Pu'a nɛ Dragon la yɛla
12
1 Ka zanbin tita'ar linɛ an bʋnnyalʋŋ nie arezana ni:
ka pu'a bɛɛ anina,
ka o fuug an winnig,
ka nwadig bɛɛ o nɔba teŋirin.
Ka na'am zupibis linɛ an nwadbibis pii nɛ ayi' bɛɛ o zugin.
2 Ka o mɔr pʋʋg ka bɔɔd du'am ka li zabid o ka o kaasid hali.
3 Ka bʋnyuatita'ar nie arezana ni ya'as.
Li daa anɛ awa'abɛ'og tita'ar zɛn'ug,
ka o mɔr zuta ayɔpɔi nɛ iila piiga.
Ka pid na'am zupibisi o zut la wʋsa ni.
4 Ka nwadbibis pʋdig zin'is atan' ka wa'abɛ'og tita'ar la ʋk o zʋʋri da'ae pʋdigir yinne yis saŋgbauŋin bas dunia ni na.
Ka o zi'e pu'a onɛ bɔɔd du'am la tuonnɛ gur ye pu'a la du'a ka o ɔnb biig la.
5 Ka pu'a la du'a biribiŋ onɛ na sʋ'oe buudi wʋsa nɛ paŋ ka nyaŋi ba nɛ kʋnt dansaar.
Ka ba zɛ biig la mɔr o keŋ Wina'am nɛ o na'am gbauŋ la tuon.
6 Ka pu'a la zɔɔ keŋ mɔɔgin.
Anina ka Wina'am maal zin'igi digil pu'a la,
zin'ikanɛ ka ba na gɔs o dabisa tusir nɛ kɔbisyi' nɛ pisyuobʋ.
7 Ka zaba kɔ' arezana ni.
Ka maliak kpɛɛm Maikel nɛ o maliaknam la zab nɛ wa'abɛ'og tita'ar la,
ka on mɛ la'as o nya'andɔlibi zabid nɛ Maikel.
8 Ka ba nyaŋ wa'abɛ'og tita'ar la nɛ o nya'andɔlib la,
ka ba lɛn ka' suori na bɛ arezana ni ya'asɛ.
9 Ba da lɔb wa'abɛ'og tita'ar onɛ da bɛ kʋdimin sa ka o yʋ'ʋr buon kikiris na'ab bɛɛ Sʋntaana ka ma'ad dunia kpɛn'ɛsid mɔɔg bas dunia ni na.
On nɛ o maliaknam wʋsa ka ba da lɔbi bas dunia ni na.
10 Ka m wʋm kʋkɔtita'ar arezana ni ka li yɛl ye,
“Nannanna ti Wina'am faangir nɛ o paŋ
nɛ o na'am la nɛ o Kristo la paŋ mɛ paae na,
bɔzugɔ ba nɔk onɛ gbi'idi ti ba'abiis
Wina'am tuon nintaŋ nɛ yʋ'ʋŋ la
lɔbi yis arezana ni.
11 Ka ba nɔk Pɛbil la ziim
nɛ labaar kanɛ ka ba mɔɔn nɛ sida la
zabi nyaŋ o,
ka pʋ zɔ dabiem nɛ kum
ka lɛb nya'aŋi ba nyɔvʋr yɛlaa.
12 Dinzugɔ,
arezana maalim sumalisim
nɛ banɛ wʋsa bɛɛ anina la.
Amaa sʋnsa'aŋ na bɛ teŋgbauŋ nɛ atɛukʋn,
bɔzugɔ Sʋntaana sigi ba ni na.
Ka o sʋnf pɛlig hali
on mi' ye o saŋa kpɛlim nɛ bi'ela la zug.”
13 Ka wa'abɛ'og tita'ar la baŋ ye ba nɔk o lɔbi bas dunia ni na la,
ka o kad pu'a kanɛ du'a biig la ye o gban'e o.
14 Ka ba daa tis pu'a la niiŋ tita'ar kpʋkpama ayi' ye o ianki keŋ mɔɔgin,
zin'ikanɛ ka ba maal o yɛla ka na gur o yʋma atan' nɛ pʋsʋk ka waaf la kʋ nyaŋi nyɛɛ o la.
15 Ka waaf la pʋʋs ku'om ka li yii o nɔɔrin na nwɛnɛ kɔldaug nɛ pʋbidi dɔl pu'a la ye ku'onwiis la di o mɔri gaad.
16 Amaa ka teŋ la tans mugulim fuoɛn ku'om kanɛ yi wa'abɛ'og tita'ar la nɔɔrin na la sʋŋ pu'a la.
17 Ka wa'abɛ'og tita'ar la sʋʋnr pɛlig nɛ pu'a la hali,
ka o keŋ ye o zab nɛ pu'a la yaas banɛ kpɛlim ka siak Wina'am nɔɔr ka gban'e Yesu n mɔɔl labasi'a la nu'usa ayi' la.
18 Ka wa'abɛ'og tita'ar la zi'e mu'ar la gbɛogʋ gur.