Yesu n tiak o mɛŋ la yɛla
17
1 Daba ayuobʋ nya'aŋ,
ka Yesu zaŋ Pita nɛ Jemes nɛ Jemes ba'abiig Joon dʋ zuotita'ar zug.
Ka ban gʋllim bɛɛ anina.
2 Ka o tiaki ba tuon,
ka o nindaa nie nyain wʋʋ nintaŋ nɛ.
Ka o fuud pɛlig hali.
3 Ka ba nyɛ Moses nɛ Elaja,
ka ba kenaa sɔnsid nɛ Yesu.
4 Ka Pita yɛl Yesu ye,
“M Zugsɔba,
li an sʋ'ʋm ye ti bɛ kpɛla.
Fʋ ya'a siak,
m na ti' sʋga atan' tis fʋn yinne nɛ Moses yinne nɛ Elaja yinne mɛn.”
5 Ka on nam kpɛm pian'ad la,
ka saŋgbauŋ linɛ nie nyain kena ligili ba.
Ka kʋkɔr yi saŋgbauŋ la nii yɛl ye,
“Oŋa aan m binɔŋir,
onɛ paae m ya'am bɛdegʋ.
Kɛlisimi nɛ o pian'ad.”
6 Ka o nya'andɔlib la wʋm la,
ka vanbin teŋin nɛ dabietita'ar.
7 Ka Yesu li'eli si'isi ba ka yɛli ba ye,
“Duomi,
ka da zɔti dabiem.”
8 Ka ba gɔdigi ba zuti gɔs,
ka pʋ lɛn nyɛ nidaa,
asɛɛ Yesu gʋllim.
9 Ka ban sigid zuor zug la na,
Yesu sa'ali ba ye,
“Mid ka ya yɛl nid bʋnkanɛ ka ya nyɛ la,
hali nɛ Ninsaal Biig la ti vʋ'ʋg ka bas kum.”
10 Ka o nya'andɔlib la bu'os o ye,
“Wala ka gbauŋmi'idib yɛl ye,
Elaja na dɛŋi kena?”
11 Ka o lɛbisi yɛli ba ye,
“Li anɛ amɛŋa ye Elaja na dɛŋi kena,
ka lɛbis si'el wʋsa li zin'igin.
12 Amaa man yɛti ya nɛ ye,
Elaja pʋn kena sa,
ka ba pʋ baŋ on an sɔ',
ka niŋ o ban bɔɔd si'em.
Ala mɛn ka Ninsaal Biig la na nyɛ namisʋgʋ ba nu'usin.”
13 Ka o nya'andɔlib la yʋ'ʋn baŋ ye o yɛti ba nɛ Joon onɛ sʋʋd nidib ku'om la yɛla.
Yesu ti'eb kpisiŋkpi'ir daan
14 Yesu nɛ o nya'andɔlib la paae tigirin la,
ka dau sɔ' kena igin Yesu tuon,
15 ka yɛl ye,
“M Zugsɔba,
zɔmi m biig la nimbaanlig ka o lutnɛ kpisiŋkpi'ir ka li namisid o hali.
Ka li ya'a ɛɛn duoe o,
o lutnɛ bugumin bɛɛ ku'omin.
16 Dinzug ka m mɔr o na amaa fʋ nya'andɔlib la pʋ nyaŋi ti'eb oo.”
17 Ka Yesu lɛbisi ba ye,
“Zʋmaaŋ kaŋa nidib ka' yadda ka mɛ ka' yɛlmɛŋir dima.
Saŋa wala ka ya bɔɔd ye m bɛ nɛ ya?
Saŋa wala ka m ye m mɔdig nɛ ya?”
Ka o yɛl dau la ye,
“Mɔr biig la na.”
18 Ka Yesu kad kikirig la biig la ni,
ka anina yim ka biig la nyɛ laafi.
19 Ka nya'andɔlib la keŋ Yesu san'an baanlimm bu'os o ye,
“Bɔɔ niŋ ka ti pʋ nyaŋi kad kikirig la yisɛ?”
20 Ka o lɛbisi ba ye,
“Ya yadda pʋ zu'oe la zug.
Li anɛ sida ka m yɛti ya ye ya ya'a niŋ Wina'am yadda hali ka li kʋdim pɔɔdi nwɛnɛ kansiing bielif nɛ,
ya na tun'e yɛl zuor kaŋa ye,
‘Tɔɔm keŋ zin'isi'a sa!’
Ka li na niŋ ala.
Ka si'el kae ka ya kʋ nyaŋi maalɛ.
21 Asɛɛ Wina'am sɔsʋg nɛ nɔlɔɔr ka ya na tun'e kad nɛ'ɛnam buudi.”
Yesu lɛm pian' o kum yɛla
22 Ka nya'andɔlib la la'as taaba kɛn Galile na,
ka Yesu yɛli ba ye,
“Ba na ti gban'e Ninsaal Biig la niŋ o nidib nu'usin
23 ka kʋʋ o,
ka li daba atan' daar o na vʋ'ʋg ka bas kum.”
Ka ba sʋnya san'am bɛdegʋ.
24 Ka Yesu nɛ o nya'andɔlib la paae Kapeenum teŋin,
ka Wina'am Pʋ'ʋsim Yir lampɔdi'esidib bu'os Pita ye,
“Ya pa'an la yɔɔd Pʋ'ʋsim Yir lampɔ bɛɛ?”
25 Ka o lɛbis ye,
“Ɛɛn o yɔɔd.”
Pita paae yin la,
Yesu da dɛŋi bu'os o ye,
“Simon,
fʋ tɛn'ɛsid ye bɔ?
Anɔ'ɔn san'an ka dunia nwa na'anam di'esidi ba lampɔ?
Teŋin dimin bɛɛ banɛ an saam la ni?”