Gbauŋ linɛ ian'ad agɔla la yɛla
5
1 Ka m lɛn gɔsi nyɛ ka gbauŋ kpilim ian'ad agɔla.2 Ka maliak la bu'osim ye, “Fʋ nyɛ bɔ?” Ka m lɛbis ye, “M nyɛnɛ gbauŋ ka li kpilim bɛɛ agɔlli ian'ad, ka li labisim nɛ li wa'alim pʋ pɔɔda.” 3 Ka o yɛlim ye, “Nɔpɔɔr linɛ sɔb gbauŋ kaŋa ni la na tiig teŋ la wʋsa. Gbauŋ la zin'ig yinne yɛtnɛ ye banɛ zuud la wʋsa, ba na yisi ba teŋ la zug; ka li zin'ig yinne yɛl ye banɛ pɔɔd ziri pɔɔr la, ba na yisi ba teŋ la zug.” 4 Zugsɔb Onɛ an Paŋtita'ar Sɔb la yɛl si'eli nwa ye, “M na kɛ ka nɔpɔkaŋa kpɛn' na'ayiig wʋsa yin, la'am nɛ onɛ mɔri m yʋ'ʋr la pɔɔd yɔri-yɔri la yin. Ka m nɔpɔɔr la na kpɛlim anina hali nɛ lin na ti san'am si'el wʋsa, la'am nɛ daad nɛ kuga.”
Pu'a kanɛ bɛ pɛogʋn la yɛla
5 Ka Maliak kanɛ pian'ad nɛ m la yi tuon na, ka yɛlim ye, “Gɔsim agɔla ka fʋ na nyɛ ka si'el nied saŋgbauŋin la.”
6 Ka m bu'os ye, “Nɛ'ɛŋa an bɔ?” Ka o lɛbis ye, “Li anɛ pɛog kanɛ ka ba mɔri makid ki.” Ka lɛn yɛl ye, “Nɛ'ɛŋa pa'annɛ nimbanɛ bɛ teŋ la zug wʋsa tʋʋmbɛ'ɛd.”
7 Ka liŋ linɛ pibili li la ʋk agɔla ka pu'a zin' pɛog la pʋʋgin. 8 Ka o yɛlim ye, “Nɛ'ɛŋa pa'annɛ bugusim yɛla.” Ka da'ae pu'a la lɛbisi kpɛn'ɛs pɛog la pʋʋgin ka vɛ'ɛg liŋ tɛbisʋg la pibili li nɔɔr la.
9 Ka m gɔs agɔla ka nyɛ pu'ab ayi' ka ba bɛɛ m tuon, ka pɛbisʋg bɛɛ ba kpʋkpama ni! Ba da mɔr kpʋkpama ka li nwɛnɛ adaalʋŋ kpʋkpama nɛ, ka ba ʋk pɛog la ka li bɛ dunia nɛ saŋgbauŋ la teŋsʋk.
10 Ka m bu'os maliak kanɛ pian'ad nɛ m la ye, “Ba mɔr pɛog la wa'ae yaanɛ?”
11 Ka o lɛbis ye, “Ba mɔri wa'anɛ Babilon teŋin, ye ba mɛ' yiri nɔki li niŋ. Yir la ya'a naae ba na niŋ pɛog la zin'ikanɛ ka li nar ye li bɛ la.”