Yesu tʋm o nya'andɔlib pii nɛ ayi' la
9
1 Yesu daa buol o nya'andɔlib pii nɛ ayi' la la'as,
ka tisi ba paŋ nɛ kpi'euŋ ye ba nyaŋi kad kikiris ka ma'ae ban'as,
2 ka tʋmi ba ye ba mɔɔl Wina'am na'am ka ti'eb ban'adnam.
3 Ka yɛli ba ye,
“Da zaŋi si'eli ya ken la zugɔ.
Da zaŋ dansaar bɛɛ kɔlʋg bɛɛ diib bɛɛ ligidii,
hali baa fuud ayi'.
4 Zin'ikanɛ wʋsa ka ba di'e ya,
yanam zin'inim yikan nii ti paae yanamɛ na ti yi teŋin la.
5 Ka zin'ikanɛ wʋsa ka nidib pʋ di'e ya,
yanam yim teŋ kan ni ka kpa'asi ya nɔba titani bas anina.
Dinɛ na pa'ali ba ye ba pʋ tʋm tʋʋm sʋmaa.”
6 Ka nya'andɔlib la yii keŋ teŋkpɛmis wʋsa nii mɔɔn labasʋŋ la ka ti'ebid ban'adnam.
Herod zi' Yesu an sɔ'
7 Na'ab Herod daa wʋm linɛ wʋsa niŋid la,
ka li pak o hali bɛdegʋ,
bɔzugɔ ninsieba daa yɛl o ye Joon onɛ daa sʋʋd nidib ku'om la vʋ'ʋg kumin.
8 Ka sieba ye Elaja kena,
ka sieba ye Wina'am nɔdi'es kʋdig yinne vʋ'ʋg kumin.
9 Ka Herod yɛl ye,
“Man daa fi'ig Joon zug,
ka ɔŋa aan anɔ'ɔn ka m wʋm o yɛla nwa?”
Ka o kpɛ'ɛŋid ye o nyɛ Yesu.
Yesu diis dap tusa anu
10 Ka tʋmtʋmnib la lɛb na ka tu'as Yesu ban tʋm si'el wʋsa.
Ka o dɔl ban ma'aa yii keŋ teŋ si'a ka li yʋ'ʋr buon Besaida.
11 Ka nidib la baŋ la,
ka kad o bugir.
Ka o di'e ba ka pian' Wina'am yɛla tisi ba ka ti'eb ban'adnam.
12 Ka winnigi bɔɔd kpɛn'ɛb la ka nya'andɔlib pii nɛ ayi' la kɛɛn o san'an na yɛl o ye,
“Kɛl ka nidib la keŋ teŋkpɛmisin nɛ tempʋbanɛ kpi'e ba san'an la nyɛ diib nɛ gbɛɛnsa;
ka zin'ikaŋa nwa ka' si'ela.”
13 Amaa ka Yesu yɛli ba ye,
“Yanam mɛŋ tisimi ba diib ka ba di.”
Ka ba lɛbis ye,
“Tinamɛ mɔr si'el wʋsa la anɛ bodobodo bibis anu nɛ zimi ayi'.
Fʋ bɔɔd ye ti keŋ da' diib na tis nimbama wʋsa?”
14 Dap kal daa anɛ wʋʋ tusa anu.
Ka Yesu yɛl nya'andɔlib la ye,
“Kɛlli ka nidib la zin'in,
pisnu nu.”
15 Ka ba kɛ ka ba zin'in ala.
16 Ka Yesu zaŋ bodobodo gbila anu nɛ zimi ayi' la ka gɔdigi gɔs saazugʋ pʋ'ʋs Wina'am bareka,
ka gbin'es bodobodo la tis o nya'andɔlib la ka ba tɔnd nidib la.
17 Ka ba wʋsa dii tig ka nya'andɔlib la vaae linɛ kpɛlim la ka li pɛ'ɛl pɛɛd pii nɛ ayi'.
Pita yɛl Yesu an sɔ' la yɛla
18 Daar yinne ka Yesu bɛ zin'isi'a o kɔn'ɔkɔn' sɔsid Wina'am ka o nya'andɔlib la bɛɛ o san'an,
ka o bu'osi ba ye,
“Nidib yɛt ye m aan anɔ'ɔnɛ?”
19 Ka ba lɛbis ye,
“Sieba ye fʋ anɛ Joon onɛ sʋʋd nidib ku'om la ka sieba ye,
fʋ anɛ Elaja,
ka sieba ye fʋ anɛ Wina'am nɔdi'es kʋdig yinne onɛ vʋ'ʋg kumin na.”
20 Ka o bu'osi ba ye,
“Ka yanam on ye mam aan anɔ'ɔnɛ?”
Ka Pita lɛbis ye,
“Fʋ anɛ Kristo la.”
Yesu tu'as o namisʋg yɛla
21 Ka Yesu yɛli ba nɛ kpi'euŋ ye ba da yɛl sɔ',
22 ka ye,
“Li nar ye Ninsaal Biig la namis bɛdegʋ ka teŋgbauŋ kpɛɛmnam nɛ maanmaannib kpɛɛmnam nɛ gbauŋmi'idib zan'as o,
ka kʋʋ o,
ka daba atan' daar ka o vʋ'ʋg kumin.”
23 Ka o yɛli ba wʋsa ye,
“Sɔ' ya'a ye o dɔl man,
asɛɛ o ki'is o mɛŋ ka zaŋ o kum dapuudir daar wʋsa dɔl mam.
24 Ninkanɛ wʋsa bɔɔd ye o gu' o nyɔvʋr on daana na kɔ'ɔŋi li,
amaa ninkanɛ kɔ'ɔŋ o nyɔvʋr man zug o na gu' li.
25 Ninsaal ya'a nyɛ dunia bʋna wʋsa ka kɔ'ɔŋ o nyɔvʋrɛ,
li nyɔɔd an bɔ?
26 On mɛkama zɔ mam nɛ m pian'ad la nyan,
Ninsaal Biig la mɛ na ti zɔɔ o nyan,
o ya'a ti kena nɛ o girima nɛ o Ba' nɛ maliaksʋma girima la.
27 M yɛti ya nɛ sida ye,
ya sieba bɛ kpɛla kʋ kpii asɛɛ ba ti nyɛ Wina'am na'am la.”
Yesu tiakir la yɛla
28 Yesu pian' nɛ'ɛŋa la,
li daba anii nya'aŋ ka o zaŋ Pita nɛ Jemes nɛ Joon dʋ zuor zug ye o sɔs Wina'am.
29 On nam sɔsid Wina'am la ka o nindaa tiak ka o fuud pɛligi nyɛɛn.
30 Ka dapa ayi' nie o san'an vuguri naa pian'ad nɛ o.
Ba da anɛ Moses nɛ Elaja
31 banɛ nie nyɛɛn hali pian'ad nɛ Yesu on na kpi Jerusalem wʋʋ Wina'am da yɛl si'em la.
32 Ka Pita nɛ o taaba la gbisid,
ka duoe nyɛ Yesu nyɛɛn si'em nɛ nidiba ayi' banɛ la'am zi'e o san'an la.
33 Ka nidib ayi' la da bɔɔd ken la,
Pita yɛl Yesu ye,
“M Zugsɔba,
li an sʋm ye ti kpɛlim kpɛla.
Kɛl ka ti ti' sʋga atan',
fʋn din yinne,
Moses din yinne,
Elaja mɛn din yinne.”
O da kʋdim pian'anɛ ka zi' on yɛt si'ela.
34 On nam pian'ad la ka saŋgbauŋ ma'asim kena lusi ba.
Ka dabiem gban'e nya'andɔlib la saŋgbauŋ la lusi ba la zug.
35 Ka kʋkɔr yi saŋgbauŋ la ni na yɛl ye,
“Oŋa aan m Biig,
on ka m gaŋ.
Kɛlisimi nɛ o.”
36 Kʋkɔr la pian' naae la ka ba nyɛ ka Yesu gʋllim zi'e.
O nya'andɔlib la daa zaŋ lina wʋsa niŋi ba pʋtɛn'ɛrin ka pʋ yɛl sɔ' ban nyɛ si'el saŋkan la.
Yesu ti'eb bikan ka kikirig mɔr o la
37 Ka bɛogʋ daa nie ka ba sig zuor la zug na la,
nidib bɛdegʋ daa tʋ'ʋs Yesu.
38 Ka dau sɔ' kpɛn tans nidib la sʋʋgini yɛl ye,
“Pa'anna,
m bɛlimif nɛ,
gɔsimi m biig nwaa tisim bɔzugɔ o anɛ m biyimmir.
39 Ka kikirig ɛɛnti kpɛn' o ka o kaasid ka lut kpisiŋkpi'ir,
ka nintɔɔnd yit o nɔɔrin,
ka kʋdim pʋ siak ye li yi ka bas o
40 Ka m bɛlimi fʋ nya'andɔlib ye ba kadi li yis ka ba pʋ nyaŋɛ.”
41 Ka Yesu lɛbis ye,
“Aba!
Yanam an bɔnam nidibi kʋdim pʋ mɔr yadda ka mɛ pʋn zi' linɛ nar ye ya tʋm.
Nɔɔr ala ka m ye m mɔdig nɛ ya?”
Ka Yesu yɛl dau la ye,
“Mɔr biig la na.”
42 Ka biig la kenna la,
ka kikirig la lug o ka o nwi'e.
Ka Yesu tans kikirig la ye,
“Basim biig la!”
Ka kikirig la bas o ka o paam laafi,
ka Yesu zaŋ o lɛbisi tis o saam.
43 Ka Wina'am paŋ tita'ar tʋʋma la lidigi ba wʋsa.
Yesu tu'as o kum la yɛla
Nidib la wʋsa daa nan kpɛn lidig nɛ Yesu niŋid si'el la,
ka o yɛl o nya'andɔlib la ye,
44 “Kɛlli ka pian'abama kpɛn' ya tʋba ni ka da tamiyaa.
Ba na zaŋ Ninsaal Biig la niŋ ninsaalib nu'usin.”
45 Amaa ka pian'ad la ligili ba,
ka ba pʋ baŋi li gbinnɛ.
Ka dabiem mɔri ba nɛ ban na bu'os o.
Kpi'euŋ nwa'asʋg la yɛla
46 Ka ba nwa'asid taaba kpi'euŋ yɛla.
47 Ka Yesu baŋ linɛ bɛɛ ba sʋnya ni ka nɔk biigi zi'el o san'an,
48 ka ye,
“Onɛ wʋsa di'e bikaŋa m yʋ'ʋr zug di'enɛ man,
ka onɛ mɛ di'e man di'enɛ onɛ tʋm man la na,
bɔzugɔ onɛ wʋsa an biigi ya san'an la aan ya kpɛɛm.”
Onɛ aan ti tʋmtʋm tiraan la yɛla
49 Ka Joon yɛl ye,
“Zugsɔba,
ti nyɛ dau ka o kat kikirisi yisidi fʋ yʋ'ʋr zug,
ka on ka' tinam nid yinne la zug ka ti yɛl o ye o basim.”
50 Ka Yesu lɛbis ye,
“Da kati nɛ o,
ka on mɛkama pʋ kisi ti anɛ ti nid.”
Samaria teŋ si'a zan'as Yesu la yɛla
51 Saŋa la da li'el nɛ ban na zaŋ Yesu keŋ agɔl la,
ka o gban'e ye asɛɛ ka o keŋ Jerusalem.
O da tʋm nidib ka ba gaad o tuonnɛ
52 keŋ kpɛn' Samaria tembilin ye ba ti'ebi gur o.
53 Ka nimbanɛ bɛ anina la pʋ di'e o,
on ken Jerusalem la zug.
54 Ka o nya'andɔlib Jemes nɛ Joon nyɛ nɛ'ɛŋa la,
ba bu'os o ye,
“Zugsɔba,
fʋ bɔɔd ye ti buol bugum ka li yi agɔl na dii baa?”
55 Ka Yesu fɛndig tansi ba ye ba kɛl,
56 ka ba tɔɔm teŋ.
Banɛ bɔɔd Yesu dɔllim la yɛla
57 Ka ban ken suor zug la ka dau sɔ' yɛl Yesu ye,
“Man na dɔlli keŋ fʋn na keŋ zin'isi'a wʋsa.”
58 Ka Yesu lɛbis ye,
“Teŋinbʋmis mɔri ba vɔnt,
ka niimis mɔr tɛɛd,
amaa Ninsaal Biig la pʋ mɔr zin'ikan ka o na diginɛ vʋ'ʋsɛ.”
59 Ka o yɛl dau sɔ' mɛn ye,
“Dɔllim.”
Amaa ka dau la yɛl o ye,
“Kɛl ka m keŋ mumi m saam yiiga.”
60 Ka Yesu lɛbis o ye,
“Kɛl ka banɛ kpi mumi ba mɛŋ kum.
Amaa fʋn kem mɔɔl Wina'am na'am labaar la.”
61 Ka dau yinne yɛl ye,
“Zugsɔba,
m na dɔllif,
amaa kɛl ka m keŋ kɛɛsim yidim.”
62 Ka Yesu lɛbis o ye,
“Onɛ wʋsa gban'e na'akuoda kuunr ye o kua ka gɔsid nya'aŋ,
o pʋ sʋ'ʋm ye o tʋm Wina'am sʋ'ʋlim tʋʋmaa.”