Titabir linɛ tabil la yɛla
6
1 Ka m nyɛ ka Pɛbil la lak titabir linɛ tabil zin'isa ayɔpɔi la yinne.
Ka m wʋm ka bʋnvʋya anaasi la yinne yɛl nɛ kʋkɔr dinɛ nwɛnɛ satansʋg nɛ ye,
“Kem na.”
2 Ka m gɔsi nyɛ wiedpiel.
Ka onɛ ban'ad o la mɔr tiraug.
Ka ba tis o na'am zupibig.
Ka o yina an paŋ daan ye o zabi nyaŋ si'el wʋsa.
3 Ka Pɛbil la lak titabir kanɛ tabili paasa ayi' la.
Ka m wʋm ka bʋnvʋr onɛ paasa ayi' la yɛl ye,
“Kem na.”
4 Ka wiedzin'a mɛ yina.
Ka ba tis onɛ ban'ad o la paŋ ye o sa'as zaba dunia ni ka nidib kʋ taaba.
Ka o di'e zaba sʋ'ʋtita'ar.
5 Ka Pɛbil la lak titabir kanɛ tabili paasa atan' la.
Ka m wʋm ka bʋnvʋr onɛ paasa atan' la yɛl ye,
“Kem na.”
Ka m gɔs ka wiedsabilig bɛ anina.
Ka onɛ ban'ad la mɔr linɛ makid la o nu'ugin.
6 Ka m wʋm ka si'el vuudi nwɛnɛ kʋkɔr linɛ yi bʋnvʋya anaasi la sʋʋgin yɛt ye,
“Kia makir ligidi na zem nidi na tʋm daar yinne tʋʋma yɔɔd.
Ka kizɛn'ug bʋtiŋ bibis atan' mɛ an nid daar yinne tʋʋma yɔɔd.
Amaa da san'ami kpaam nɛ daam laa.”
7 Ka Pɛbil la lak titabir linɛ tabili paasa anaasi la,
ka m wʋm ka bʋnvʋr onɛ paasa anaasi la yɛl ye,
“Kem na.”
8 Ka m nyɛ ka wiedpipɛlʋg bɛɛ anina,
ka onɛ ban'ad o la yʋ'ʋr buon Akum,
ka bam buon zin'isi'a ye Kpi'im Teŋ la,
dɔl o nya'aŋ.
Ka ba tis Akum nɛ Kpi'im Teŋ dunia pʋdigir yinne pʋdigir anaasi la ni ye ba sʋ'oe,
ka kʋʋd nidib nɛ zaba sʋ'ʋg nɛ kɔ'ɔm nɛ wiim nɛ bʋnyuos banɛ bɛ teŋgbauŋ zug.
9 Ka on lak titabir linɛ tabili paasi anu la,
ka m nyɛ banɛ ka ba kʋʋ ba,
ban mɔɔn Wina'am pian'ad ka dit kasɛt linɛ an yɛlsida la zug,
ka ba bɛ maan bimbim la teŋir,
10 ka tansid ye,
“Zugsɔb tita'ar,
onɛ an kasi nɛ sida sɔba,
li na yuugi paae wala ka fʋ na kad nidib nwa saria ka namisi ba ka tɛki ba tʋba ban kʋʋd nidib la yɛla?”
11 Ka ba tisi ba wʋsa fupiela,
ka yɛli ba ye,
“Vʋ'ʋsimi bi'ela ka guri ya tʋmtʋm taaba banɛ an yadda niŋidib ka kpɛlim dunia ni la,
ka ba ti kʋʋ ba nwɛnɛ ban kʋ yanam si'em la,
ka ba kal la bɛn paae.”
12 Ka m nyɛ ka o lak titabir linɛ tabili paasi ayuobʋ la.
Ka teŋ dam bɛdegʋ,
ka nintaŋ kilim liki sɔbig wʋʋ vugulimnɛ,
ka nwadig la wʋsa mu'oe nwɛnɛ ziim nɛ.
13 Ka nwadbibis la yi saŋgbauŋin lit teŋin na nwɛnɛ kekama ka sisi'em ɛɛnti da'adi fanrid kekankansa ka li sʋʋgidi lit teŋin si'em la.
14 Ka saŋgbauŋ la mɛlim nwɛnɛ gbauŋ ka ba kpilim nɛ.
Ka zuoya nɛ tɛɛns banɛ ka ku'om gilig la wʋsa vurisi tɔɔm.
15 Ka dunia na'anam nɛ nintitada nɛ soogia kpɛɛmnam nɛ kpan'am dim nɛ paŋ dim nɛ sɔ' wʋsa,
yammis nɛ banɛ ka' yammis wʋsa,
na su'a tampinlɛma ni nɛ tampiins sian'asim zuoya zut,
16 ka tans zuoya la nɛ tampiins la ye,
“Lim diinli ti ka su'a ti,
ka onɛ zin' na'am gbauŋ zug la da nyɛɛ ti,
ka Pɛbil la mɛ kʋ nyɛɛ ti nɛ o sʋnpɛɛn la.
17 Ka Pɛbil la nɛ onɛ zin' na'am gbauŋ zug la sʋnpɛɛn dabistita'ar paae na,
ka anɔ'ɔnɛ na nyaŋi zi'enɛ o sʋnpɛɛn la tuonnɛ.”