इ उहे हई जेकर बारे में पबितर किताब में लिखल हई :
‘देख, हम आपन दूत के तोहर अगाड़ी-अगाड़ी पेठावा हियऊ,
जे तोहर अगाड़ी रास्ता तइयार करतई ।’
28 हम तोहिन से कहत हियऊ कि जेकिन अभी तक जन्म लेले हथीन, ओकिन में से यूहन्ना से बड़का कवनो नखई : बाकि जे परमेस्वर के राज में छोठन से छोठन हई, उ यूहन्ना से बड़का हई ।”
29 सब सधारन अदमिनियन आऊ कर लेवेवालनो यीसु के इ बतिया सुन के यूहन्ना के बपतिस्मा लेके इ मानलथीन कि परमेस्वर के रास्ता सच्च हई । 30 बाकि फरीसी लोगन आऊ नियम के गुरुयन यूहन्ना के बपतिस्मा नई लेके आपन जिन्गी के बारे में परमेस्वर के योजना के इनकार कर देलथीन ।
31 यीसु फिन कहलथीन, “हम इ जुग के लोगन केa तूलना केकरा से करबई कि ओकिन केकर जइसन हथीन ? 32 ओकिन उ लइकवन के जइसन हथीन जे बजार में बइठ के आपन साथिवन से चिलिया के कहत हथीन, हमिन तोहिन खातिर बसुरी बजइलिवा, बाकि तोहिन नई नाचले; हमिन ढेरे दुख में छाती पीट-पीट के बिलाप कलियई, बाकि तोहिन नई रोइले !b”
33 काहेकि बपतिस्मा देवेवोला यूहन्ना कहियो अंगूर के रस नई पीलईc, आऊ उ बरबरे उपास रहा हलई । बाकि तोहिन कहा हां, ‘ओकर में दुस्टात्मा हई ।’ 34 'आदमीन के बेटा' खइते-पीते आइल हियई, आऊ तोहिन कहा हां, ‘उ खाधू आऊ पियाक्कड़ आदमीन हई, आऊ कर लेवेवोलन के, आऊ दूसर पपियन के साथी हई ।’ 35 बाकि जे परमेस्वर के गेयान के मोताबिक चला हई, ओकिन के जिन्गी के बदलाव से उ गेयान सच्च ठहरावल जा हई ।d”
यीसु एगो बेबिचारी अउरत के पाप छेमा कलथीन
36 एक फरीसी आदमीन यीसु से ओकर साथे खाना खाएला बिन्ती करलई, यीसू उ फरीसी के घरे जाके खाना खाएला बइठलथीन । 37 उहे सहर में एगो बेबिचारी अउरत हलई । उ इ जानलई कि यीसु उ फरीसी आदमीन के घरे खाना खाएला बइठल हथीन, उ संगमरमरe के सुराही में इतर लनलई, 38 आऊ रोवत-रोवत उनकर गोड़ भीर डीड़ी होलई । आऊ गोड़ के लोर से भिंजावे आऊ आपन झोंटा से पोछे लगलई, आऊ उनकर गोड़ बेर-बेर चूम के उनकरा पर इतर लगउलई ।
39 इ देख के उ फरीसी जे यीसु के नेवता देले हलई, उ आपन मन में सोचे लगलई, “आगर इ अगमजानी रहतियई त जान जइतियई कि इ जे उनकरा छुवत हई, उ कवन आऊ कइसन अउरत हई, काहेकि उ त बेबिचारी अउरत हई ।”
40 एकरा पर यीसु ओकरा जबाब देके कहलथीन, “हे समोन, हमरा तोहरा से कुछ कहेला हई ।” समोन बोललई, “हे गुरु, कहूं ।” 41 यीसु कहलथीन, “कवनो महाजन के दूगो करजखउक हलथीन, एगो के पांच-सउ दिनारf आऊ दूसरका पचास दिनार के करजखउक हलथीन । 42 जखनी ओकिन दूनो भीर लउटावेला कुछ नई हलई, त महाजन दूनो के छेमा कर देलई । इहेसे ओकिन दूनो में से कवन महाजन से जादे परेम करतई ?”
43 तखनी उ फरीसी समोन उनकरा जबाब देलई, “हमर समझ में उ, जेकरा महाजन जादे छोड़ देलई ।” यीसु ओकरा से कहलथीन, “तू ठीक कहले ।” 44 फिन यीसु उ अउरत देने घुर के समोन से कहलथीन, “का तू इ अउरत के देखत हहीं ? हम तोहर घरे अइली बाकि तू हमर गोड़ धोवेला पनियो नई देले, बाकि इ अउरत हमर गोड़ लोर से भिंजउलई आऊ आपन झोंटा से पोछलईg । 45 तू हमरा चुमा नई देलेh, बाकि जखनी से हम आइल ही तखनीये से इ अउरत हमर गोड़ के चुमा करेला नई छोड़लई । 46 तू हमर कपार पर तेल नई लगउले, बाकि इ हमर गोड़ पर इतर लगउले हई ।
47 इहेसे हम तोहरा से कहत हियऊ कि इ अउरत के ढेरे पाप छेमा होलई, इहेला इ अउरत ढेरे परेम करलई; बाकि जेकरा तनिसा छेमा होइल हई, उ तनिसा परेम करा हई ।” 48 फिन यीसु अउरत से कहलथीन, “तोहर पाप छेमा होलऊ ।”
49 तखनी जे लोगन उनकर साथे खाना खाएला बइठल हलथीन, ओकिन आपन-आपन मन में सोचे लगलथीन, “इ के हथीन जे पाप के भी छेमा करा हथीन ?”
50 बाकि यीसु अउरत से कहलथीन, “तोहर बिसवास तोहरा बचा लेलऊ, खुसी से चल जो ।”