सइतान के चलते यीसु के परलोभन
4
1 यीसु पबितर आत्मा से भरपूर होके, यरदन नदी से घुर के अलथीन । उहे घरी पबितर आत्मा उनकरा बिरान जगह में ले गलथीन । 2 उहां सइतान यीसु के चालीस दिन तक परलोभन देवते हलई । उ चालिस दिन तक यीसु कुछ नई खलथीन, जखनी ओतना दिन पुरलई, तखनी उनकरा भुख लगलई । 3 तखनी सइतान यीसु से कहलई, “अगर तू सचमुच में परमेस्वर के बेटा हहीं, त इ पखल से कहिहां कि रोटी बन जाई ।”4 बाकि यीसु सइतान के जबाब देलथीन, “नई, काहेकि पबितर किताब में लिखल हई: ‘आदमीन खाली रोटी से जिन्दा नई रहतई’ ।”
5 फिन सइतान उनकरा एगो ऊंच जगह में ले गलई, आऊ एके झपकी में उनकरा दुनिया के सब राज देखउलई, 6 आऊ यीसु से कहलई, “हम इ सब अधिकार, आऊ एकर महिमा तोहरा दे देबऊ, काहेकि उ हमरा सोपल गइल हई, आऊ हम जेकरा चाहलियई, ओकरा दे देवलियई । 7 इहे से अगर तू हमरा गोड़ लाग के परणाम करबे, त इ सब तोहर हो जतऊ ।”
8 यीसु ओकरा जबाब देलथीन, “पबितर किताब में अइसन लिखल हई:
‘तू आपन परमेस्वर परभु के परणाम कर,
आऊ खाली उनकरे सेवा कर’ ।”
9 तखनी सइतान यीसु के यरुसलेम में ले जाके मंदिर के सब से ऊपुरे दती पर डीड़ी करलई, आऊ उनकरा से कहलई, “अगर जे तू सचमुच में परमेस्वर के बेटा हहीं, त इहां से नीचे तड़क जो । 10 काहेकि पबितर किताब में अइसन लिखल हई:
‘परमेसर तोहर बारे में आपन सरगदूतवन के हुकुम देतथीन,
कि ओकिन तोहरा रक्छा करतथीन,’
11 आऊ ओकिन तोहरा हाथे-हाथ उठा लेतथीन,
ताकि अइसन नई होखे कि तोहर गोड़ में पखल से ठेस लग जाई’ ।”
12 यीसु ओकरा जबाब देलथीन, “पबितर किताब में इहो लिखल हई, ‘तू आपन परमेस्वर परभु के परलोभन नई करिहें’ ।”
13 जखनी सइतान यीसु के सब परलोभन कर लेलई, तखनी उ अगले मोका के तलास में यीसु भीर से चल गलई ।
नासरत में यीसु के मंजूर नई कइल गलई
14 फिन यीसु पबितर आत्मा के सामरथ से भरपूर होके गलील इलाका में लउट अलथीन, आऊ उनकर चरचा अगल-बगल के सब इलाका में फइल गलई । 15 उ ओकिन के यहूदी धरम सभा के घर में सिखावा हलथीन, आऊ सब उनकरा बड़ाई करा हलथीन ।
16 फिन यीसु नासरत गांव में अलथीन, जहां उनकरा पालल-पोसल होइल हलई, आऊ हरमेसा जइसन पबितर दिन धरम सभा में जाके पबितर किताब से पढ़ेला डीड़ी होलथीन । 17 तखनी उनकरा परमेस्वर देने से बोलेवोला यसायाह के किताब देवल गलई, आऊ उ किताब खोल के उ भाग निकलथीन जहां अइसन लिखल हलई:
18 ‘‘परभु के आत्मा हमर पर हई,
इहेसे कि गरीबकन के बढ़िया खबर सुनावेला उ हमरा चुन के अलगे कइले हथीन,
आऊ हमरा इहेला पेठउले हथीन कि गुलामियनa के छोड़ावेला
आऊ आन्हरन के अंखिया देवेला बढ़िया खबर परचार करबई,
आऊ दुखित-पीड़ित के छोड़ाबई,
19 आऊ परभु के दया मिले के साल के हकवा करबई ।
20 फिन उहे किताब मून के सेवक के हाथ में देके बइठ गलथीन । आऊ धरम सभा के सब अदमिनियन के आंखियन यीसु पर लागल हलई । 21 तखनी यीसु ओकिन से कहे लगलथीन, “आझे इ लिखल वचन तोहिन के नजर में पुरा होलई ।
22 उहां के सब अदमिनियन उनकरा बड़ाई करलथीन, आऊ दया से भरल बतिया जे यीसु के मुह से निकलल हलई, ओकरा से हइरान होलथीन, आऊ कहे लगलथीन, “का इ यूसुफ के बेटा नखई ?”
23 तखनी यीसु ओकिन से कहलथीन, “तोहिन हमरा इ कहावत जरुर कहबा कि ‘हे बइद, अपने आप के ठीक कर ! जवन कुछ हमिन सुनले हियई कि कफरनहूम गांव में तू कइले हें, ओकरा इहां आपनो गांव में कर’ ।’’ 24 बाकि सच त इ हई कि कवनो परमेस्वर देने से बोलेवोला के आपन गांव में आदर-मान नई मिला हई । 25 परमेस्वर देने से बोलेवोला एलियाह के दिनवा में, जखनी साढ़े तीन साल तक पानी नई बरसलई, आऊ सब इलाकवन में बड़का अकाल पड़लई, त इसराएल देस में ढेरे मसोमात हलथीन । 26 बाकि एलियाह ओकिन में से केकरो भीर नई भेजल गलई, खाली सइदा परखंड़ के सारफत गांव में एगो मसोमात भीर भेजल गलई । 27 आऊ परमेस्वर देने से बोलेवोला एलीसा के समय में इसराएल देस में ढेरे कोढ़ीयन हलथीन, बाकि सीरिया देस के एगो आदमीन नामान के छोड़ के ओकिन में से केकरो सुध नई करल गलई ।”
28 इ बतिया सुनते भर में जेतना धरम सभा में हलथीन, सब गोसा से भर गलथीनb, 29 आऊ उठ के यीसु के बहरी निकाललथीन, आऊ जवन पहाड़ पर ओकिन के सहर बसल हलई, उ पहाड़ के ऊपरे यीसु के ले गलथीन, आऊ उहां से नीचे गिरा के मुवावेला सोचलथीन । 30 बाकि यीसु ओकिन के बीच में से निकल के चल गलथीन ।
यीसु दुस्ट आत्मा के निकालत हथीन
31 फिन यीसु गलील इलाका के कफरनहूम गांव में गलथीन, आऊ पबितर दिन में अदमिनियन के सिक्छा देवत हलथीन । 32 ओकिन यीसु के सिक्छा से चकचिहा गलथीन, काहेकि उ अधिकार के साथे बतियात हलथीन ।
33 एक दिन जखनी यीसु धरम सभा में हलथीन, तखनी एगो आदमीन, जेकरा में असुध आत्मा हलई, उ जोर-जोर से चिलिया के कहलई, 34 “हे नासरत गांव के यीसु, हमिन के रउवा से कोई काम नइखे । का रउवा हमिन के नास करे आइल हीं ? हम रउवा के जाना हिवा कि रउवा कवन हिये ? रउवा परमेस्वर से भेजल पबितर आदमीन हिये !”
35 यीसु ओकरा डांट के बोललथीन, “चुप रह, आऊ ओकरा में से निकल जो !” तखनी असुध आत्मा ओकरा सब के बीच में पटक के, बिना हानी कइले ओकरा में से निकल गलई ।
36 अदमिनियन अचम्भा होके अपननही में कहे लगलथीन, “इ का बात हई ? उ सामरथ आऊ आधिकार साथे असुध आत्मवनो के हुकुम देवत हथीन, आऊ ओकिन हुकुम माना हथीन आऊ निकल जा हथीन ।” 37 यीसु जे कुछ करलथीन ओकर चरचा चट-पट चारु भर फइल गलई ।
यीसु ढेरे अदमिनियन के ठीक करत हथीन
38 उहे दिन यीसु धरम सभा से निकल अइला के बाद समोन के घरे गलथीन । उहां समोन के सास के बड़ी जोर से बोखार लागल हलई, ओकिन यीसु से बिन्ती करलथीन कि इनकरा ठीक कर दिहूं ।” 39 यीसु उनकर भीरा डीड़ी होके बड़ी जोर बोखार के डाटलथीन, आऊ बड़ी जोर बोखार छुट गलई, आऊ उ तुरती उठके उनकरा सेवा-टहल करे लगलई ।
40 बेर डूबे घरीc, अदमीनयन उइसन लोगन के जवन किसिम-किसिम के बिमार में पड़ल हलथीन, ओकिन सब के यीसु भीरा लेके अलथीन, आऊ उ एकहगो परे हाथ रख के ओकिन के ठीक करत हलथीन । 41 आऊ कुछ अदमिनियन में भूतवन हलथीन, उ सब उनकर हुकुम सुन के निकल जात हलथीन, आऊ चिलिया के कहत हलथीन, “रउवा परमेस्वर के बेटा हिये ।” यीसु ओकिन के डाटलथीन आऊ बोले नई देवत हलथीन, काहेकि ओकिन जानत हलथीन कि उ मसीहd हथीन ।
42 जखनी दूसरका दिन बिहान होलई, त यीसु निकल के एगो बिरान जगह में गलथीन, आऊ भीड़ के भीड़ उनकरा खोजत-खोजत उनकरा भीर अलई, आऊ उनकरा रोक के कहे लगलथीन कि हमिन भीर से नई जाऊं । 43 बाकि यीसु ओकिन से कहलथीन, “हमरा दूसर-दूसर सहरो में परमेस्वर के राज के बढ़िया खबर सुनावेला जरुरी हई, काहेकि हमरा इहेला पेठावल गइल हई ।” 44 आऊ उ गलीलe इलाका के धरम सभवन में परचार करत हलथीन।