Jerusalem dim dataas la san'auŋ yɛla
12
1 Zugsɔb la labaari nwa zaŋi ken Israel dim yɛla. Zugsɔb onɛ maal saŋgbana, ka maal dunia ɛɛnbir ka nɔk vʋm niŋ ninsaal ni la, yɛl si'eli nwa: 2 “M na kɛ ka Jerusalem nwɛnɛ nwam kanɛ pɛ'ɛl nɛ daam, ka nimbanɛ gilig la wʋsa na nuu li bugi tu'usid ka gɛrid. Ba na kena lud Juda nɛ Jerusalem dim. 3 Daakan la, buudbanɛ bɛ dunia wʋsa ni ya'a ti la'asi giligi ba, m na kɛ ka Jerusalem kilim tampiing kanɛ pʋ bikida. Ka banɛ wʋsa mak ye ba bik o na pu'alimi ba mɛŋ. 4 Daakan la m na kɛ ka dabiem kpɛn' widi wʋsa, ka banɛ ban'ad la wʋsa zut fɛndig.” Zugsɔb la pian'ʋkʋ la. “M na gur Juda nidib la, amaa ka kɛ ka buudi la wʋsa widi zu'om. 5 Ka Juda dim tuongatib la wʋsa na yɛli ba sʋnfʋn ye, ‘Jerusalem nidib la kpi'emnɛ bɔzugɔ Zugsɔb Onɛ an Paŋtita'ar Sɔb la aan ba Wina'am.’6 “Daakan la m na kɛ ka Juda tuongatib la nwɛnɛ daad ka ba la'asi nyu'oe ka dʋgʋl dʋk, bɛɛ bugum na bɛ kikan'a kpi'emis sʋʋgin. Ba na vaalim nimbanɛ bɛ ya-datiuŋ nɛ ya-dagɔbʋg la wʋsa, amaa Jerusalem na kpɛn zi'e o naŋ-naŋ.”
7 Zugsɔb la na gur Juda bɛllim zin'ig yiiga, ala ka David yaas nɛ Jerusalem teŋ nidib girima kʋ gaad Juda dima. 8 Daakan la Zugsɔb la na lus banɛ bɛ Jerusalem la, ala ka tadimnam banɛ bɛɛ ba sʋʋgin la na nwɛnɛ Na'ab David, ka Na'ab David yaas la mɛ na nwɛnɛ Wina'am, ka nwɛnɛ Zugsɔb maliak nɛ gaadi ba tuon. 9 Daakan la m na yii zab nɛ banɛ wʋsa zabid nɛ Jerusalem la.
Ban kummi tisid onɛ ka ba kʋns la yɛla
10 “M na nɔk nimbaanlzɔɔr nɛ winsɔsʋg siigi bu'oe niŋ David yaas nɛ Jerusalem dim la zug. Ba na gɔsid man kanɛ ka ba kʋns la, ka kum hali, wʋʋ sɔ' na kaasidi o biyimmir kʋʋr si'em la, ka ba sʋnf san'am wʋʋ sɔ' sʋnfʋ na san'am o bikpɛŋ kum yɛla si'em la. 11 Daakan la kukuma na bɛ Jerusalem teŋin hali, wʋʋ ban kaasid Hadad Rimmon yɛla si'em Megido teŋin la. 12 Teŋ la wʋsa na paam sʋnsa'aŋ, dɔɔg wʋsa nidib na la'as taaba kum kɔn'ɔb-kɔn'ɔb, dap nɛ ba pu'ab na kummi ba kɔn'ɔkɔn', David tuŋ la nɛ ba pu'ab, nɛ Natan tuŋ la nɛ ba pu'ab, 13 nɛ Levi dɔɔg dim la nɛ ba pu'ab, nɛ Simie tuŋ la nɛ ba pu'ab, 14 nɛ dɔɔd banɛ kpɛlim la wʋsa nɛ ba pu'ab.”