Daniel n sɔs Wina'am la yɛla
9
1 Zeesis biig Na'ab Darius onɛ an Media teŋ nid la da di Babilon na'am. 2 Yʋʋm kanɛ ka o da di na'am la ka man Daniel karim Wina'am gbana la ka gban'e li gbin, ka baŋ labaar kanɛ ka Zugsɔb la da yɛl Jeremia onɛ an nɔdi'es la ye, Jerusalem na bɛ yammid pʋʋgin yʋma pisyɔpɔi. 3 Alazug m da keŋ Zugsɔb Wina'am tuonnɛ bɛllim o nɛ winsɔsʋg nɛ nu'ug nwɛ'ɛb nɛ nɔlɔɔr, ka yɛ bɔto fuug ka nɔk tampɛligim bugi m nindaa sʋnsa'aŋ zug. 4 M da sɔs Zugsɔb onɛ aan m Wina'am la ka pɛligi m pʋʋg tʋʋmbɛ'ɛd linɛ ka ti tʋm la wʋsa yɛla ye,“Naa, m Zugsɔb Wina'am Tita'arɛ, fʋ san'an ka paŋ nɛ yɛl nyalima bɛ, ka fʋ tʋm wʋʋ fʋn maal nɔnaar si'em nɛ banɛ nɔŋif ka siaki fʋ zi'ela la. 5 Ti tʋm bɛ'ɛd ka maal linɛ ka' sʋ'ʋm. Ti anɛ bugusim dim ka kisif. Ti zan'asi fʋ nɔɔr nɛ fʋ wada la. 6 Ti pʋ siak ka di'e fʋ tʋmtʋmnib banɛ an nɔdi'esidib la nɔɔrɛ, banɛ da pian' fʋ yɛla tisi ti na'anam nɛ na'ayikpɛm, nɛ ti yaanam, nɛ nimbanɛ bɛ teŋin la wʋsa.
7 Ti Zugsɔba, fʋ anɛ kasi, amaa dabisbama, nyan di tinam banɛ an Juda dim nɛ Jerusalem nidib nɛ Israel nidib wʋsa banɛ bɛ yamma bɛɛ lalli, tembanɛ ka fʋ widigi ti niŋ la, li anɛ tinamɛ pʋ dɔllif nɛ pʋʋg yinne la zug. 8 Naa Zugsɔba, tinam nɛ ti na'anam nɛ ti na'ayikpɛm nɛ ti yaanam dinɛ nyan, bɔzugɔ ti tʋmnɛ taal linɛ ka fʋ kis. 9 Ti Zugsɔb Wina'am la anɛ nimbaanlzɔt, ka kɛti ti tʋʋmbɛ'ɛd taali basid, la'am nɛ tinamɛ ki'isid o la. 10 Ti pʋ di'e ti Zugsɔb Wina'am nɔɔr bɛɛ siak o zi'ela banɛ ka o dɔlis o tʋmtʋmnib banɛ an nɔdi'esidib la san'anɛ yɛli ti la. 11 Israel dim wʋsa zan'asi fʋ zi'ela ka fɛndig ka pʋ siaki fʋ nɔɔrɛ.
Alazug nɔpɔɔr nɛ tʋbtɛɛgir linɛ da sɔb Moses onɛ aan fʋ tʋmtʋm la gbana ni la luu ti zugin, tinamɛ tʋm taal la zug. 12 Fʋn da pian' zɛrigi ti nɛ ti na'anam la, ka yɛla paae ti wʋʋ fʋn da yɛl si'em la. Dunia la wʋsa pʋʋgin, yɛl nan paae sɔ' wʋʋ yɛlkanɛ paae Jerusalem dim laa? 13 Nwɛnɛ lin sɔb Moses wada gbauŋʋn si'em la, tɔɔg kaŋa wʋsa lii ti zugin na, la'am nɛ wala ti pʋ lɛb fʋn Zugsɔb onɛ aan ti Wina'am la san'anɛ bɔ sʋŋir, bɛɛ basi ti tʋʋmbɛ'ɛd wʋsa ka siaki fʋ sida la. 14 Zugsɔb la da pʋ kɛ ka li yuugɛ ka tɔɔg paae ti, bɔzugɔ Zugsɔb onɛ aan ti Wina'am la anɛ sida sɔb o tʋʋma wʋsa pʋʋgin. La'am nɛ wala ti pʋ siak o nɔɔrɛ.
15 Naa, Zugsɔb onɛ aan ti Wina'am, nannanna fʋnɛ yisi fʋ nidib Egipt teŋin nɛ fʋ paŋ tita'ar, ka da' yʋ'ʋri tisi fʋ mɛŋ hali ti paae zina, ti tʋm tʋʋmbɛ'ɛd, ti tʋm linɛ ka' sʋ'ʋm. 16 Naa, Zugsɔba, fʋ maannɛ si'el wʋsa nɛ sida, yisimi fʋ sʋnpɛɛn la Jerusalem zug, ka li anɛ fʋ teŋ nɛ fʋ zuor linɛ an kasi la. Tinam nɛ ti yaanam tʋʋmbɛ'ɛdi kɛ ka nimbanɛ gilig la wʋsa la'ad Jerusalem dim.
17 Nannanna, ti Wina'am, wʋmmi fʋ sankpan'asnam sɔsʋg. Fʋ nimbaanlzɔɔr la yɛla, zɔmi ti nimbaanlig, tinam nɛ Pʋ'ʋsim Yir kanɛ san'am la zug. 18 Wina'am, yɔ'ɔgimi fʋ tʋbir ka wʋm, lakimi fʋ nini gɔs teŋ kanɛ ka fʋ yʋ'ʋr bɛɛ ani la san'am si'em. Tinamɛ sɔsidif la, li ka' ye ti anɛ kasii, amaa fʋ pʋpielim la zug. 19 Naa, Zugsɔba, kɛlisim! Zugsɔba, kɛlli ti taali bas. Fʋ nimbaanlzɔɔr la zug da yuugɛ, bɔzugɔ fʋ teŋ la nɛ fʋ nidib la buonnɛ fʋ yʋ'ʋr.”
Pisyɔpɔi nam zin'is ayɔpɔi
20 M da nan kpɛn sɔsid o suguru man nɛ m nimbanɛ an Israel dim tʋʋmbɛ'ɛd yɛla la, ka lɛm bɛllimi m Zugsɔb Wina'am o zuor kanɛ an kasi la yɛla. 21 Ka man da nan bɛɛ ani sɔsid la, ka Gabirel, onɛ ka m da dɛŋi nyɛ zaansʋŋ pʋʋgin la, dɔl sisi'epiliŋi kɛɛn m san'an na winkɔɔr saŋa, ban maan maana saŋsi'a la. 22 O da pa'alim ka ye, “M yʋ'ʋn kena ye m pa'alif ka fʋ gban'e si'el wʋsa gbin. 23 Fʋn daa pin'ili sɔsʋg saŋsi'a la, ka fʋ winsɔsʋg la pʋn gandig, lin ka m kena ye m yɛlif. Fʋ anɛ onɛ mɔr girima hali, alazug kɛlisim pian'ad nwa ka gban'e zaansʋŋ la gbin. 24 Wina'am gban'e ye yʋma pisyɔpɔi zin'isa ayɔpɔi na gaad, ka fʋ nidib la nɛ tempʋkanɛ an kasi la nyaan gu'oe tʋʋmbɛ'ɛd ka sɔs suguru ba pitɔtʋʋma la zug ka tiaki bɛ pʋpielim bɛllim ka li kɛ ka nɔdi'esidib pian'ad lieb amɛŋa. Ka bu'oe malʋŋ kpaam niŋ Kasi Wʋsa Kasi Zin'igin la.”
25 Baŋim ka gban'e nɛ'ɛŋa gbin: Lin pin'il saŋkanɛ ka gban'ar la gban'e ye ba maligim mɛ' Jerusalem li zin'igin la, hali ti paae onɛ ka ba na bu'oe malʋŋ kpaam niŋ o zugin ka o an na'ab la na ti kena la, li na niŋ yʋma “ayɔpɔi” zin'is ayɔpɔi, ka lɛn an “ayɔpɔi” zin'is pisyuobʋ nɛ ayi'. Ka teŋ la nyaan maligim mɛ' ka suosʋma nɛ zaŋguoma bɛ, ka ba tu bʋmbu'ad; amaa li na anɛ tɔɔg saŋa. 26 Yʋma “Ayɔpɔi” zin'is pisyuobʋ nɛ ayi' la nya'aŋ, onɛ ka ba bu'oe malʋŋ kpaam niŋ o zug ka o an na'ab la ba na kʋʋ o ka li pʋ dɔl suorɛ. Na'ab la nimbanɛ na kena la na san'am tempʋʋg la nɛ Pʋ'ʋsim Yir la. Naar la saŋa na kena wʋʋ ku'om ɛɛn pɛ'ɛli badig si'em la. Tanp na nwɛ' hali keŋ paae li bɛn, nɛ san'auŋ linɛ ka ba pʋn gban'e la. 27 O na kɛ ka nɔnaar kanɛ ka o gban'e nɛ nidib bɛdegʋ la niŋ amɛŋa, ka li na bɛ bakuai yinne.a Bakuai la pʋsʋk o na kɛ ka maana wʋsa nɛ piini maana wʋsa gu'oe. O na ya'ab si'eli zi'el Pʋ'ʋsim Yir la lʋgir yinne ni linɛ na an bʋnkisʋg linɛ san'amid si'el mɛkama, hali ka ban gban'e san'auŋ si'a la nyaan lii o zugin.