Daniel n zaansim nyɛ bʋnkɔnbid anaasi la yɛla
7
1 Beliseaza n da di na'am yʋʋm si'a la, Daniel da dignɛ o gadʋg zug ka zaansim. O da sɔb on zaansim nyɛ si'el la digil. 2 O da yɛl ye, “Zaansʋŋ la pʋʋgin ka m nyɛ sisi'etita'ar ka li da'adi yit lʋga anaasi dammid atɛuk ku'om la. 3 Ka bʋnkɔnbkpi'ema anaasi banɛ pʋ nwɛn taaba da naan atɛuk la pʋʋginɛ dʋ na.4 “Yiiga sɔb la da nwɛnɛ gbigim, ka mɔr kpʋkpama ka li nwɛnɛ abaar kpʋkpama nɛ. Ka m gɔsid o hali ka o kpʋkpama la ti vuoɛn ka ba ʋk o teŋin la duoe zi'el o nɔba zug wʋʋ ninsaal nɛ, ka nɔk ninsaal ya'am tis o.
5 “M da nyɛ bʋnkɔnbkanɛ paas ayi' la ka o nwɛnɛ bʋnyua, ka zi'e nɔbyiuŋ, ka ga' sapiris atan' o nyina ni, ka ba yɛl o ye, ‘Duom ka ɔnb ni'im linɛ aan fʋ din la tig.’
6 “Lin nya'aŋ ka m lɛn gɔsi nyɛ yinne ya'as ka on nwɛnɛ wɛbaa nɛ. Ka kpʋkpama anaasi bɛɛ o nya'aŋ nwɛnɛ niiŋ kpʋkpama. Bʋnkɔnbkaŋa daa mɔri zut anaasi, ka ba tis o kpi'euŋ ye o sʋ'ʋg nidib.
7 “Lin nya'aŋ la ka yʋ'ʋŋ sɔb ka m zaansim nyɛ bʋnkɔnbʋg kanɛ paas anaasi la ka o an bʋnzɔtir ka mɔr dabiem ka mɛ mɔr paŋ hali. O nyina la da anɛ bɛda-bɛda ka an kʋnt; ka o mɔri ɔnbid ka san'amid o dataas, ka linɛ wʋsa kpɛlim ka pʋ san'am la ka o nɔɔd nɛ o nɔba. On da bɛ nɛ o kɔn' nɛ bʋnkɔnbid banɛ ka m pʋn dɛŋi nyɛ la wʋsa, ka mɔr iila piiga. 8 Man da nan tɛn'ɛsid iila la yɛla la, ka iil yinne lɛm busi yi bama la teŋsʋk na, ka nan an bʋmbil. Ka yiiga iila atan' vɔn'. Onɛ yuolim yina la daa mɔri nini ka li nwɛnɛ ninsaal nini nɛ, ka mɔr nɔɔri pian'adi dʋ'ʋsid o mɛŋ.
9 “Man daa gɔsid la,
“ka nyɛ ka ba yis na'am gbana na digil,
ka onɛ da pʋn bɛ yʋʋmpʋkʋda saŋa la
lɛb na zin'in o na'am gbauŋ zug.
O fuug da pɛlignɛ wʋʋ sakuga nɛ,
ka o zug zuobid pɛlig wʋʋ gungum.
O na'am gbauŋ la da ian'adnɛ pil-pil wʋʋ bugum,
ka bugum diti li lɛuŋʋn la yit na.
10 Bugum da naanɛ o tuonnɛ,
pʋbigidi yit na wʋʋ kɔldaug ku'om nɛ.
Maliaknam tusa-tusa da bɛɛ o san'anɛ tʋmmi tisid o
ka tusa piiga zin'is tusa piiga zi'e o tuon.
Ka ba zin' sariakadib zin'igin la,
ka lak gbana la.
11 “Ka m kpɛn gɔsid iil la pian'adi dʋ'ʋsid o mɛŋ si'em la. M da gɔsid o ala ka ba ti kʋ bʋnkɔnbʋg la ka san'am o niŋgbiŋ la ka lɔb o bas bugumin. 12 Bʋnkɔnbbama la, ba daa faaɛn ba kpi'euŋ la, amaa ka siak ye ba kpɛn vʋe saŋa bi'ela.
13 “Ka m nyɛ sɔ' m zaansʋŋ la pʋʋgin yʋ'ʋŋ kan la, ka o zi'e m tuonnɛ nwɛnɛ ninsaal biig la, naan arezana kenna nɛ saŋgbana. O da li'el onɛ da pʋn bɛ yʋʋmpʋkʋda saŋa la ka ba biel oo kɛɛn o san'an na. 14 Ba da tis o kpi'euŋ nɛ girima nɛ paŋ tita'ar, ka nidib wʋsa nɛ sʋ'ʋlim nɛ buudi wʋsa wɔ'ɔg o. O kpi'euŋ la na bɛ saŋa linɛ ka' bɛnnɛ, ka o sʋ'ʋlim la ka' san'auŋɔ.”
Zaansʋŋ la gbin
15 Daniel da lɛn yɛl ye, “Man zaansim nyɛ si'el la daamim bɛdegʋ. 16 Ka m li'el nimbanɛ zi'e anina la yinne, ka bu'os o lin sid pa'an si'el yɛla viki.”
Ka o da yɛlim ka pa'alim si'el wʋsa gbin. 17 O da yɛl ye “Bʋnkɔnbid anaasi la zi'enɛ pa'al sʋ'ʋlim nam anaasi banɛ na duoe na m bɛ dunia kaŋa zugin. 18 Amaa Wina'am Onɛ Gaad Si'el Wʋsa la nidib na di'e sʋ'ʋlim la ka sʋ'ʋgi li saŋa linɛ ka' naarɛ; ɛɛn, saŋa linɛ ka' bɛnnɛ.” 19 M da bɔɔd ye m baŋ bʋnkɔnbʋg kanɛ paas anaasi la pa'an si'el, bɔzugɔ, on da bɛɛ o kɔn' nɛ bama la ka lɛn an bʋnzɔtir ka mɔr kʋnt nyina nɛ anzurifa nɔb-ɛɛns ka an bʋnkɔnbʋg kanɛ san'amid ka kʋʋdi o dataas ka nɔɔd banɛ kpɛlim la nɛ nɔba. 20 M mɛ da bu'os ye m baŋ iila piiga banɛ bɛɛ o zugin la pa'an si'el, nɛ iil kanɛ kpɛlim nya'aŋi yina ka kɛ ka iila atan' vɔn' ka bas o la gbin. Li anɛ iil kan la da gat o taaba la ka mɔr nini nɛ nɔɔri pian'adi dʋ'ʋsid o mɛŋ la. 21 Man da nan gɔsid la, ka iil la zabid nɛ Wina'am Onɛ Gaad Si'el Wʋsa la nidib la nyaŋidi ba. 22 Hali ka onɛ da pʋn bɛ yʋʋmpʋkʋda saŋa la ti kena kad saria sʋŋ o nidib ka ba nyaŋi di'e sʋ'ʋlim la sʋ'ʋgi li.
23 On da pa'alimi li gbin si'em nwa: “Bʋnkɔnbʋg kanɛ paas anaasi la pa'annɛ sʋ'ʋlim kanɛ na kɛn dunia na. Li na bɛɛ li kɔn' nɛ sʋ'ʋlim banɛ bɛ la wʋsa, ka na nɔ dunia wʋsa teŋin nɛ nɔbaa san'ami li. 24 Iila piiga la pa'annɛ na'anam piiga banɛ na yi sʋ'ʋlim kaŋa ni na. Ban ya'a gaadi naae, na'ab yinne na kenaa bɛɛ o kɔn' nɛ banɛ dɛŋ tuon la; o na nyaŋ na'anama atan' yisi ba na'amin la. 25 O na pian' zɛrig Wina'am Onɛ Gaad Si'el Wʋsa la ka namisi o nidib la, ka mɔ ye o tiaki ba malima dabisa nɛ ba wada la. O na namis siakidib la yʋma atan' nɛ pʋsʋk. 26 Amaa ba na zin'in sariakadib zin'igin la ka faaɛn o paŋ la yii o san'an ka san'ami o sʋ'ʋlim la nyain. 27 Ka sʋ'ʋlim la na'am nɛ paŋ nɛ kpi'euŋ linɛ bɛ dunia ni la wʋsa, ba na nɔki tis siakidib banɛ an Wina'am Onɛ Gaad Si'el Wʋsa la nidib. Ba sʋ'ʋlim la na an sʋ'ʋlim linɛ bɛ saŋa linɛ ka' bɛnnɛ ka na'anam na na'as o ka siak o nɔɔr.”
28 “Tɔ, labaar la bɛnnɛ nwa. Li daa daam man Daniel hali, ka m pʋtɛn'ɛr wʋsa widig, ka m nindaa san'am, amaa m daa kɛ ka labaar la kpɛlimi m san'an ka m pʋ yɛl sɔ'.”