Zugsɔb la na gur Juda dim
10
1 Sɔsimi Zugsɔb la saa yɛla sigsaa saŋa;li anɛ Zugsɔb la kɛt ka saŋgbana la'asid.
Onɛ kɛt ka saa niidi tisid ninsaalib,
ka zʋʋd yit teŋinɛ tisid sɔ' wʋsa.
2 Bada la pian'adnɛ ziri pian'ad,
ba'abʋgʋdib nyɛt si'el la ka' sida;
ba zaansima la anɛ ziri,
ba ma' ye ba bʋgʋnnɛ nidib la sʋʋnr amaa li wʋsa anɛ zaalim.
Linzug nidib la yiridnɛ giligid wʋʋ pɛ'ɛs nɛ
ka namisid ban pʋ mɔr kɔnbkem la zug.
3 “Man sʋnf duonɛ nɛ kɔnbkemnib la,
ka m na namis tuongatib la.
Zugsɔb Onɛ an Paŋtita'ar Sɔb la mɛŋ na guri ba
o na gur o kɔnbid banɛ an Juda dim la,
ka kɛ ka ba nwɛnɛ wiedkpi'ema na bɛ zaba ni nɛ.
4 Juda teŋin ka lɔdigin kugir la na yina
onɛ an kpa'ar kanɛ ka ba na nɔk Fuug Sʋgʋr nwiig la lɔ,
onɛ na an zaba tiraug,
o san'an ka tuongatib wʋsa na yina.
5 Ba na la'as taaba an zabzabid kpi'ema
banɛ nyaŋi ba dataasi nɔɔd teŋin zaba ni.
Zugsɔb la bɛ nɛ ba la zug,
ba na zabi nyaŋ banɛ ban'ad widii zabid la.
6 M na kɛ ka Juda nidib la paam paŋ
ka faaɛn Israel nidib la bas.
M na lɛbisi ba zin'il
bɔzugɔ m zɔti ba nimbaanlig.
Ba na nwɛnɛ man nan zi' zan'asi baa,
bɔzugɔ manɛ aan ba Zugsɔb ba Wina'am
ka na wʋmi ba sɔsʋg.
7 Israel nidib la na kpi'em wʋʋ zabzabkpi'ema nɛ,
ka ba sʋnya ma'ae wʋʋ ba bɛ nɛ daam nuubin.
Ba biis na nyɛ ka ba sʋnya ma'ae;
ba sʋnf na malis Zugsɔb la maal si'eli tisi ba la zug.
8 M na buoli ba
ka la'asi ba m san'an.
Sida-sida m na faaɛn ba;
ba na lɛn zu'oe wʋʋ ban da an si'em la.
9 La'am nɛ man widigi ba kpɛn'ɛs teŋzʋŋin la wʋsa,
ba na bɛ teŋ lalli ka tiɛndi m yɛla.
Ban nɛ ba biis la na tilig,
ka lɛb na ya'as.
10 M na yisi ba Egipt teŋin lɛbis na
ka la'as banɛ bɛɛ Asiria teŋin la.
M na mɔri ba kɛn Gilead nɛ Lebanon tɛɛnsin na,
ka paalʋ kʋ bɛɛ siaki baa.
11 Ba na dɔl yɛlbanɛ nwɛnɛ atɛuk ku'om yɛŋim si'em la nii gaad;
ba na nyaŋ atɛuk linɛ dammid la.
Nail kɔldaug nɛ li zulʋŋ la wʋsa, li na kpiɛn.
Asiria dʋ'ʋsi-m-mɛŋ la na sig teŋin
ka Egipt sʋ'ʋlim la mɛ gaad.
12 M na kɛ ka ba nyɛ kpi'euŋ man Zugsɔb la ni
ka kennɛ m yʋ'ʋr la pʋʋgin.”
Zugsɔb la pian'ʋkʋ la.