11
1 Lebanon dima, yɔ'ɔgimi ya kʋlis;ka bugum kanbi ya na'aziinr tibɛda la!
2 Kpʋkparig tiisɛ, kaasimi kuŋ,
bɔzugɔ na'aziinr tiis la luya,
ka girima tiis la san'am!
Tikpi'ema banɛ bɛ Basan teŋinɛ, kaasimi kuŋ;
Sian'akanɛ ka tiis da kpɛn' kippi la san'am ya!
3 Kɛlisim kɔnbkemnib la kaasid kuŋ si'em;
ban kemmi ba kɔnbid zin'isi'a ka li mɔr yam sʋma la san'am ya!
Kɛlisim gbigima la nwa'am si'em;
sian'anr linɛ bɛ Joodan kɔldaugin la san'am nɛ!
Kɔnbkemniba ayi' la yɛla
4 Zugsɔb onɛ aan m Wina'am la yɛl si'eli nwa ye, “Gur kɔnbid banɛ ka ba zanbil ye ba kʋ la. 5 Banɛ da' ba la kɔti ba ka keŋ zaalim ka sɔ' pʋ maali ba si'ela. Banɛ kuosidi ba la yɛl ye, ‘Bareka bɛ nɛ Zugsɔb la, man anɛ bʋmmɔr!’ Ba mɛŋ kɔnbkemnib la ba'a lɛn ka' nɛ baa. 6 M kʋ lɛn zɔ teŋ la nidib nimbaanlig ya'asɛ.” Zugsɔb la yɛl si'em la. “M na lɛbis sɔ' wʋsa niŋ o kpi'a nɛ o na'ab nu'ugin. Ba na muk teŋ la nidib, ka m kʋ faaɛn ba yisi ba nu'uginɛ.”
7 Ala ka m kem kɔnbid banɛ ka ba zanbili ba ye ba kʋ la, li kas-kas anɛ kɔnbbanɛ ka ba mugusid ba hali la. Dinzug ka m nɔk balaya ayi', ka pʋd yinne ye, Nimbaanlzɔɔr ka pʋd yinne ye, Nɔɔr Yinne, ka m mɛŋ mɔri li kem kɔnbid la. 8 Nwadig yinne pʋʋgin ka m kad kɔnbkemniba atan'.
Kɔnbid la da kisigim nɛ, ka m yaama yii ba; 9 ka m yɛl ye, “M kʋ lɛn aan ya kɔnbkemma. Kɛl ka banɛ kpiid la kpi, ka banɛ san'amid la san'am. Kɛl ka banɛ kpɛlim la ɔnb taaba.”
10 Ka m nɔki m balaar linɛ buon Nimbaanlig la kɔ'ɔgi li, ka li pa'al ye m san'am nɔnaar kanɛ wʋsa ka m naal nɛ buudi wʋsa la. 11 Li da san'ami naae daakan la. Ka banɛ da'ad kɔnbidi kuosid la nyɛ ka baŋ ye li anɛ Zugsɔb la pian'ʋk.
12 M yɛli ba ye, “Ya ya'a gɔs ka li nar, yanam on tisimi m yɔɔd, amaa li ya'a pʋ nara, yanam on mɔr.” Ka ba tisim anzurifa ligidi pistan'.
13 Ka Zugsɔb la yɛlim ye, “Nɔkimi lii lɔbi bas Pʋ'ʋsim Yir ligidi su'ab dɔɔgin la.” Ban zi'el m da' si'em la! Linzug ka m nɔk anzurifa ligidi pistan' la lɔbi bas Pʋ'ʋsim Yin la tis ligidgur la.
14 M da lɛn kɔ'ɔg balaar kanɛ paasa ayi' ka li yʋ'ʋr buon Nɔɔr Yinne la, san'am ba'abiidʋg linɛ bɛ Juda nɛ Israel dim sʋʋgin la.
15 Zugsɔb la da lɛn yɛlim ye, “Maalimi fʋ mɛŋ nwɛnɛ kɔnbkem kanɛ an zɔlʋg nɛ. 16 Bɔzugɔ m ye m gaŋnɛ kɔnbkem kanɛ na gɔsid teŋ la, onɛ ba'a kʋ bɛ nɛ kɔnbbanɛ bɔdig bɛɛ kɔnbbaanlʋg la, ka kʋ ti'eb banɛ pu'alim la, bɛɛ diis banɛ mɔr laafi laa, amaa o na gaans pɛbanɛ nɔbi mɔr kpaam la ɔnbid ka fʋgʋsidi ba tafɛɛd.
17 “Tɔɔg bɛ kɔnbkem kanɛ ka' gban'ar la zug,
on kɛɛs kɔnbid la bas la!
Zaba sʋ'ʋg na kie o nu'ug ka kʋns o datiuŋ nif!
O nu'ug na kpi nyain,
ka o datiuŋ nif zu'om nyain!”