Tʋʋmbɛ'ɛd pier yɛla
13
1 Zugsɔb la da yɛl ye, “Daakan la ku'om na yɔ'ɔgi bunni tis David yaas nɛ Jerusalem teŋ nidib, li na pie ba tʋʋmbɛ'ɛd nɛ dian'ad wʋsa yis.2 “Daakan la, man na kpiis ba'ar wʋsa yʋ'ʋri yis teŋ la zug, ka ba kʋ lɛn tiɛn ba yɛla ya'asɛ,” Zugsɔb Onɛ an Paŋtita'ar Sɔb la pian'ʋkʋ la. “M na yis ziri nɔdi'esidib la nɛ kikiris banɛ dɔlli ba la wʋsa teŋ la zug. 3 Ka sɔ' ya'a zan'as ka ye o pian'adnɛ nɔdi'esʋg pian'ad, o saam nɛ o ma du'adig na yɛl o ye, ‘Li anɛ tilas ye fʋ kpi, bɔzugɔ fʋ ma' ziri nɛ Zugsɔb la yʋ'ʋr.’ O ya'a pian' o nɔdi'esʋg la yɛla, o mɛŋ yidim na kʋns o kʋ.
4 “Daakan la nyan na gban'e nɔdi'es banɛ wʋsa yɛt ye Wina'am nie si'elnamɛ pa'ali ba la. O kʋ yɛ nɔdi'es fuugʋ ma' zirii. 5 O na yɛl ye, ‘Man ka' nɔdi'esa. Man anɛ kpaad; kuob ka man ti'e ka vʋe m dasannimin sa.’ 6 Sɔ' ya'a bu'os o ye, ‘Ka fɛn'ɛbama yi yaanɛ fʋ niŋgbina ni?’ O na lɛbis ye, ‘M paam dɛmis la nɛ m zuanam yin.’ ”
Ba kʋ kɔnbkem la ka kɔnbid la widig
7 Zugsɔb Onɛ an Paŋtita'ar Sɔb la yɛl ye, “Sʋ'ʋgɔɔ, duom zab nɛ m kɔnbkemnib la,
zam nɛ dau kanɛ li'elim la!”
Zugsɔb Onɛ an Paŋtita'ar Sɔb la pian'ʋkʋ la.
“Kʋʋm kɔnbkem la,
ka kɔnbid la widig,”
ka man mɛ na zab nɛ kɔnbbaanlʋg la.
8 Zugsɔb la yɛl ye, “Teŋ nwa zug wʋsa,
pʋdigir zin'is atan' pʋʋgin ayi' na kpi ka ba'as yɔri;
la'am nɛ wala pʋdigir yinne na kpɛlim anina.
9 Pʋdigir yinne kanɛ kpɛlim la, m na mɔri ba na kpɛn'ɛs bugumin;
ka nyɛligi ba siligi yis nyain wʋʋ anzurifa nɛ,
ka maki ba wʋʋ sanlima nɛ.
Ba na buol man yʋ'ʋr
ka m siaki tisi ba;
M na yɛl ye, ‘Ba anɛ m nidib,’
ka ba na yɛl ye, ‘Zugsɔb la anɛ ti Wina'am.’ ”