Zefanaya
1
1 Zugsɔb da tis o nɔdi'es Zefanaya onɛ an Kus biig la labaar. Kus da anɛ Gedalaya biig ka Gedalaya mɛ an Amaraya biig ka Amaraya an Hezekia biig. Saŋkan la ka Josia onɛ da an Ammon biig la da zin' na'am gbauŋ zug, Juda teŋgbauŋʋn.San'auŋ linɛ kenna la yɛla
2 “M na piis si'el wʋsa
yis teŋgbauŋ la zug,”
Zugsɔb la pian'ʋkʋ la.
3 “M na san'am ninsaalib nɛ bʋnkɔnbid wʋsa,
nɛ niis banɛ bɛɛ agɔl
nɛ zimi banɛ bɛɛ atɛukʋn la.
M ya'a ti san'am ninsaalib teŋgbauŋ nwa zug,
nimbɛ'ɛdnam la na dig wʋʋ tandia'ana nɛ.”
Zugsɔb la pian'ʋkʋ la.
Juda tʋʋmbɛ'ɛd
4 Zugsɔb la lɛn yɛl ye,
“M na namis Juda dim wʋsa
nɛ banɛ bɛ Jerusalem tempʋʋgin la wʋsa.
M na san'am banɛ wʋsa kpɛlim bi'ela ka nan kpɛn dɔl Baal la;
ka kɛ ka ba tam banɛ wʋsa maan maana tisid bada nɛ teŋgbana la.
5 M na san'am nimbanɛ dʋt dɔɔd zugʋ pʋ'ʋsid nwadbibis la
nɛ banɛ mɔr Zugsɔb la yʋ'ʋri pɔɔd
ka lɛm pɔɔd nɛ ba'ar kanɛ yʋ'ʋri buon Molek yʋ'ʋr la.
6 M na san'am banɛ daa dɔl mam ka pʋ lɛn dɔllim la,
nɛ banɛ pʋ bɔɔd Zugsɔb yɛla bɛɛ ieed o sa'alʋg la.”
7 Bɛi baanlimm Zugsɔb la tuon,
bɔzugɔ Zugsɔb la dabisir la li'el ya.
Zugsɔb maalnɛ malʋŋ
ka pie banɛ ka o buol la ka ba bɛɛ ba kɔn'.
8 Zugsɔb la yɛl ye,
“Daakanɛ ka m na maali m malʋŋ la,
daakan la m na namis tuongatib, nɛ Juda na'abiis,
nɛ banɛ yɛɛd teŋ zʋŋ fuud la wʋsa.
9 Daakan la m na namis
banɛ ian'adi kpɛn'ɛd nɔŋ dim dɔɔdin
ma'ad ziri ka faand la'adi
pɛ'ɛnnɛ ba bada dɔɔd la.”
10 Zugsɔb la yɛl ya ye, “Daakan la,”
“kuŋ na nwɛ' Zimi Yaŋirin la,
ka kaasig yi Yapaala la ni na,
ka vuud na dammid zuoya la ni.
11 Kaasimi nɛ sʋnsa'aŋ, yanam banɛ yaa bɛ da' baba la,
bɔzugɔ ba na kʋ kpikpinkpinnib la wʋsa,
hali banɛ tɔlim anzurifanam la wʋsa mɛ na kpi'ilim.
12 Saŋkan la, m na nɔk fita ie Jerusalem tempʋʋginɛ
namis banɛ wʋsa tɛn'ɛsidi ba mɛŋ yɛla ma'aa la,
banɛ nwɛnɛ kuan'ari gɛndig daam gan'arin ka li san'am la.
Ba tɛn'ɛsidi ba sʋnfʋn sa ye
Zugsɔb la pʋn kʋ tʋm linɛ an sʋm bɛɛ bɛ'ɛdɛ.
13 Anina ka m na kɛ ka faandib faaɛn ba areza'as la wʋsa,
ka nwa'a ba ya' la sɔɔm-sɔɔm.
Ba na mɛ ya' ka kʋ nyaŋi kpɛn'ɛɛ,
ka sɛ tiis ka kʋ dii li wala.”
Zugsɔb dabistita'ar la yɛla
14 “Zugsɔb dabistita'ar la li'el ya,
li bɛnɛ yammin-yammin.
Kɛlisimi! Zugsɔb dabisir la saŋa, ba na kaasid nɛ sʋntɔɔg.
Zabzabidib la tʋkpiidʋg ma'aa na dʋt anina na.
15 Dabiskan la na anɛ sʋnpɛɛn dabisir,
sʋnsa'aŋ nɛ ɛndʋg na bɛɛ li daar.
Yɛla nɛ san'auŋ na bɛ
ka zibisʋg nɛ kpaandʋg bɛ zin'ig wʋsa,
daakan la na anɛ saŋgbansabilig nɛ lik.
16 Daakan la, ba na pieb zaba kasiŋkaan
ka nwɛ'ɛd tanp kuŋ
hali ba na nwɛ' tanp tembanɛ ka ba mɛ' zaŋguoma gilig la,
nɛ banɛ bɛ teŋkpɛmis la wʋsa.
17 M na namis nidib la,
ka kɛ ka ba kennɛ babinnɛ ieed suor nwɛnɛ zʋnzɔɔs nɛ
ban tʋm bɛ'ɛdi tis man Zugsɔb la zug.
Ba ziim na kpa'ae suoraadin,
ka ba niŋgbina pun'oe yadig teŋin la.
18 Ba anzurifa bɛɛ ba sanlima
kʋ tun'e faaɛn ba
Zugsɔb la sʋnpɛɛn daarɛ.
Zugsɔb sʋnpɛɛn linɛ dit wʋʋ bugum la
na di dunia la wʋsa.
Bɔzugɔ o na kɛ ka bʋn linɛ wʋsa mɔr vʋm
dunia kaŋa naae vuguri.”