Linɛ sɔbid dɔkpinnin la yɛla
5
1 Beliseaza onɛ an na'ab la da maal diibi tis o kpɛɛmnam la ban tusir, ka on nɛ ban la'an zin' nuud daam. 2 Ban da nuud daam la, o da tʋm ye ba kem vaae sanlima nɛ anzurifa bʋtiis linɛ ka o yaab Na'ab Nebukadnɛza da vaae Pʋ'ʋsim Yin linɛ bɛ Jerusalem teŋin la na ka on nɛ o na'ayikpɛm la nɛ o pu'ab nɛ o pu'abibis la nɔki nu daam. 3 Ba sid da mɔr sanlima bʋtiis banɛ ka ba da vaae Wina'am Pʋ'ʋsim Yin Jerusalem teŋin la mɔri kena, ka na'ab la nɛ o na'ayikpɛm nɛ o pu'ab nɛ o pu'abibis la nɔki nu daam la. 4 Ban da nan nuud daam la, ba da wɔ'ɔgidi ba bada banɛ ka ba kud nɛ sanlima nɛ anzurifa nɛ kʋntzɛn'ug nɛ kʋnt nɛ daad nɛ kuga la.5 Li pʋ yuugɛ ka ninsaal nu'ubil nie na ka pin'ili sɔbid dɔkpin zugʋ, kpi'e zin'ikanɛ ka ba nyu'oe fitiri zi'el na'ayin la. Na'ab la gɔsid nu'ubil la ka li sɔbid la, 6 o nindaa daa tiak nɛ ka dabiem kpɛn' o ka o duma pin'ili nwɛ'ɛd taaba ka o nɔba kpi.
7 Na'ab la da tʋm buol tiim dim nɛ banɛ tʋm nyalima nɛ banɛ nyɛt yɛla yɛt, ka bɛ Babilon la ye ba kena; ka ba paae na ka o yɛli ba ye, “Sɔ' ya'a nyaŋi karim sɔb la ka yɛlimi li gbin, m na yɛɛl o na'am fuug ka nɔk sanlima niŋgɔnkɔrigi kɔl o, ka onɛ na an onɛ tia'al atan' gat sɔ' wʋsa m sʋ'ʋlim nwa ni.”
8 Ya'am dim banɛ an na'ab la nidib la wʋsa da kpɛn' na, amaa ba da pʋ nyaŋi karim sɔb la, bɛɛ yɛl Na'ab la li gbinnɛ. 9 Dabiem da maligim kpɛn' Na'ab Beliseaza ka o sʋnf san'am hali. O ya'am dim la sʋnf mɛ da san'amya hali.
10 Pu'ana'ab la da wʋm Na'ab nɛ o na'ayikpɛm la pian'ad la, ka yii kpɛn' diib zin'igin la ka ye, “Naa, Na'aba, da zɔt dabiem, mɛ da kɛ ka fʋ sʋnf san'am! 11 Dau sɔ' bɛɛ fʋ sʋ'ʋlim nwa ni ka wina banɛ an kasi la siig bɛɛ o ni. Fʋ saam saŋa la ba da nyɛ ka o anɛ onɛ mɔr mi'ilim nɛ ya'am nɛ baŋir wʋʋ wina la nɛ. Fʋ saam Na'ab Nebukadnɛza da gaŋ o ka o an tiim dim nɛ banɛ tʋm nyalima nɛ banɛ ye ban nyɛt yɛla yɛt la wʋsa kpɛɛm. 12 Daniel kaŋa onɛ ka ba lɛm buon ye Belteseaza la, ba da nyɛ ka o ya'am vʋe ka o mɔr baŋir ka gban'ad pian'ad gbin, ka lɛn nyaŋidi pa'an zaansʋŋ gbin, ka bʋkid bʋgʋlʋm-bʋgʋlʋm, ka tun'e wɛligid yɛl kpi'ema. Buolim Daniel na, ka o na yɛli ya sɔb la gbin.”
13 Dinzug ba da mɔr Daniel n kɛn Na'ab la san'an na, ka Na'ab la bu'os o ye, “Fʋ anɛ Daniel, nimbanɛ ka Na'ab, onɛ aan m saam la, da gban'e Juda n mɔri kena la yinnee? 14 M wʋm ye wina siig bɛɛ fʋ ni ka fʋ mɔr pʋtɛn'ɛr nɛ baŋir ka fʋ ya'am la bɛɛ li kɔn'. 15 Ba mɔr ya'am dim nɛ tiim dimi kena ye ba karim sɔb nwa ka yɛlimi li gbin, amaa ba pʋ nyaŋi yɛlimi li gbinnɛ. 16 M wʋm ye fʋ na nyaŋi yɛl yɛlsu'ada gbin ka sʋŋi maal yɛlmugusa, hali baa li ya'a kpi'em si'em. Tɔ; fʋ ya'a nyaŋi karim sɔb nwa ka yɛlimi li gbin, m na yɛɛlif na'am fuug ka kɔllif sanlim niŋgɔnkɔrig, ka kɛ ka fʋ na an onɛ tia'al atan' gat sɔ' wʋsa m sʋ'ʋlim nwa ni.”
17 Daniel da lɛbis Na'ab la ye, “Kɛlli fʋ piini la ka li aan fʋ mɛŋ din, ka nɔk yɔɔd la tis fʋn bɔɔd sɔ' wʋsa. La'am nɛ wala, Na'aba, man na karim sɔb la tisif ka yɛli fʋ li gbin.
18 “Naa, Na'aba, Wina'am Onɛ Gaad Si'el Wʋsa la da tisi fʋ saam Nebukadnɛza dunia paŋ nɛ kpi'euŋ nɛ girima nɛ yʋ'ʋr. 19 On da tis o kpi'euŋ si'a la, nidib nɛ sʋ'ʋlim nɛ buudi wʋsa da kiridnɛ ka zɔt o dabiem. Banɛ ka o da gban'e ye o kʋ o kʋʋdnɛ; banɛ ka o gban'e ye o tis yɔlisim o tisidnɛ yɔlisim; banɛ ka o bɔɔd ye o paasi ba kpɛuŋ o paasidnɛ kpɛuŋ; ka banɛ ka o bɔɔd ye o sigis o sigisidnɛ. 20 Amaa o sʋnfʋ da digilim ka nyɛɛsim kɛ ka o lieb tita'al la, ba da sigis o, o na'amin la ka yis o girima la. 21 Ba da kad o yis o nidib sʋʋgin, ka nɔk bʋnkɔnbʋg ya'am kpɛn'ɛs o; o da la'am bɛnɛ nɛ wɛogʋn bʋmis ka ɔnbid yaama wʋʋ niigi nɛ; ka mɛligim naamid agɔlli lut o niŋgbina la zug, hali ka o nyaan ti siak ye Wina'am Onɛ Gaad Si'el Wʋsa la sʋ'oe ninsaalib sʋ'ʋlim, ka on bɔɔd sɔ' ka o diisid o na'am.
22 “Amaa Beliseaza, fʋn onɛ aan o biribiŋ la pʋ sie fʋ mɛŋa la'am nɛ fʋn mi' nɛ'ɛŋa wʋsa la. 23 Fʋ lɛɛ nɔknɛ fʋ zugʋ kpa'anɛ Zugsɔb onɛ sʋ'oe Arezana la. Fʋ kɛ ka ba nɔk o Pʋ'ʋsim Yin bʋtiis la tisif ka fʋn nɛ fʋ kpɛɛmnam nɛ fʋ pu'ab nɛ pu'abibis nɔki li nu daam. Fʋ wɔ'ɔgid wina banɛ ka fʋ kud nɛ anzurifa nɛ sanlima nɛ kʋntzɛn'ug nɛ kʋnt nɛ daad nɛ kuga la, banɛ kʋ nyaŋi nyɛ, bɛɛ wʋm, bɛɛ gban'e pian'ad gbin la. Amaa fʋ pʋ na'as Wina'am kanɛ mɔri fʋ nyɔvʋr nɛ fʋ suoya wʋsa o nu'ugin laa. 24 Dinzug ka o tʋm nu'ug la ka li kena sɔb labakaŋa.
25 “Lin da sɔb si'em nwa: MENE, MENE, TEKEL, nɛ PARSIN.
26 “Sɔb la gbinnɛ nwa: Mene gbin anɛ ‘kal.’ Wina'am kaali fʋ na'am la dabisa ka zian'am ka li bɛn paae. 27 Tekel gbin anɛ ‘makir’, ba maki fʋ gɔs ka fʋ ka' vɔɔnrɛ. 28 Parsin gbin anɛ ‘Pesia dim’, ka li gbin pa'al ye, ‘pʋdigir’. Fʋ sʋ'ʋlim la pʋdignɛ tis Media nɛ Pesia dim.”
29 Ka nwɛnɛ Beliseaza pʋn dɛŋi digil nɔsi'a la, ba sid da nɔk na'am fuugʋ yɛɛl Daniel ka nɔk sanlima niŋgɔnkɔrigi kɔl o ka mɔɔl ye onɛ tia'al kpɛɛmnama atan' sʋ'ʋlim la ni.