Dau kanɛ zanl linɛ makid la yɛla
2
1 Ka m lɛn nyɛ ka li nie pa'alim, ka m nyɛ ka dau sɔ' zi'e m tuon ka zanl nwiig kanɛ ka ba mɔri makid la o nu'ugin. 2 Ka m bu'os ye, “Fʋ wa'ae ya?” Ka o lɛbis ye, “M kennɛ ye m mak Jerusalem gɔsi li yalʋŋ nɛ li wa'alim zem si'em.”3 Ka maliak kanɛ pian'adi tisidim la gaad ka maliak yinne kenna ye o tʋ'ʋs o 4 ka yɛl o ye, “Zɔm keŋ yɛl dasaŋ kanɛ zanl makir nwiig la ye, ‘Jerusalem anɛ tempʋkanɛ kʋ mɔr zaŋguomaa, bɔzugɔ nidib nɛ bʋnkɔnbid bɛdegʋ na bɛɛ anina. 5 Mam mɛŋi ye m an bugum zaŋguomi giligi li, ka na bɛɛ li pʋʋgin nɛ m girima la wʋsa.’ ” Zugsɔb la pian'ʋkʋ la.
6 “Kemi na! Kemi na! Zɔm yii teŋ kanɛ bɛ ya-datiuŋ la, bɔzugɔ manɛ da widigi ya gilig dunia lʋga anaasi la wʋsa.” Zugsɔb la pian'ʋkʋ la.
7 “Zion dima kemi na! Yanam banɛ bɛ Babilon teŋin nɛ, zɔm yii na!” 8 Zugsɔb Onɛ an Paŋtita'ar Sɔb la yɛl si'em nwa, “Onɛ da na'as mam, ka tʋmim ye m keŋ pian' zɛrig sʋ'ʋlim banɛ da gban'e ya la, o yɛl ye, ‘Onɛ wʋsa si'isi ya si'isnɛ man nif bielif. 9 M sid na zab nɛ ba ka ba yammis na nyaŋi ba ka faaɛn ba la'ad.’ ” Ka ya baŋ ye Zugsɔb Onɛ an Paŋtita'ar Sɔb la tʋm mam na.
10 “Zion nidiba, tansimi nɛ kʋkɔtita'ar, ka maal sumalisim bɔzugɔ, m kenna; m bɛɛ ya san'an.” Zugsɔb la pian'ʋkʋ la. 11 “Daakan la sʋ'ʋlim bɛdegʋ na kɛn Zugsɔb la san'an na ka lieb o nidib. M na bɛɛ ya sʋʋgin ka ya baŋ ye Zugsɔb Onɛ an Paŋtita'ar Sɔb la sid tʋm mam ya san'an na. 12 Zugsɔb la na sʋ'ʋg Juda ka li aan o faar, teŋ kanɛ an kasi la ni, ka lɛn nɔk Jerusalem ka li an teŋ kanɛ ka o gaŋ ka nɔŋ hali.
13 “An baanlimm Zugsɔb la tuon, bɔzugɔ o naan zin'ikanɛ ka o bɛ ka li an kasi la yit na.”