Sʋnya tiakir yɛla
2
1 La'asimi taaba,yanam buudkanɛ pʋ zɔt nyan la,
la'asimi taaba na,
2 ka dabisir la nyaan paae.
Daakan la, ba na zii ya keŋ nwɛnɛ udug
ka sisi'em ziidi li ken si'em la.
Hali ka Zugsɔb la sʋnpɛɛn dabisir la nyaan paae,
ka o sʋnpɛɛn linɛ dit wʋʋ bugum la nyaan luu ya zug.
3 Ieemi Zugsɔb la,
yanam banɛ siedi ya mɛŋ ka siakid o nɔɔr la,
Ieemi pʋpielim, tʋmmi linɛ dɔl suor ka sie ya mɛŋ Zugsɔb la tuon
ka daasi'erɛɛ daakanɛ ka Zugsɔb Sʋnf na duoe la,
ya na yi namisʋg la ni.
Filistia dim tʋbtɛkir yɛla
4 Sɔ' kʋ ti kpɛlim Gaza teŋinɛ, ba wʋsa na bas teŋ la.
Ba na ti san'am Askɛlon teŋ la ka li kpɛlim dabɔɔd.
Ba na kad Asdod dimi yis nintaŋ tisʋʋs,
ka mɛ vuoɛn Ekron teŋi bas.
5 Zugsɔb la yɛl ye,
“Yɛltɔɔg bɛ yanam Keret dim banɛ zin' Atɛuk baba la zug,
Filistia dim teŋ kanɛ bɛ Keenan la, m na san'ami ya wʋsa,
hali ka ya nid baa yinne kʋ kpɛlim.
6 Yanam tembanɛ bɛɛ atɛuk nɔɔrin la mɛ
na lieb kɔnbkemnib sʋga nɛ pɛ'ɛs gbɛɛnb zin'ig.
7 Juda nimbanɛ kpɛn vʋe la na zin' anina.
Ani ka ba na kemmi ba bʋnkɔnbid,
zaamnɔɔr ka ba pɛ'ɛs la na digin Askɛlon dabɔɔdin.
Bɔzugɔ ba Zugsɔb Wina'am la na gɔsidi ba,
ka kɛ ka ba lɛn nyɛ zusʋŋ ya'as.”
Moab nɛ Ammon dim tʋbtɛkir yɛla
8 Zugsɔb la lɛn yɛl ye,
“Mam wʋm Moab nɛ Ammon dimi
tʋ'ʋdi ya ka la'adi ya si'em.
Ba vɔlisidi ya yɛt ye, ‘Ti na lɛn di'e ya paalʋ la.’ ”
9 Alazugɔ, Man Zugsɔb Paŋtita'ar Sɔb onɛ an Israel Wina'am la pɔya ye,
“Asida sida mɛnɛ, Moab nɛ Ammon dim tɛɛns na san'am
nwɛnɛ Sodom nɛ Gomora tɛɛnsi da san'am si'em la.
Zin'iban na lieb yaarim bɔk,
ka mɔbɛ'ɛd na yit anina saŋa linɛ ka' naarɛ.
Ka mam nimbanɛ kpɛn vʋe la na faaɛn ba
ka di'e ba teŋ la wʋsa sʋ'oe.”
10 Ala ka Moab nɛ Ammon dim sid na nyɛ namisʋgʋ ba tita'alimin la,
ban tʋ'ʋd ka la'ad Zugsɔb onɛ an Paŋtita'ar Sɔb nidib la zug.
11 Zugsɔb la sʋʋnr na duoe hali ka o kpɛn'ɛsi ba dabiem
ka kɛ ba bada la lieb zaalim.
Teŋgbauŋ la nidib wʋsa na pʋ'ʋs o
ba mɛŋ tɛɛnsin, nɛ ban bɛ zin'isi'a wʋsa.
Kus nɛ Asiria dim tʋbtɛkir yɛla
12 Zugsɔb la mɛ na kɛ ka Kus dim la kpi tanpin.
13 Zugsɔb la na zaŋ o paŋ la san'am Asiria,
ka kɛ ka Ninive teŋ la san'am
ka teŋgbauŋ na kʋdig wʋʋ pipirig nɛ.
14 Niigi nɛ kɔnbid na digi anina vʋ'ʋsid,
nɛ mɔɔgin bʋnkɔnbid buudi wʋsa.
Ka viid buudi wʋsa na dʋʋ zi'e ba ya-wɛna la zug,
ka ba kukuma kpɛn'ɛd takoronamin,
ka tandia'ana digi ba za'anɔya ni,
ka na'aziinr dasʋma banɛ ka ba zaŋi mɛɛ ba dɔɔd la na kpɛn dig paalʋ.
15 Teŋkaŋa da bɛ nɛ m ba'a kae bɛllim
ka si'el-si'el pʋ pak oo.
O da yɛl o mɛŋ ye, “Mam ma'aa bɛ ka sɔ' kae nwɛnɛ ma”
Teŋkan yʋ'ʋn liebnɛ dabɔɔd ka an bʋnkɔnbid gbɛɛnb zin'ig.
Banɛ gat ani wʋsa la'adnɛ
ka lɔbidi ba zut teŋ la san'am si'em la zug.