Daniel n bɛ gbigima bɔkin la yɛla
6
1 Na'ab Darius da gaŋ kpɛɛmnam kɔbiga nɛ pisi ye ba gɔs tɛɛns banɛ bɛɛ o sʋ'ʋlimin la, 2 ka lɛn gaŋ Daniel nɛ kpɛɛmnam ayi' banɛ na pa'an nidib kɔbiga nɛ pisi la na tʋm si'em. Kpɛɛmnam atan' nwa tʋʋm da anɛ ye ba gɔs ka sɔ' da zam Na'ab la ka o na'am nyɛ pɔ'ɔgirɛ. 3 Daniel da tʋm hali gaad o taaba la wʋsa ka li pie Na'ab la pʋʋg, ka o gban'e ye o gaŋ Daniel ka o an kpɛɛm kanɛ na gɔt si'el wʋsa o sʋ'ʋlimin la. 4 Nɛ'ɛŋa zug da kɛnɛ ka o taaba la ie suokanɛ ka ba na paam si'eli ma'aa tabil Daniel zaŋi ken sʋ'ʋlim la yɛla, amaa ba da pʋ nyɛ suorɛ. Ba da pʋ nyɛ zam si'a o san'anɛ, bɔzugɔ o da anɛ pʋpiel ka zam bɛɛ gbɛlʋŋ ka' o san'anɛ. 5 Ba da maki gʋ'ʋŋ ka yɛl taaba ye, “Ti kʋ nyɛ suosi'a ma'aa ziil Daniel, ka li ya'a ka' li lɛb nɛ o Wina'am la wada babaa.”6 Alazug kpɛɛm bama da la'as taaba gumm keŋ Na'ab la san'anɛ yɛl o ye, “Naa, Na'ab Darius! 7 Fʋ na'ayikpɛm nɛ teŋ la kpɛɛmnam nɛ banɛ san'an banɛ sʋŋidif ka fʋ gur teŋ la gban'e ka siak ye fʋ tikim nu'ug ye sɔ' da sɔs si'el wina bɛɛ teŋgban si'a bɛɛ ninsaal sɔ' san'an dabisa pistan' pʋʋginɛ, asɛɛ fʋn ma'aa. Ka onɛ ki'is zi'elkaŋa, ba na lɔb o bas gbigima bɔkin. 8 Nannanna, Na'aba, sɔm ka tik nu'ug linɛ na kɛ ka sɔ' kʋ nyaŋi tiaki lii; ka li dɔl Media nɛ Pesia dim wada linɛ ka sɔ' kʋ nyaŋi tiakɛ.”
9 Na'ab Darius sid da sɔb wada la ka tik nu'ug.
10 Daniel n da wʋm ye Na'ab la sɔbi tik nu'ug ka li yi paalʋ la, o da kul yinne kpɛn' o dɔkanɛ bɛ girimbisa zug la yɔ'ɔg o takoronamɛ kpa' Jerusalem teŋ. Daar wʋsa o da iginid o duma zug nɔɔr atan' pʋ'ʋs Wina'am wʋʋ on daa ɛɛn pʋn maan si'em la. 11 Dap bama da la'as taabaa keŋ nyɛ ka Daniel sɔsid Wina'am bɔɔd sʋŋir. 12 Ka ba keŋ Na'ab la san'anɛ pian' nɔɔr kanɛ ka o zi'el la yɛla ye, “Naa, mɛ fʋ zi'el wada ye lin yi saŋkaŋa ti paae dabisa pistan' sɔ' da sɔs si'el teŋgban si'a bɛɛ ninsaal sɔ' san'an ka li ya'a ka'anɛ fʋn ma'anɛ, ka onɛ zan'as ban on lɔb o bas gbigima buugi nɛ?”
Ka Na'ab la lɛbis ye, “Wada la zi'enɛ wʋʋ Media nɛ Pesia dim wadaa an si'em la ka sɔ' kʋ nyaŋi tiaki lii.”
13 Ka ba yɛl Na'ab la ye, “Naa, Na'aba, Daniel, onɛ yi Juda na ka an yammis la nid yinne la, ki'isi fʋ nɔɔr nɛ fʋ wada linɛ ka fʋ sɔb ka tik nu'ug la. O nan sin ka pʋ'ʋsidnɛ nɔɔr atan' daar yinne.” 14 Na'ab la wʋm nɛ'ɛŋa la ka li daam o hali, ka o mɔ on na niŋ si'em yis Daniel n bas, ka mɔ hali gʋ'ʋŋ ka winnig ti li.
15 Nidib la da la'as taaba gumm keŋ yɛl Na'ab la ye, “Naa, Na'aba, da tam ye Media nɛ Pesia dim wada la kʋ nyaŋi tiakɛ.” 16 Alazug Na'ab la da bas nɔɔr, ka ba mɔr Daniel na lɔb o bas gbigima buugin la. Na'ab la da yɛl Daniel ye, “Wina'am kanɛ ka fʋ pʋ'ʋsid o saŋa wʋsa la na faaɛn fʋ bas!”
17 Ba da bilig kugtita'ari kena diinl buug la nɔɔr, ka Na'ab la tik nɛ o mɛŋ baŋ zanbin nɛ o kpɛɛmnam la zanbina mɛn, pa'al ye Daniel n bɛ yɛlsi'a pʋʋgin la kʋ maligin tiakɛ. 18 Ka Na'ab la lɛbi kul o yin ka pʋ di bɛɛ kɛ ka ba nwɛ' kɔna wʋʋ ban ɛɛnti niŋid si'em la. O da pʋ nyaŋi gbisɛ.
19 Bɛogʋ da nie la, Na'ab la da isig asuba zɔ tɔ'ɔtɔ keŋ gbigima buugin la. 20 On da li'el la, o da tansi buol Daniel nɛ kʋkɔtita'ar ye, “Daniel, Wina'am Onɛ Vʋe la tʋmtʋmma, fʋ Wina'am kanɛ ka fʋ pʋ'ʋsid saŋa wʋsa la nyaŋi faaɛn fʋ yis gbigima la nii?”
21 Ka Daniel lɛbis ye, “Naa, Na'aba! 22 M Wina'am la tʋmnɛ o maliak ka o kena kpar gbigima la nɔya. Ba pʋ maalim si'ela, bɔzugɔ o nyɛ ka m pʋ mɔr taal si'aa. M mɛ nan zi' tʋm si'eli gɛsigi fɔ, naa Na'aba.”
23 Na'ab la sʋnf da ma'ae hali ka o tans ye ba yisim Daniel gbigima la san'an na tɔ'ɔtɔ. Ka ban da yis Daniel na la, si'el-si'el da pʋ ɛnbig oo bɔzugɔ o da niŋ o Wina'am yadda.
24 Na'ab la da tis nɔɔr ye ba gban'am banɛ faa tis Daniel zaalim-zaalim la na lɔb gbigima buugin la, ban nɛ ba biis nɛ ba pu'ab wʋsa. Ban da lɔbi ba la, ba da nan pʋ paae teŋa ka gbigima la pʋn gban'e ba ɔnb ka kɔɔ ba kɔnba bugusi bugus.
25 Na'ab Darius da sɔbi tis nidib wʋsa nɛ sʋ'ʋlim wʋsa nɛ buudi wʋsa teŋ la wʋsa zug ye;
“Wina'am na tisi ya yɛlsʋm bɛdegʋ!
26 M sɔbid gbauŋ kaŋa tisid sɔ' wʋsa: tisimi Daniel Wina'am la girima ka na'as o.
Bɔzugɔ o anɛ Wina'am Kanɛ Vʋe
ka bɛ saŋa linɛ ka' bɛnnɛ.
O sʋ'ʋlim ka' san'auŋʋ,
o paŋ la ka' naarɛ.
27 Onɛ nyaŋidi faand ka tisid yɔlisim;
onɛ maan nyalima nɛ kilima
arezana nɛ dunia wʋsa ni.
Onɛ mɛ faaɛn Daniel
n yis gbigima la ni.”
28 Alazug Daniel da lieb nintita'ar Na'ab Darius nɛ Na'ab Sarus onɛ da an Pesia teŋ nid la na'am saŋa.