Jerusalem tʋʋmbɛ'ɛd yɛla
3
1 Yɛltɔɔg na paae Jerusalem dim,banɛ mugusid nidib nɛ pitɔɔg
ka an banɛ ki'isid ka tʋm dian'ad tʋʋma la.
2 Nyɛɛsim kɛ ka ba zan'as
ka pʋ lɛn kɛligid Zugsɔb la nɔɔrɛ.
Sɔ' kae na nyaŋi sa'ali ba,
bɔzugɔ, ba zan'as sa'alʋg wʋsa.
Ba pʋ lɛn niŋ Zugsɔb la yadda
bɛɛ li'en Wina'am la tuonnɛ.
3 Ba tuongatib nwa'amnɛ nwɛnɛ gbigima nɛ,
ka ba sariakatib la an zaamnɔɔr zanku'a.
Ba ɛɛnti kʋnɛ ɔnb wʋsa ka si'el pʋ nied bɛogɔ.
4 Ba nɔdi'esidib la anɛ tita'alnam,
ka ba pʋʋg pʋ paad baa bi'elaa.
Ba maanmaannib miligid Wina'am Pʋ'ʋsim Yir,
ka tiakid o wada la.
5 La'am nɛ wala Zugsɔb onɛ bɛ nɛ ba la
anɛ Pʋpielim sɔb ka kʋ tʋm bɛ'ɛdɛ.
Bɛog ya'a nie wʋsa o kati saria nɛ sida
dabisir kae ka o gʋ'ʋŋid tʋʋm sʋma maalʋgɔ,
la'am nɛ wala banɛ tʋm tʋʋmfɛn'ɛsa la zi' nyannɛ.
6 Zugsɔb la yɛl ye,
“M san'am tɛɛnsi bas;
ka nwa'ae ba zin'ikpi'ema la wʋsa.
M kɛya ka ba pala kpɛlim nɛɛm,
ka nid baa yinne pʋ dɔlli li zugʋ gata.
Ba tembɛda la san'am ya;
hali baa nid yinne kʋ kpɛlim.
7 M yɛli tis teŋ la ye,
‘M mi' sʋ'ʋŋa ye ya na zɔɔm ka siaki m sa'alʋg!
Ala ka ya bɛllim zin'ig kʋ san'am,
ka m kʋ nwa'ae li bas
bɛɛ kɛ ka namisʋg luu ya zugin naa.’
Amaa ba nini daa nan kpɛm mu'oenɛ
nɛ tʋʋmbɛ'ɛd tʋʋma.”
8 Dinzugɔ, Zugsɔb la yɛl ye, “Gu'usimi ka daar kenna,
ka m na duoe zi'eni tu'a ya tʋʋmbɛ'ɛd la yɛla.
M gban'e ye m la'as tɛɛns wʋsa
nɛ na'am sʋ'ʋlim wʋsa nidib,
ka kpa'ae m sʋnpɛɛn kanɛ galis la yɛɛli ba.
Man sʋʋnr kanɛ zabid hali la
na kɛ ka Dunia wʋsa di bugum.
9 Ani ka m na pie m nidib nɔŋgbana ka li an nyain,
ka ba na buol mam Zugsɔb yʋ'ʋr
ka dʋ'ʋsi m yʋ'ʋr nɛ pʋtɛn'ɛr yinne.
10 M nimbanɛ widigi bɛ Kus teŋ kɔldaad la nya'aŋ
ka wɔ'ɔgidim la na mɔr piini na tisim.
11 Daakan la ba kʋ diisi ya nyan
bɛ'ɛd kanɛ ka ya maali tisim la zugɔ.
Bɔzugɔ m na yis nimbanɛ mɔr nyɛɛsim
ka maan sumalisim li zug la teŋ nwa pʋʋgini bas.
Ya kʋ ti lɛn mɔr tita'alim
man zuokanɛ ka m kɛ ka li bɛɛ li kɔn' tisim la zugɔ.
12 Amaa m na kɛ ka banɛ siedi ba mɛŋ
nɛ banɛ gban'adi ba mɛŋ sʋ'ʋŋa,
nɛ banɛ niŋid Zugsɔb yʋ'ʋr yadda la kpɛm bɛ teŋin la.
13 Israel dim banɛ kpɛlim la kʋ lɛn tʋm bɛ'ɛdɛ;
ba kʋ lɛm ma'ad dama'am,
bɛɛ kɛ ka ziri pian'abɛ'ɛd yiti ba nɔɔrin naa.
Ba na dit ka digi vʋ'ʋsid ka dabiem kae.”
Sumalisim yʋʋma
14 Zion pu'asada, yʋ'ʋmmi ka mɔr sumalisim;
Israel dima, dʋ'ʋsimi ya kʋkɔya agɔla!
Jerusalem pu'aba,
kɛlli ka ya sʋnya ma'ae ka ya maal sumalisim!
15 Zugsɔb la yisi ya namisʋg la
ka lɛbisi ya dataas la nya'aŋ.
Zugsɔb onɛ an Israel Na'ab la bɛɛ ya sʋʋgin!
Ya kʋ lɛn zɔt dabiem ye yɛlbɛ'ɛsi'a na ti paae yaa.
16 Daakan la, ba na yɛl Jerusalem ye,
“Zion teŋ dima, da zɔti dabiem,
da kɛ ka ya nu'us gɛɛn.
17 Zugsɔb onɛ aan ya Wina'am la bɛ nɛ ya,
o anɛ gandaug kanɛ na faaɛn ya.
O sʋnf na ma'ae ya zug hali.
O na bɛ nɛ ya baanlimm nɛ o nɔŋilim
o na maal sumalisim ya zug ka yʋ'ʋm yʋʋma.”
18 Ye Yanam banɛ mɔr sʋnsa'aŋʋ ya malʋŋ tiɛnr yɛla la
m na yisi li ya san'an,
bɔzugɔ li anɛ ziid nɛ nyannɛ tisi ya.
19 Saŋkan la m na namis banɛ namsidi ya la;
m na faaɛn banɛ an waba la ka la'asi ya nimbanɛ widig la na.
M na nie ba zut
zin'ikanɛ wʋsa ka ba da di nyan,
m na kɛ ka ba paam girima nɛ na'asi.
20 Saŋkan la m na la'asi ya,
ka mɔri ya kul na.
M na kɛ ka ya paam girima nɛ na'asi
dunia nwa nidib wʋsa sʋʋgin.
Ya nini ni ka m na kɛ
ka ya lɛm paam zusʋŋ ya'as!