Maanmaan kpɛɛm fuug linɛ an kasi la yɛla
3
1 Ani ka o pa'alim Josua onɛ an maanmaan kpɛɛm la ka o zi'e Zugsɔb maliak la tuon, ka Sʋntaana onɛ an teŋgbi'id la zi'e o datiuŋ ye o ma'aa ziri tabil o. 2 Zugsɔb la da yɛl Sʋntaana ye, “Sʋntaana! Man Zugsɔb la zɛrigif. Man onɛ gaŋ Jerusalem la zɛrigif! Dau kaŋa nwɛnɛ dakanɛ bɛ bugumini dit ka ba yaae li yis na.” 3 Saŋkan la Josua da yɛnɛ fumilisa zi'e maliak la tuon. 4 Maliak la da yɛl banɛ zi'e anina la ye, “Yɛɛgiminɛ o fumilisa la.” Ka mɛ yɛl Josua ye, “Gɔsima, man yisi fʋ tʋʋmbɛ'ɛd la wʋsa, ka na nɔk fusʋma yɛɛlif.” 5 Ka m yɛl ye, “Nɔkimi bantabig linɛ an nyain vilig o zug.” Ka ba sid nɔk bantabig linɛ an nyain lɔɔ o zug ka yɛɛl o fuug, saŋkan ka Zugsɔb maliak la nan zi'e anina.6 Zugsɔb maliak la da tis Josua nɔkaŋa ye, 7 “Zugsɔb Onɛ an Paŋtita'ar Sɔb la yɛl si'em nwa ye, ‘Fʋ ya'a na dɔlli m wada la ka tʋm man bɔɔd si'el la, fʋ na sʋ'ʋgi m Pʋ'ʋsim Yir la nɛ li za'as la wʋsa, ka m na tisif zin'ig, nimbanɛ bɛ kpɛla la sʋʋgin.’ ”
8 “Kɛlisim sʋ'ʋŋa, fʋn Josua onɛ an maanmaan kpɛɛm nɛ banɛ sʋŋidif ka zin' fʋ tuon la, ya anɛ zanbin linɛ pa'an bʋmbanɛ na ti kena la. M ye m mɔri m sankpan'as onɛ an ‘Wil la’ kena. 9 Gɔsimi kugir kanɛ ka m digil Josua tuon! Kugir la mɔri nini ayɔpɔi, man na sɔb zanbin si'a pa'ali li zug.” Zugsɔb Onɛ an Paŋtita'ar Sɔb la pian'ʋkʋ la. M na nɔk daar yinne yis teŋgbauŋ kaŋa tʋʋmbɛ'ɛd la wʋsa.
10 “Daakan la sɔ' wʋsa na buol o kpi'a ka o kena zin'in o saman tiig nɛ o kekaŋ gbinnin.” Zugsɔb Onɛ an Paŋtita'ar Sɔb la pian'ʋkʋ la.