Kristo mɛŋsier la yɛla
2
1 Ya bɛllim Kristo ni ya'a sadigim kpɛmisi ya,
ka o nɔŋilim la bɛlisi ya,
ka ya an banɛ la'am di'e Wina'am Siig Kasi la,
ka mɔr nɔŋilim nɛ nyɔɔg nɛ taaba,
2 alazugɔɔ mɔɔmi ka mɔri pʋtɛn'ɛr yinne,
nɛ nɔŋilim yinne ka an yinne Siig pʋʋgin,
ka mɔr gban'ar yinne.
Ya ya'a niŋ ala,
li na kɛ ka m sumalisim la pɛ'ɛl.
3 Da niŋɛ si'el linɛ yi nɛnnimin nɛ tita'aliminɛ amaa lɛɛ siemi ya mɛŋ ka tɛn'ɛsi ye ya taaba an sʋm gati ya.
4 Kɛlli ka ya wʋsa pʋtɛn'ɛr gban'e ye ya sʋŋ taaba,
ka ka'anɛ ya mɛŋ yɛla ma'aanɛ.
5 Pʋtɛn'ɛr kanɛ nar ye ya mɔr anɛ Yesu Kristo pʋtɛn'ɛr.
6 La'am nɛ on an nwɛnɛ Wina'am an si'em la,
o da pʋ tɛn'ɛs ye li sʋ'ʋm ye o dʋ'ʋs o mɛŋi
pa'al ye on nɛ Wina'am zem nɛ.
7 Ka lɛɛ sie o mɛŋ ka lieb wʋʋ yammʋgʋ an si'em la,
ka ba du'a o ka o lieb ninsaal.
8 Ka on nie wʋʋ ninsaali an si'em la,
o sie o mɛŋ ka siak kum wʋʋ tʋʋmbɛ'ɛd sɔb nɛ hali kpi dapuudir zug.
9 Linzug ka Wina'am dʋ'ʋs o hali,
ka tis o yʋ'ʋr linɛ gat yʋda wʋsa.
10 Dinzug,
nɛ Yesu yʋ'ʋr zug,
linɛ wʋsa bɛ saazug bɛɛ teŋin bɛɛ teŋ teŋir,
na igin o tuon ka dʋ'ʋs o yʋ'ʋr.
11 Ka sɔ' mɛkama na yɛl ye,
Yesu Kristo an Zugsɔb la,
ka li zun'e ti Ba' Wina'am la yʋ'ʋr.
Tinamɛ an nɛɛsim dunia nwa ni la
12 Dinzugɔ m zuanɔŋa,
mam daa bɛ nɛ ya ka ya siakidi m sa'alʋg si'em la,
niŋimi ka li gaad ala la'am nɛ man ka' ya san'an la,
ka tʋmmi tʋʋma linɛ aan ya faangir yɛla la sʋ'ʋŋa nɛ kikirʋg nɛ dabiem.
13 Wina'am bɛɛ ya ni ka tisidi ya ya'amlɛog ye ya pʋtɛn'ɛr dɔl o bɔɔdim sʋŋ,
ka ya sid na nyaŋi tʋmi li.
14 Niŋimi si'el mɛkama ka nyunyɔlis nɛ nɔŋgbannwa'ar da bɛɛ,
15 ye ya an nyain ka taal ka'asigɛ,
ka an Wina'am bibanɛ bɛ zʋmaaŋ bɛ'ɛd nɛ ninyɔɔdnam sʋʋgin ka lɛɛ pʋ mɔr gba'arɛ,
ka nie nyain wʋʋ nwadbibis banɛ bɛ saŋgbana ni,
16 ka gban'e nyɔvʋr pian'ad la kiŋ-kiŋ.
Ya ya'a niŋ ala,
m na nwɛ' nyɔ'ɔg nɛ ya Yesu Kristo ken daar na,
ye m zigib nɛ m tʋʋma la wʋsa pʋ niŋ zaalim.
17 Hali baa m ya'a zaŋi m nyɔvʋri tis ka li nwɛnɛ maan nɛ yanam yadda niŋir zug,
li na malis mam ka m na maal sumalisim nɛ ya wʋsa.
18 Ala mɛnɛɛ li sʋ'ʋm ka ya sʋnya ma'ae ka ya mɔr sumalisim nɛ m.
Timoti nɛ Epafroditus la yɛla
19 M mɔr ti'iri ti Zugsɔb Yesu Kristo ni ye ti kʋ yuugɛ ka na tʋm Timoti ya san'an na ka o na tisi ya m labaar ka m sʋnf ma'ae.
20 On ma'aa mɔr pʋtɛn'ɛr yinne nɛ mam ka on ba' sid bɛ nɛ ya yɛla hali.
21 Sɔ' mɛkama zigidnɛ o mɛŋ yɛla ka ka'anɛ Yesu Kristo yɛlaa.
22 Ka ya mi' Timoti an sʋm si'em ka mi' ye mam nɛ on tʋm labasʋŋ tʋʋma la nwɛnɛ dau nɛ o biigi niŋid si'em.
23 Dinzugɔ m mɔr pʋtɛn'ɛr ye mam ya'a baŋi m yɛla la na naae si'em m na tʋm o ya san'an na tɔ'ɔtɔ.
24 M mɛ mɔr ti'ir Zugsɔbin la ye li kʋ yuugɛ ka m mɛ na kena.
25 M tɛn'ɛs ka li nar ye m tʋmi m ba'abiig,
Epafroditus onɛ aan m tʋmtʋm tiraan ka lɛn aan m soogia tiraan ka an onɛ ka ya tʋm o ye o sʋŋim la.
26 O bɔɔd nɛ o sʋʋnr wʋsa ye o nyɛɛ ya,
bɔzugɔ,
o sʋnf san'amnɛ yanamɛ wʋm o ban'as yɛla la.
27 Sida,
o daa bɛn'ɛdnɛ ka nwaas kum,
ka Wina'am zɔɔ o nimbaanlig,
ka li ka'anɛ on ma'aa nimbaanliga,
amaa la'am nɛ mam mɛn,
ka m sʋnsa'aŋ da lɛm pɛ'ɛsɛ.
28 Dinzug ka m mɔɔd nɛ nimmua hali ye m tʋm o ya san'an na,
ka ya ya'a nyɛɛ o,
ya sʋnya na malis,
ka m ya'am na digin mɛn.
29 Di'emin o nɛ sumalisim on aan ya ba'abiig Zugsɔb la ni la zug.
Ka na'asidi nimbanɛ mɛ nwɛn o la,
30 bɔzugɔ li da kpɛlim bi'ela ka o kpi Kristo tʋʋma la yɛla,
ka kɛɛsi o nyɔvʋr ye o sʋŋ mam nɛ linɛ ka ya mɛŋ pʋ nyaŋi sʋŋim la.