Tɛrekonam anaasi la yɛla
6
1 Ka m lɛn gɔsi nyɛ ka tɛrekonama anaasi bɛɛ m tuon ka naan kʋntzɛn'ug zuoya ayi' la teŋsʋkʋ yit na. 2 Ka wiedzɛn'ɛs tɛɛd yiiga tɛreko la, ka wiedsabila mɛ tɛɛd linɛ tia'al la, 3 ka wiedpiela tɛɛd linɛ paas atan' la, ka wiedpʋpɔnra mɛ tɛɛd tɛreko linɛ tia'al anaasi la, ba wʋsa da kpi'emnɛ hali. 4 Ani ka m bu'os maliak kanɛ pian'adi tisidim la ye, “M zugdaana, nɛ'ɛnam an bɔ?” 5 Ka maliak la lɛbis ye, “Bama anɛ siis anaasi, banɛ bɛ arezana ni, ba yinɛ Zugsɔb la san'an na ye ba kaae dunia la wʋsa. 6 Wiedsabila la tɛɛd tɛreko si'a la lɛbidi ya-datiuŋ baba, ka wiedpiela la lɛbid ya-tuona baba, ka wiedpʋpɔnra la lɛbid ya-dagɔbʋg baba.”7 Wiedbanɛ mɔr paŋ la yina la, ba kiridi tɔ'ɔtɔ ye ba kaae dunia la wʋsa. Ka o yɛl ye, “Kem kaae dunia la wʋsa!” Ka ba sid keŋ kaae li wʋsa. 8 Ka maliak la buolimi yɛl ye, “Gɔsima banɛ ken ya-datiuŋ baba la kɛ ka m sʋnf ma'ae zin'ikan la yɛla.”
Josua na'am la yɛla
9 Ka Zugsɔb la labaar kɛɛn m san'an na yɛlim ye, 10 Di'em anzurifa nɛ sanlima Heldai nɛ Tobija nɛ Jedaya san'an, banɛ daa an yammis Babilon teŋin ka kul na la, ka mɔri li daakanɛ keŋ Josia onɛ an Zefanaya biig la san'an. 11 Nɔkim anzurifa nɛ sanlim la maal zupibig, ka nɔki li pid Josua onɛ an maanmaan kpɛɛm ka o saam an Jehozadak la. 12 Ka yɛl o ye, “Zugsɔb Onɛ an Paŋtita'ar Sɔb la yɛl si'em nwa ye, Dau kanɛ ka o yʋ'ʋr buon ‘Wil la’ nwana, ka o na tɔɔn yii o zin'igin la mɛ' Zugsɔb Pʋ'ʋsim Yir la. 13 Li anɛ onɛ na mɛ' Zugsɔb Pʋ'ʋsim Yir la, ka na paam girima, ka zin'in o na'am gbauŋ la zugʋ gɔs o nidib. Maanmaan na zi'e o na'am gbauŋ la baba, ka ba nidib ayi' la na tʋm nɛ sumalisim nɛ nɔɔr yinne.” 14 Zupibig la anɛ nidiba atan' nwa din, Heldai nɛ Tobija nɛ Jedaya nɛ Hen onɛ an na'asi sɔb hali ka an Zefanaya biig la, ka ba na nɔki li niŋ Zugsɔb Pʋ'ʋsim Yin la ka li tiɛndi ba yɛla. 15 Banɛ bɛ lalli la na kena sʋŋi mɛ' Zugsɔb Pʋ'ʋsim Yir la, linɛ na kɛ ka fʋ baŋ ye Zugsɔb Onɛ an Paŋtita'ar Sɔb la sid tʋm mam fʋ san'an na. Nɛ'ɛŋa sid na niŋ, fʋ ya'a siaki dɔl Zugsɔb onɛ an fʋ Wina'am la nɔɔr.