Israel dim dataasi paam namisʋg la yɛla
9
1 Zugsɔb la labaar yɛl ye, o zan'as Hadirak teŋnɛ Damaskus teŋ la,
bɔzugɔ Zugsɔb la yɔ'ɔg o nini
gɔsid Israel dɔɔd nɛ ba nidib la wʋsa.
2 O mɛ zan'as Hamat teŋ kanɛ kpi'e Hadirak la,
la'am nɛ Taya nɛ Sidon, hali la'am nɛ ban mi' tʋʋma hali la.
3 Taya dim mɛɛ ba kpi'euŋ zin'ig
ka la'as anzurifa nwɛnɛ titan,
ka mɛ la'as sanlima digil wʋʋ suorin sa'ad nɛ.
4 Amaa Zugsɔb la na nɔki ba arezak la wʋsa gaad
ka san'ami ba kpi'euŋ zin'ig la bas atɛuk pʋʋgin,
ka bugum na kanbi ba teŋ la wʋsa.
5 Askɛlon teŋ dim na nyɛ ka zɔ dabiem,
Gaza dim mɛ na namis bɛdegʋ,
ka Ekron dim ti'ir la wʋsa gaad.
Gaza dim kʋ lɛn nyɛɛ ba na'ab la,
ka Askɛlon teŋ mɛ na kpɛlim dabɔɔd.
6 Saam na kena di'e Asdod teŋ la,
m na kɛ ka Filistia dim basi ba nyɛɛsim la
ka kʋ lɛn nwɛ'ɛd nyɔ'ɔgɔ.
7 M kʋ lɛn kɛ ka ba ɔnb ni'im kanɛ mɔr ziim,
bɛɛ nɔk dikanɛ kisi niŋi ba nɔɔrinɛ.
Banɛ kpɛlim la na aan ti Wina'am la nidib
ka lieb tuongatib Juda teŋin,
ka Ekron dim la na liebi m nidib
wʋʋ Jebus dimi an si'em la.
8 Amaa m na guri m teŋ la
ka banɛ giligidi bɔɔd ye ba zu ka san'am la
kʋ lɛn nyɛ suori kpɛn' naa.
M kʋ lɛn siak ka onɛ mugusid nidib kena nyaŋi m nidib laa,
bɔzugɔ nannanna manɛ yʋ'ʋn guri ba.
Zion na'ab la kenna
9 Zion dima, mɔri sumalisim bɛdegʋ!
Jerusalem dima, tansimi nɛ kʋkɔtita'ar
gɔsimi ya, ya Na'ab la kennɛ ya san'an na,
o anɛ pʋpielim sɔb ka mɔr nyɔvʋr kanɛ ka' naarɛ,
ka sie o mɛŋi ban'ad bʋŋ;
o ban'adi bʋŋsia'asiŋ.
10 M na yis zaba tɛrekonam la wʋsa Efiram teŋin
ka yis zaba widi la Jerusalem tempʋʋgin
ka kɔ'ɔg zaba tiraug la.
O na pian' sumbʋgʋsʋm yɛla tis sʋ'ʋlimnam la wʋsa.
O na'am la na pin'il atɛuk yinne ni keŋ paae atɛuk yinne,
ka naan Efiritis kɔldaugin la keŋ paae dunia bɛn wʋsa.
11 Ya'a kpɛlim fʋ, man nɔk ziim maal nɔnaar nɛ fʋn la zug,
m na faaɛn fʋ nidib la yis bʋmbu'azulʋŋin.
12 Lɛmmini ya kpi'euŋ zin'igin la, yammis banɛ yʋ'ʋn mɔr ti'irɛ;
hali nannanna m mɔɔl ya ye m na lɛbisi ya bareka la nɔɔr ayi'.
13 M na pɔnd Juda wʋʋ man na gʋdi m tiraug ka li pɔnd si'em la
ka Efiram dim an piema.
Zion dima, m na nɔki ya nidib la,
ka ya liebi m zaba sʋ'ʋg,
ka zab nɛ Girik dim la.
Zugsɔb la na yina
14 Zugsɔb la na nie ba san'an;
o piema la na ian'ad wʋʋ sa-ian'asʋg nɛ.
Zugsɔb Wina'am la na pieb tanp na'atan la,
ka ken nɛ sisi'em linɛ yit ya-dagɔbʋg la.
15 Zugsɔb Onɛ an Paŋtita'ar Sɔb la na lusi ba.
Ba na nyaŋi ba dataas nɛ luobkuga
ka kʋʋ ba.
Ba na maal tʋkpiidʋg wʋʋ ba anɛ danuudib nɛ;
ka ba dataas ziim na kpa'ad wʋʋ
maan ka ba maal ka kpa'ad ziim la laan si'em
ka mɔri misid maan daka lʋga anaasi la.
16 Zugsɔb onɛ aan ba Wina'am la na faaɛn ba daakan la
wʋʋ kɔnbkemi na faaɛn o kɔnbid si'em la.
Ba na nyɛɛnnɛ o teŋ la zug
wʋʋ sanlima nɛ anzurifa na tab na'am zupibigin nɛ.
17 Ba na vɛnl ka nidib ya'am kpɛn' ba hali!
Zʋʋd la na kɛ ka dasam la nɔb sʋ'ʋŋa ka mɔr laafi,
ka danpaalig la mɛ maal pu'asada la mɛn.