Sanlima fitir nɛ olif tiis ayi' la yɛla
4
1 Ka maliak kanɛ pian'ad nɛ mam la lɛb na niem wʋʋ nidi na gbisid ka ba nie o gbɛɛmin si'em la. 2 Ka bu'osim ye, “Fʋ nyɛ bɔ?” Ka m lɛbis ye, “M nyɛ sanlima fitir zi'esir ka laa sʋn'e li zug, ka fita ayɔpɔi zi'e li zug, ka yinne wʋsa mɔr laŋʋnama ayɔpɔi. 3 M mɛ lɛn nyɛ olif tiis ayi' ka li zi'e kpi'e li, ka yinne bɛ laa la datiuŋ ka yinne bɛ li dagɔbʋg.”4 Ka m bu'os maliak kanɛ pian'ad nɛ m la ye, “M zugdaana, nɛ'ɛnam an bɔ?” 5 Ka o lɛbis ye, “Fʋn zi' nɛ'ɛnamɛ an si'elaa?” Ka m lɛbis ye, “Ɛɛn, m zugdaana, mam zi'.” 6 Ka o yɛlim ye, “Nɛ'ɛŋa pa'annɛ Zugsɔb labaar linɛ ka o yɛt Zerubabɛl ye, ‘Li ka' fʋ kpi'euŋ bɛɛ fʋ paŋa, amaa li anɛ m Siig la paŋ.’ ” Zugsɔb Onɛ an Paŋtita'ar Sɔb la yɛl. 7 “Zuotita'arɛ, fʋ aan anɔ'ɔnɛ? Fʋ na birigi lɛbi dig sassi Zerubabɛl tuon. O na mɛ' Yir la kuoe ka nidib tansid nɛ kʋkɔtitada yɛt ye, Wina'am na niŋi li bareka! Wina'am na niŋi li bareka!”
8 Ka Zugsɔb labaar kɛɛn m san'an na ye, 9 “Zerubabɛl nu'usi ɛɛnb Pʋ'ʋsim Yikaŋa; o nu'usi na lɛn kuoe li. Ala ka fʋ na baŋ ye Zugsɔb Onɛ an Paŋtita'ar Sɔb la tʋm mam ya san'an na.
10 “Mid ka ya nɛ'ɛsi tʋʋm kanɛ pin'il bi'ela! Nidib na maal sumalisim ba ya'a ti nyɛ ka Zerubabɛl zanl tanmɛɛdib makir nwiig la o nu'ugin.
“(Fita ayɔpɔi la anɛ Zugsɔb nini ayɔpɔi banɛ nyɛt si'el wʋsa dunia kaŋa zug la.)”
11 Ka m bu'os maliak la ye, “Olif tiis ayi' banɛ zi'e fita zi'esir datiuŋ nɛ dagɔbʋg la tʋʋm an bɔ?” 12 Ka m lɛm bu'os o ye, “Olif tiis wila ayi' banɛ mɔr vɔnya, ka kpaam dɔlisidi ken la gbin an bɔ?” 13 Ka o lɛbis ye, “Fʋ zi' bama an si'elaa?” Ka m lɛbis ye, “Ɛɛn, m zugdaana, man zi'.” 14 Ka o yɛlim ye, Li pa'annɛ nidiba ayi' banɛ ka ba gaŋ ka bu'oe malʋŋ kpaam niŋi ba zutin ye ba tʋm tis Zugsɔb onɛ sʋ'oe dunia wʋsa la.