पहिलका चेमवन के बुलाहट
5
1 एक दिन जखनी यीसु गन्नेसरत के झील के आरा पर डीड़ी होके परचार करत हलथीन, तखनी परमेस्वर के वचन सुनेला भीड़ के भीड़ यीसु पर गिरत-पड़त हलथीन । 2 तखनी यीसु झील के आरा पर दूगो नउवन खूटल देखलथीन, आऊ मलहवन नउवन पर से उतर के जाल धोवत हलथीन । 3 यीसु उ सब नउवन में से एगो नाव में चढ़ गलथीन, उ नाव समोन के हलई, आऊ उ समोन से कहलथीन कि उ नाव के आरा से तनिसुन हटा के दूर पानी में ले चला । फिन यीसु नाव पर बइठ के लोगन के सिक्छा देवे लगलथीन ।4 जखनी यीसु सिक्छा देवेला सिरा देलथीन, त समोन से कहलथीन, “नाव के दह में ले चला, आऊ मछरियन मारेला आपन जाल डाला ।”
5 समोन उनकरा जबाब देलई, “हे मालिक, हमिन रात भर मेहनत करली, बाकि कुछु नई पकड़ली; तबो में राउर कहे से जाल डालब ।” 6 जखनी ओकिन अइसन करलथीन, त ढेरे मछरियन जाल में बाझ गलथीन, आऊ ओकिन के जाल फाटे लगलई । 7 एकरा पर ओकिन आपन साथिवन के जेकिन दूसर नाव पर हलथीन, इसारा करलथीन कि ‘तोहिन आके हमिन के मदत करा,’ आऊ ओकिन आके दूनो नउवन डूबे तक भर लेलथीन, आऊ ओकिन सब डूबे लगलथीन ।
8 इ देख के समोन पतरस यीसु के गोड़ पर गिर के कहलई, “हे परभु, हमर भीर से चल जाऊं, काहेकि हम पापी आदमीन हीये !”a 9 काहेकि एतना मछरियन के बाझे से समोन पतरस आऊ ओकर सब साथिवन ढेरे हइरान होलथीन, 10 आऊ ओइसही जब्दी के बेटा याकूब आऊ यूहन्ना भी हइरान होलथीन, जेकिन समोन के मदतदारी हलथीन ।
तखनी यीसु समोन से कहलथीन, “मत डेरो; अबही से तू अदमिनियन के हमरा भीर लनबे ।” 11 आऊ ओकिन नउवन के आरा पर ले आनलथीन, आऊ सब कुछ छोड़ के यीसु के चेलवन बन के पाछे हो लेलथीन ।
एगो कोढ़ी आदमीन के यीसु ठीक करत हथीन
12 जखनी यीसु एगो सहर में हलथीन, त उहां कोढ़ से भरल एगो आदमीन अलई । आऊ उ यीसु के देख के मूंह के भरे गिर गलई, आऊ बिन्ती करलई, “हे परभु, अगर रउवा चाहब, त हमरा सुध कर सका हिये ।”
13 यीसु हाथ बढ़ा के ओकरा छुलथीन आऊ कहलथीन, “हम चाहत हियऊ कि तू सुध हो जो ।” आऊ ओकर कोढ़ तुरतिये ठीक हो गलई ।b 14 तखनी यीसु ओकरा हुकुम देलथीन, “केकरो से मत कहिहेंc, बाकि जाके अपने आप के याजक के देखइहें, आऊ अपने सुध होवे के बारे में परमेस्वर देने से बोलेवोला मूसा जे कुछ चढ़ावेला हुकुम देले हलई, उ चढ़इहें, ताकि अदमिनियन जानतथीन कि तू ठीक हो गइल हें ।”
15 बाकि यीसु के साम्रथ के चर्चा आऊ फइल गलई, आऊ भीड़ के भीड़ उनकरा सुनेला आऊ आपन बिमारी से ठीक होवेला जमा होवत हलथीन । 16 बाकि यीसु ओकिन से अलगे जाके बिरान जगह में पराथना करल करा हलथीन ।
लकवा के बिमारी के यीसु ठीक करत हथीन
17 एक दिन यीसु सिक्छा देवत हलथीन, फरीसी लोगन आऊ नियम के गुरुयन उहां बइठल हलथीन । ओकिन सब गलील इलाका आऊ यहूदीया इलाका के हर एक गांव से, आऊ यरूसलेम सहर से आइल हलथीन, परभु के चंगा करे के साम्रथ उनकर साथे हलई ।
18 उहे घरी कुछ लोगन एगो लकवा के बिमरिहा के खटिया परे लनलथीन, आऊ ओकिन ओकरा भीतरे ले जायेला आऊ यीसु के सामने रखेला उपाय खोजत हलथीन । 19 बाकि भीड़ के चलते ओकिन ओकरा भीतरे नई लेगे सकलथीन । तखनी ओकिन छप्पर पर चढ़ के आऊ खापड़ा हटा के ओकरा खटिया साथे लोगन के बीचे में यीसु के सामने उतार देलथीन । 20 यीसु ओकिन के बिसवास के देख के ओकरा से कहलथीन, “हे भाई, तोहर पाप छेमा होलई ।”
21 तखनी नियम के गुरुयन आऊ फरीसी लोगन बहस करे लगलथीन, “इ कवन हई जे अपने आप के परमेस्वर समझ के उनकरा निन्दा करत हई ? परमेस्वर के छोड़ के केकरो पाप के छेमा नई कर सका हई ?”
22 यीसु समझलथीन कि ओकिन का सोचत हथीन, त उ ओकिन से पूछलथीन, “तोहिन आपन मन में अइसन कहे सोचत हां ? 23 का कहेला असान हई ? ‘तोहर पाप छेमा होलई चाहे उठ आऊ चल फिर’d ? 24 बाकि इहेला कि तोहिन जान ला कि हम, 'आदमीन के बेटा' के धरती पर पाप छेमा करे के भी अधिकार हई ।” - यीसु उ लकवा के बिमरिहा से कहलथीन, “हम तोहरा से कहत हियऊ, उठ आऊ आपन खटिया उठा के आपन घरे चल जो ।”
25 तुरतीये उ ओकिन के सामने उठ के डीड़ी होलई, आऊ जवन खटिया पर उ पड़ल हलई, ओकरा उठा के परमेस्वर के बड़ाई करत आपन घरे चल गलई । 26 तखनी सब चकचिहा गलथीन, आऊ परमेस्वर के बड़ाई करे लगलथीन, आऊ ढेर डेरा के कहे लगलथीन, “आज हमिन गजब के बात देखले हियई !”
यीसु लेवी के आपन पाछे आवेला बुलावत हथीन
(मत्ती 9:9:13; मरकुस 2:13-17)
27 एकर बाद यीसु बहरी गलथीन आऊ लेवी नाम के एगो कर लेवेवोला आपन कर लेवे के जगहिया में बइठल देखलथीन, आऊ यीसु ओकरा से कहलथीन, “हमर चेला बन जो ।” 28 तखनी लेवी आपन सब कुछ छोड़ के उनकर चेला बन गलई ।
29 फिन लेवी यीसु के इजत देवेला आपन घरे एगो बड़का भोज देलई, आऊ कर लेवेवोलन आऊ दूसर मेहमनवन के एगो बड़का भीड़ उनकर साथे खायेला बइठल हलथीन । 30 फरीसी लोगन आऊ नियम के गुरुयन यीसु के चेलवन से इ कह के सिकायत करे लगलथीन, “तोहिन कर लेवेवोलन आऊ दूसर पापियन के साथे काहे खात-पीयत हहीं ?”
31 यीसु ओकिन के जबाब देलथीन, भला-चंगा लोगन के बइद के जरूरी नखई, बाकि बिमरियन के जरुरी हई । 32 हम जेकिन अपने आप के परमेस्वर के नजर में बेकसूर समझत हथीन, ओकिन खातिर नई, बाकि पापीयन के पाप छोड़ के परमेस्वर देने मुड़वावे खातिर आइल हियऊ ।”
उपास के बारे में चर्चा
(मत्ती 9:14-17;मरकुस 2:18-22)
33 धरम के नेतवन यीसु से कहलथीन, “यूहन्ना के चेलवन त बरबरे उपास रख के पराथना करल करा हथीन, आऊ ओइसही फरीसी लोगन के चेलवनो करा हथीन, बाकि रउर चेलवन त खात-पीयत हथीन ।”
34 यीसु ओकिन से कहलथीन, “जब तकला बरबाबू बरतियन साथे रहतई, का तोहिन ओकिन से उपास करवा सकत हहीं ? 35 बाकि अइसन दिन अतई, जेकर में बरबाबू ओकिन से अलगे करल जतई, उहे घरी ओकिन उपास करतथीन ।”
36 फिन यीसु एगो आऊ उदाहरन देके ओकिन से कहलथीन : “कवनो आदमीन नाया कपड़ा में से फार के पुरान कपड़ा में पेवन नई लगावा हई, नई त नाया कपड़ा फाट जतई, आऊ उ पेवन पुरान कपड़ा में मेल नई खतई ।