<<    <     Zakaria     8     >    >> 
Zugsɔb la kaanb ye o na niŋ Jerusalem albareka
8
1 Zugsɔb Onɛ an Paŋtita'ar Sɔb la labaar da lɛn kɛn Zakaria san'an na ye, 2 Zugsɔb Onɛ an Paŋtita'ar Sɔb la yɛl si'eli nwa ye, “M nɔŋ Zion yɛla hali, ka la'am nɔŋ nidib la mɛn.” 3 Zugsɔb la yɛl si'eli nwa, “M na lɛb Zion Zuorin na ka bɛ Jerusalem tempʋʋgin. Ka ba na buon Jerusalem ye Tempʋkanɛ an Sida ka buon Zugsɔb Onɛ an Paŋtita'ar Sɔb la zuor la ye Zuokanɛ an Kasi.”
4 Man Zugsɔb Onɛ an Paŋtita'ar Sɔb la yɛl si'em nwa ye, “Dap nɛ pu'ab banɛ kʋdig hali na zin' Jerusalem tempʋʋgin la, ka sɔ' wʋsa zanl o dansaari du'usid on kʋdig la zug.” 5 Biribis nɛ bipumis na pɛ'ɛl tempʋʋg la suoya ni di'emid.
6 Man Zugsɔb Onɛ an Paŋtita'ar Sɔb la yɛl si'em nwa ye, “Saŋkan la, li na an lidigiri tis nimbanɛ kpɛlim bi'ela teŋin la. Amaa ya tɛn'ɛs ye li na an lidigiri tis mam?” Man Zugsɔb Onɛ an Paŋtita'ar Sɔb la yɛl ala.
7 Man Zugsɔb Onɛ an Paŋtita'ar Sɔb la yɛl si'em nwa ye, “M na faanm nidib la yis tembanɛ bɛ ya-nya'aŋ nɛ ya-tuona la pʋʋgin. 8 M na mɔri ba na ka ba zin'in Jerusalem teŋin. Ba na aan m nidib, ka mam mɛ na an sida nɛ pʋpielim Wina'am tisi ba.”
9 Man Zugsɔb Onɛ an Paŋtita'ar Sɔb la yɛl si'em nwa ye, “Yanam banɛ yʋ'ʋn wʋm pian'abama yit nɔdi'es banɛ da bɛ saŋa kanɛ ka ba ɛɛnb Zugsɔb Onɛ an Paŋtita'ar Sɔb la Pʋ'ʋsim Yir la, kpɛ'ɛŋimi ya mɛŋ ka Yir la mɛ'. 10 Tʋʋma la da nam pʋ pin'il la, ninsaal bɛɛ bʋnkɔnbʋg da kae na nyaŋi tʋm ka di'e yɔɔdɛ. Sɔ' da kae na nyaŋi tʋmm o mɛŋ tʋʋma nɛ ya'amlɛogɔ, bɔzugɔ man mɛŋ da tuguli ya ka ya zabid nɛ taab wʋʋ ya anɛ dataas nɛ. 11 Amaa nannanna m kʋ lɛm maal banɛ kpɛlim la wʋʋ man da maan si'em la.” Man Zugsɔb Onɛ an Paŋtita'ar Sɔb la pian'ʋkʋ la.
12 “Bʋmbʋta la na nɔbig sʋ'ʋŋa, ka tiwanna la mɛ wal wala, ka teŋ la kɛ ka zʋʋd du'a. Saŋgbana na kɛ ka saa ni. Manɛ na tis nɛ'ɛnam wʋsa ka li an faari tis nimbanɛ kpɛlim la.” 13 Juda nɛ Israel dima, nidib da pɔɔd nɔɔri tisid taaba ye, “Juda nɛ Israel yɛltɔɔg la buudi na paae ya. Amaa da zɔti dabiem, ka m na faaɛn ya ka tisi ya albareka. Kpɛ'ɛŋimini ya mɛŋ ka tʋmi.”
14 Man Zugsɔb Onɛ an Paŋtita'ar Sɔb la yɛl si'em nwa ye, “Wʋʋ ya yaanamɛ da duoe m sʋnf ka m gban'e ye m na kɛ ka san'auŋ paae ba, ka pʋ zɔɔ ba nimbaanlig ka tiakim ya'am la, 15 ala mɛn ka m gban'e ye m maal bʋnsʋŋʋ tis Jerusalem nɛ Juda dim ya'as. Da zɔti dabiem. 16  Yanamɛ na maal si'em nwa: pian'ami sida tisi taaba, ka kadi saria linɛ an sʋm ka dɔl suori ya sariakadib zin'isin la; 17 da gban'e gban'abɛ'ɛdi sɛnbig taabaa, mɛ da pɔɔdi ziri pɔɔrɛ. Man kis nɛ'ɛnam wʋsa.” Zugsɔb la pian'ʋkʋ la.
18 Zugsɔb Onɛ an Paŋtita'ar Sɔb la labaar da lɛn kɛn Zakaria san'an na ye 19 Zugsɔb Onɛ an Paŋtita'ar Sɔb la yɛl si'em nwa ye, “Nɔlɔɔr kanɛ ka ya lɔɔd nwadis anaasi nɛ nwadis anu nɛ nwadis ayɔpɔi nɛ nwadis piiga ni la wʋsa na anɛ sumbʋgʋsʋm nɛ sumalisim la'asʋg nɛ di'ema malima tis Juda dim. Dinzugɔ ieemi sida nɛ sumbʋgʋsʋm.”
20 Zugsɔb Onɛ an Paŋtita'ar Sɔb la yɛl si'em nwa ye, “Saŋa kenna ka nidib bɛdegʋ na ti yi teŋ sieba kena, 21 ka tempʋsieba nidib na yɛl teŋ sieba dim ye, ‘Kɛlli ka ti keŋ tɔ'ɔtɔ iee Zugsɔb la ka wɔ'ɔg Zugsɔb Onɛ an Paŋtita'ar Sɔb la. Mam mɛŋ na keŋ.’ 22 Ka nidib bɛdegʋ nɛ sʋ'ʋlim banɛ mɔr kpi'euŋ na kɛn Jerusalem na iee ka pʋ'ʋs man Zugsɔb Onɛ an Paŋtita'ar Sɔb la.”
23 Zugsɔb Onɛ an Paŋtita'ar Sɔb la yɛl si'em nwa ye, “Dabisban ya'a ti paae, nidib piiga na yi buudi wʋsa nii la'asi gban'e Jew nid yinne fuug nɔɔr ka yɛl o ye, ‘Kɛl ka ti la'am keŋ, bɔzugɔ ti wʋm ye Wina'am bɛɛ ya san'an.’ ”