Sida nɛ nimbaanlzɔɔri pak, ka ka' nɔlɔrɛ
7
1 Darius n da di na'am la, li yʋma anaasi saŋa, nwadis awai la, li daba anaasi daar (nwadkanɛ buon Kisilef la) ka Zugsɔb la labaar kɛn o nɔdi'es Zakaria san'an na.2 Betel nidib da tʋm Siareza nɛ Regem Melek nɛ ba nidib la Zugsɔb Onɛ an Paŋtita'ar Sɔb la Yin ye ba sɔs Zugsɔb la ka o zɔɔ ba nimbaanlig. 3 Ba da bu'os maanmaannib nɛ nɔdi'esidib la bu'oskaŋa ye, “Li sʋm ye ti kpɛn kum saŋa wʋsa Pʋ'ʋsim Yir san'auŋ la yɛla, ka lɔɔd nɔɔr nwadis anu la ni wʋʋ tinamɛ maan si'em yʋma bɛdegʋ nwana laa?”
4 Saŋkan la ka Zugsɔb labaar kɛɛn m san'an na ye, 5 “Bu'osim teŋ la nidib nɛ maanmaannib la ye, ban da lɔɔd nɔɔr ka kaasid nwadis anu nɛ nwadis ayɔpɔi la ni yʋma pisyɔpɔi linɛ gaad la, li sid da anɛ man na'asi yɛla ka ya da lɔɔd nɔɔr laa? 6 Ka yanamɛ da dit ka nuud la, li ka'anɛ ya mɛŋ ka ya da diisidaa? 7 Li ka' yɛlbama ka Zugsɔb la da pian' dɔlis o nɔdi'esidib banɛ da pʋn dɛŋi bɛ la san'anɛ tis Jerusalem dim, saŋkanɛ ka ba da mɔr arezak pamm ka sumalisim bɛ, la'am nɛ tɛɛns banɛ gilig tempʋʋg la, nɛ Negef nɛ tɛɛns banɛ bɛ zuoya teŋir ka nidib da bɛ hali laa?”
Tiakimi ka lɛbi Zugsɔb la san'an na
8 Labakaŋa ka Zugsɔb la da lɛm pian' tis Zakaria ye, 9 Zugsɔb Onɛ an paŋ tita'ar Sɔb la yɛl si'eli nwa ye, Sɛɛ ya tʋm nɛ sida, zɔmi taaba nimbaanlig ka mɔr nyɔɔg nɛ taaba. 10 Da namisi pʋkɔnya nɛ kpiibis nɛ saam banɛ la'am bɛ nɛ ya la, bɛɛ nɔŋ dima. Mɛ da tɛn'ɛsid bɛ'ɛdi tisid taabaa. 11 Amaa m nidib la da maal tʋbzian'asim bidim kudug, ka zan'as ka pʋ kɛlisɛ ka li' ba tʋba, 12 ka digilimi ba sʋnya wʋʋ tampiing nɛ, ka pʋ kɛlisid wada la bɛɛ pian'ad linɛ ka Zugsɔb Onɛ an Paŋtita'ar Sɔb la da tis o nɔdi'esidib banɛ da bɛ kʋdimin sa laa. Ala ka Zugsɔb Onɛ an Paŋtita'ar Sɔb la sʋnf da duoe hali. 13 “Man da buol la ba pʋ kɛlisɛ, ala ka ba sɔs ka m mɛ zan'as ka pʋ di'e, Zugsɔb Onɛ an Paŋtita'ar Sɔb la pian' li. 14 M da widigi baa kpɛn'ɛs tɛɛns wʋsa ni wʋʋ sisi'epiliŋi mɔri ba kennɛ. Ka ba lieb saam ka ba teŋ la kpɛlim dabɔɔd ka sɔ' kʋ lɛn nyaŋi lɛb naa. Ban da maal teŋ sʋŋ la si'em nwa ka li lieb zaalim.”