Daniel n zaansim nyɛ pɛraug nɛ bʋʋg la yɛla
8
1 Na'ab Beliseaza n da di na'am la li yʋma atan' saŋa ka mam Daniel lɛn zaansim ya'as. 2 Zaansʋŋin la ka m nyɛ man zi'e Susa tempʋʋgin, linɛ bɛ Elam sʋ'ʋlimin la. M da zi'enɛ kpi'e Ulaae kɔldaug la. 3 M da nyɛ pɛraug ka o zi'e kpi'e kɔldaug la ka mɔr iila ayi'. Ka iil yinne wa'am gat yinne amaa ka yuolim nɔbig. 4 M da gɔt ka pɛ'og la zugudi ken ya-tuona nɛ ya-datiuŋ nɛ ya-dagɔbʋg. Bʋnkɔnbʋg da kae na nyaŋi zab nɛ o bɛɛ mɔr paŋi gat o. O da maannɛ o ya'amin ka lieb kpi'em.5 Man nan tɛn'ɛsidi li yɛla la, li pʋ yuugɛ ka m nyɛ bʋʋg ka o mɔr iil tita'ar ka li bɛɛ o nini ayi' la teŋsʋk, ka o naan ya-tuona puugid dunia la gat ka lɛɛ pʋ si'isid teŋa. 6 Bʋʋg la da kennɛ kpa'ad pɛrakanɛ mɔr iila ayi' ka zi'e kpi'e kɔldaug la tʋ'ʋsid o nɛ sʋnpɛɛn. 7 Ka m nyɛ ka o zabid nɛ pɛ'og la nwɛ'ɛdi kɔɔd o iila ayi' la. Pɛraug la da pʋ mɔr paŋ kanɛ na nyaŋi zab nɛ bʋʋg laa. Bʋʋg la da nwɛ' o bas teŋin ka nɔɔ o nɛ nɔba ka sɔ' kae na nyaŋi faaɛn pɛraug la basɛ.
8 Bʋʋg la da paam paŋ hali, amaa o kpi'euŋ la ti zu'oe la ka iil kanɛ kpi'em la kɔ'ɔgi li, ka iil bɛda anaasi lɛm bus zin'ikanɛ ka iil kaŋa la kɔ'ɔg la, tiesi kpa' dunia lʋga anaasi la wʋsa.
9 Iil ban teŋsʋk la yinne da lɛn yina an fiin, amaa ka nɔbigi lieb kpi'em kpa'ad ya-dagɔbʋg nɛ ya-nya'aŋ nɛ Teŋ vɛnliŋ la baba. 10 O da nɔbig hali ti paae agɔla ka zab nɛ arezana zabzabidib la ka sieba li teŋin na ka o nɔɔ ba nɛ nɔba. 11 O da dʋ'ʋs o mɛŋ ye o zemis arezana zabzabidib tuongat la, ka di'e daar wʋsa maan la yi tuongat la san'an, ka kɛ ka o Pʋ'ʋsim Yir la lieb zaalim. 12 Nɔɔr zan'asʋg zug, ba da nɔk zabzabidib la nɛ daar wʋsa maana yɛla tis o. Ka o nyaŋ si'el wʋsa ni, ka sida lɛn kae.
13 Ka m wʋm ka onɛ an kasi la pian', ka sɔ' mɛ an kasi ka bu'os o ye, “Li na yuugi paae wala ka man nyɛ si'el la tʋm? Zaansʋŋ linɛ pa'an daar wʋsa maan la yɛla nɛ yɛlkisʋg linɛ na zi san'auŋʋ kena nɛ banɛ na nɔk Pʋ'ʋsim Yir nɛ zabzabidib la tis ka ba nɔɔ-nɔɔ li nɛ nɔba la na yuugi paae wala ka maalɛ?” 14 Ka o yɛlim ye, “Li na nɔk dabisa tusa ayi' nɛ kɔbistan' (2,300), bɛogʋn nɛ yʋ'ʋŋ wʋsa, ka ba nyaan lɛm maligim maal Pʋ'ʋsim Yir la ya'as.”
Zaansʋŋ la gbin
15 Mam Daniel n nan gɔsid man nyɛ si'el la ka mɔɔd ye m gban'e li gbin la, m nyɛ ka sɔ' zi'e m tuonnɛ nwɛnɛ ninsaal. 16 Ka m wʋm ka dau naan Ulaae kɔlʋgin la buon ye, “Gabirel, yɛlim dau kaŋa on nyɛ si'el la gbin.” 17 On da li'el man zi'e si'el la, ka dabiem gban'am ka m lu avanba, ka o yɛl ye, “Ninsaal biiga, baŋim ye fʋn nyɛ si'el la pa'annɛ naar saŋa yɛla.” 18 On nan pian'adi tisidim la ka m gbisid ka m nindaa kpa' teŋ, ka o duomi zi'eli m nɔba zug. 19 O da ye, “M na yɛlif tɔɔg linɛ na kɛn naar saŋa na, bɔzugɔ fʋn nyɛ si'el la pa'annɛ linɛ na maal naar saŋa la. 20 Pɛraug kanɛ mɔr iila ayi' ka fʋ nyɛ la pa'annɛ Media nɛ Pesia dim na'anam yɛla. 21 Bʋʋg la pa'annɛ Girik dim sʋ'ʋlim yɛla, ka iil tita'ar kanɛ bɛ nini la teŋsʋk la pa'annɛ ba yiiga na'ab la yɛla. 22 Iila anaasi banɛ lɛdig iil kanɛ kɔ'ɔg la zin'ig la pa'annɛ sʋ'ʋlim anaasi banɛ na duoe sʋ'ʋlim la ni, amaa ka ba paŋ kʋ an wʋʋ yiiga din la.
23 “Ba na'am la ya'a ti bɔɔd naar, ba tʋʋmbɛ'ɛd na zu'oe, ka na'ab si'a na kena, ka o sʋnf kpi'em hali, ka sɔ' wʋsa zɔt o, ka o an dama'am sɔb. 24 O na kpi'em hali, amaa li ka' o mɛŋ paŋ zugɔ. O na zi san'auŋ tita'ar na ka nyaŋi maal on ye o maan si'el wʋsa. O na nyaŋi kʋ ninkpi'ema nɛ Wina'am nidib la. 25 O ziri la zug o na kilim bʋmmɔr, ka gɔs o mɛŋ ka o tiraan kae. Ka ba ya'a ti tɛn'ɛs ye yɛl kae, o na kʋ nidib bɛdegʋ ka duoe zi'enɛ ki'is na'anam wʋsa Na'ab la. La'am nɛ wala, o na san'am, ka li lɛɛ ka' nɛ ninsaal paŋa.
26 “Zaansʋŋ kanɛ ka fʋ zaansim zaŋi keŋ zaam nɛ bɛkɛung yɛla la anɛ sida. Amaa da kɛ ka sɔ' baŋɛ, bɔzugɔ li pa'annɛ bɛog yɛla linɛ nan lal hali.”
27 Mam Daniel da gɛnnɛ ka li ban'a dabisa bɛdegʋ, ka nyaan nyaŋi lɛbi tʋm tʋʋm banɛ ka Na'ab tisim la. Zaansʋŋ la da pakim ka kpɛn'ɛsim dabiem bɔzugɔ m da pʋ nyaŋi gban'e li gbinnɛ.