Daniel nyɛ dau sɔ'
10
1 Na'ab Sarus n da di Pesia na'am la li yʋma atan' saŋa, si'el da nie pa'al Daniel onɛ yʋ'ʋri lɛm buon ye Belteseaza la. Labaar la da anɛ sida ka an zabtita'asi'a yɛla. Li da nie labaar la gbinnɛ pa'al o nier pʋʋgin. 2 Ka Daniel yɛl ye, “Saŋkan la man daa mɔri sʋnsa'aŋ bakuai muma atan'. 3 M daa pʋ di disʋŋ, bɛɛ ɔnb ni'im bɛɛ nɔk daam si'isi m nɔɔrɛ; m mɛ pʋ suoɛn kpaam bakuai atan' nwa sʋʋginɛ.”4 Yiiga nwadig la li dabisa pisi nɛ anaasi daar la, man daa zi'e kɔldatita'ar kanɛ ka ba buon Tigiris la gbɛog la. 5 M daa ʋki m nindaa nyɛ dau ka o yɛ fupielig ka nɔk sanlimvɛnliŋ sialɔɔdiŋe lɔɔ o siaa. 6 O niŋgbiŋ daa nyɛɛnnɛ wʋʋ gɔtiŋ nɛ, ka o nindaa ian'ad wʋʋ saa ian'asʋg nɛ, ka o kpʋkpama nɛ o nɔba nyɛɛn wʋʋ kʋntzɛn'ug linɛ ka ba saas nɛ, ka o vuud wʋʋ nimbabigi na pian'ad ka ba kʋkɔya vuud si'em la. 7 Man Daniel ma'aa daa nyɛ linɛ nie la; nimbanɛ daa bɛɛ m san'an la daa pʋ nyɛɛ lii, amaa dabiem daa gban'e ba nɛ hali ka ba zɔɔ su'a. 8 Alazug m daa kpɛlim nɛ m kɔn'ɔkɔn', gɔt bʋnkanɛ ka m nyɛ la; m niŋgbina wʋsa daa kpinɛ, ka m nindaa pɛlig hali ka m zi' man niŋidi m mɛŋ si'ela. 9 Ka m wʋm ka o pian'ad, ka man kɛlisid o la, ka gbɛɛm zɛɛgim ka m vanbini gbisid ka m nindaa kpa' teŋin.
10 Nu'ug daa si'isim ka duomi igini m nu'us nɛ m duma zug ka m pin'ili kirid. 11 Ka o yɛlim ye, “Daniel, Wina'am nɔŋif hali; kɛlisim man ye m yɛlif pian'asi'a la sʋ'ʋŋa ka duoe zi'en agɔla, bɔzugɔ nannanna ka ba tʋmim fʋ san'an na.” Ka on yɛlim nɛ'ɛŋa naae la ka m duoe zi'en ka kirid.
12 Ka o keŋ tuonnɛ yɛlim ye, “Daniel, da zɔt dabiem. Lin pin'il daakanɛ ka fʋ daa pin'ili sie fʋ mɛŋ Wina'am tuon ka bɔɔd ye fʋ baŋ linɛ bɛ la, o daa wʋmi fʋ sɔsʋg, linzug ka m kena ye m gandigi fʋ sɔsʋg la wʋsa. 13 Amaa Sʋntaana tʋmtʋm onɛ sʋ'oe Pesia sʋ'ʋlim la giŋim dabisa pisi nɛ yinne. Ka Maikel onɛ an maliaknam kpɛɛm yinne la kena sʋŋim, bɔzugɔ Sʋntaana tʋmtʋm onɛ sʋ'oe Pesia na'am yɛla la kɛ ka m yuug anina. 14 Nannanna m kena ye m yɛlif linɛ na maali fʋ nidib bɛog daar, ka fʋn na ti nyɛ si'el la anɛ bɛog sa yɛla.”
15 On da nan pian'ad anwa tisidim la, ka m gigilim ka sʋnr, ka m nindaa kpa' teŋin. 16 Onɛ ka m daa nyɛɛ o ka o nwɛnɛ dau la daa si'isi m nɔŋgban, ka m ya'ae m nɔɔri pin'ili pian'ad. M daa yɛl onɛ zi'e m tuon la ye, “Man nyɛ si'el la kɛnɛ ka dabiem gban'am, ka m zi' man niŋidi m mɛŋ si'ela. 17 Mam anɛ fʋ sankpan'as: m ye m niŋ walaa pian' nɛ fʋ, m Zugsɔba? M paŋ wʋsa naa ya, ka m pʋ lɛn tun'e vʋ'ʋsid sʋ'ʋŋaa.”
18 Ka onɛ nwɛnɛ dau la lɛn si'isim ka m niŋgbina la paam paŋ. 19 O daa yɛlim ye, “Da zɔt dabiem, fʋn kanɛ ka Wina'am zɔti fʋ nimbaanlig la! Mɔr sumalisim, ka kpɛ'ɛŋi fʋ mɛŋ, kpɛ'ɛŋimi fʋ mɛŋ!” On daa pian' tisim la, li daa kpɛmisim ka m yɛl o ye, “M Zugsɔba pian'am, ka fʋ tisim kpi'euŋ.” 20 Ka o bu'osim ye, “Fʋ mi' linɛ zugʋ kɛ ka m kɛɛn fʋ san'an naa? Li kʋ yuugɛ m na lɛbi zab nɛ Sʋntaana tʋmtʋm onɛ sʋ'oe Pesia yɛla la, ka m ya'a lɛb, onɛ sʋ'oe Grees yɛla la na kena; 21 amaa m na yɛlif linɛ sɔb Sida Gbauŋʋn la. Sɔ' pʋ sʋŋidim ka m zabida, ya'a ka' Maikel onɛ sʋ'oe yanam yɛla laa.