Filimon
1
1 Man Paul onɛ an sanrega nid Yesu Kristo yɛla la,
nɛ ti ba'abiig Timoti sɔbid gbauŋ kaŋa tisidi ti zua sʋŋ Filimon onɛ aan ti tʋmtʋm tiraan la,
2 nɛ ti taʋn Afia nɛ Akipus onɛ aan ti soogia tiraan Yesu Kristo tʋʋma ni la,
nɛ Wina'am nimbanɛ la'asidi fʋ yin la.
3 Ti Ba' Wina'am nɛ ti Zugsɔb Yesu Kristo na tisif yɔlisim nɛ sumbʋgʋsʋm.
Filimon nɔŋilim nɛ o yadda niŋir
4 M pʋ'ʋsid Wina'am bareka saŋa mɛkama ka tiɛndi fʋ yɛla m winsɔsʋgin,
5 bɔzugɔ m wʋm fʋn niŋi ti Zugsɔb Yesu yadda si'em la'am nɛ nɔŋilim linɛ ka fʋ mɔr nɛ yadda niŋidib la.
6 M sɔsid Wina'am ye tinamɛ an yadda niŋidib nɛ taaba la,
na kɛ ka ti gban'e bʋnsʋŋ kanɛ wʋsa ka ti mɔr Kristo ni la gbin.
7 M ba'abiiga,
fʋ nɔŋilim la tis man sumalisim ka li kpɛ'ɛŋi m sʋnf hali,
bɔzugɔ fʋ ma'ae yadda niŋidib la wʋsa sʋnya.
Onesimus yɛla
8 La'am nɛ mam mɔr suor Kristo nii na tun'e tisif nɔɔr ye fʋ niŋ linɛ nar la,
9 amaa tinamɛ nɔŋ taaba la zug ka m bɛlimif.
Man Paul onɛ an Yesu Kristo ninkʋdʋg ka bɛ sanrega ni Yesu Kristo zug la,
10 sɔsidi fʋ m biig Onesimus onɛ ka m liebi o saam man daa bɛ sanrega ni la yɛla (Onesimus gbin anɛ onɛ mɔr tʋmmir).
11 O daa ka' tʋmmir saŋa linɛ gaad la,
amaa o yʋ'ʋn mɔr tʋmmir mam nɛ fʋn san'an.
12 Nannanna nwa,
m lɛbisid on kanɛ aan m nyɔɔrin kɔnbʋg la tisidif.
13 Li naan bɔɔdin bɛdegʋ ye o kpɛlimi m san'an ka zi'enɛ fʋ nɔba zugʋ sʋŋinim,
man nam bɛ sanrega ni Wina'am pian'ad yɛla la.
14 Amaa m pʋ bɔɔd ye m tʋm si'el ka fʋ zi' li ti'irɛ,
ka fʋn gban'e ye fʋ maal si'el na an fʋ mɛŋ bɔɔdim ka ka' mugusʋgɔ.
15 Daasi'erɛ,
linɛ kɛ ka o daa yii fʋ san'an saŋa bi'ela la,
anɛ ye fʋ lɛn di'e o ya'as ka o bɛɛ fʋ san'an saŋa wʋsa,
16 ka lɛn ka' fʋ yammʋga,
amaa o gat yammʋg;
o yʋ'ʋn anɛ fʋ ba'abinɔŋir.
M nɔŋ o bɛdegʋ,
amaa fʋn na nɔŋ o gaad ala,
bɔzugɔ o anɛ fʋ yammʋg ka mɛ aan fʋ ba'abiig,
Zugsɔb la ni.
17 Ka fʋ ya'a sid anɛ m dɔllim taa,
fʋn di'em o wʋʋ fʋn naan di'enim si'em la.
18 Ka o ya'a daa tʋmif nɛ bɛ'ɛd bɛɛ mɔri fʋ si'el,
fʋn gi'elimi li,
ka li aan m sam.
19 Man Paul n sɔb nɛ'ɛŋa nɛ m mɛŋ nu'ug,
ye m na yɔɔ li wʋsa.
Hali tun'e yɛl ye m sam dɔlli fʋ zaŋi keŋi fʋ mɛŋ-mɛŋ nyɔvʋr pʋʋgin.
20 Ɛɛn,
m ba'abiiga,
m bɔɔd nyɔɔdi fʋ san'an tinam an yinne nɛ Zugsɔb la zug.
Bʋgʋlimi m sʋʋnr nɛ bʋn linɛ dɔl Kristo ni.
21 Mam baŋ ye fʋ na tʋmi m bɔɔdim la zug,
ka m sɔbi tisif ka mi' ye fʋ pʋn na tʋm ka li gaad mam yɛlif si'em la.
22 M bɔɔd ye fʋ ti'eb saam dɔɔgʋ digilim,
bɔzugɔ m mɔr ti'ir ye Wina'am na di'e ya wʋsa winsɔsʋg ka yisim kpɛla lɛbisi ya san'an na.
Pʋ'ʋsʋg
23 Epafras onɛ ka ti la'am bɛ sanrega ni Yesu Kristo yɛla la,
pʋ'ʋsidif.
24 M tʋmtʋm taaba Mak nɛ Aristarkus nɛ Demas nɛ Luk mɛ pʋ'ʋsidif.
25 Zugsɔb Yesu Kristo yɔlsim la na bɛ nɛ ya wʋsa.