Nebukadnɛza zaansim tiig yɛla
4
1 Man Na'ab Nebukadnɛza sɔb gbauŋ kaŋa tisid nidib nɛ sʋ'ʋlimnam nɛ buudi wʋsa banɛ bɛ dunia wʋsa ni yɛt ye,Ya na paam yɛlsʋm bɛdegʋ!
2 M mɔr sumalisim ye m yɛli ya tʋʋmnyalima banɛ ka Wina'am Onɛ Gaad Si'el Wʋsa la tʋm tisim.
3 O tʋʋmnyalima la zu'onɛ hali,
o tʋʋm titada la kpi'emnɛ galis!
O sʋ'ʋlim la ka' bɛnnɛ;
o kpi'euŋ la bɛ nɛ saŋa linɛ ka' naarɛ.
4 Man, Nebukadnɛza daa bɛnɛ m mɛŋ yin linɛ an na'ayir la mɔri m arezak ka li siakim. 5 M daa zaansim zaansʋŋ ka dabiem kpɛn'ɛm hali. Man daa digi m gadʋg zug la ka zaansim nyɛ bʋnsieba la daa kpɛn'ɛsim dabiem pamm. 6 Ka m tis nɔɔr ye ba la'asim ya'am dim banɛ bɛ Babilon teŋin wʋsa na ka ba yɛlim zaansʋŋ la gbin. 7 Tima dim nɛ ya'am dim la daa la'as na ka m yɛli ba zaansʋŋ la, ba daa pʋ nyaŋi yɛlimi li gbinnɛ. 8 Lin nya'aŋ ka Daniel ti paae m tuon na, ka m yɛl o zaansʋŋ la. (O yʋ'ʋri buon Belteseaza, m bada la yinne yʋ'ʋr ka m nɔki pʋd o. Wina banɛ an kasi la siig bɛɛ o zug.)
9 Ka m yɛl ye, “Belteseaza, fʋn onɛ sʋ'oe banɛ nyɛt yɛla yɛt la wʋsa, man mi' ye wina banɛ an kasi la siig bɛɛ fʋ ni, ka si'el kae tɔi tisif nɛ fʋn na baŋɛ. Tɔ, m zaansʋŋ la nwa, pa'alim mɛ li gbin: 10 Man digi m gadʋg zugʋ gbisid ka nyɛ si'eli nwa: m nyɛnɛ ka tiig zi'e m tuon, teŋ la teŋsʋkʋ, wa'am hali. 11 Tiig la daa nɔbignɛ zu'oe ka mɔr paŋ ka li wa'alim keŋ tʋn saŋgbauŋ, ka dunia wʋsa nyɛti li. 12 Li vaand la daa vɛnlnɛ hali, ka li wala la zu'oe hali, ka dunia wʋsa na nyaŋi di. Niimis wʋsa daa nyaŋi ya'anɛ li zug, ka tɛɛ ba tɛɛdi li zug, ka bʋnvʋr linɛ bɛ dunia wʋsa dii li wala.
13 Zaansʋŋ la pʋʋgin man nan dig la, ka m nyɛ maliak ka o naan arezana ni sigid na. 14 O daa tans nɛ kʋkɔtita'ar ye, ‘Nwaam tiig la ka pɛsi li wila la; fanrisimi li vaand la ka widigi li wala la. Kɛl ka bʋnkɔnbid la zɔɔ yii li gbinnin, ka niimis la mɛ iank ka bas wila la. 15 Amaa kɛl ka li til la nɛ nya'a la kpɛlim teŋgbauŋʋn la mɔɔd sʋʋgin, ka nɔki kʋnt nɛ kʋntzɛn'ugʋ viligi li. Kɛl ka o gɛndig nɛ bʋnkɔnbidi bɛ mɔɔgin ka mɛligim kanɛ yit agɔl na la lit o zugini madigid o. 16 Kɛl ka o ninsaal ya'am la tiaki lieb bʋnkɔnbʋg ya'am ka li ti paae yʋma ayɔpɔi saŋa. 17 Banɛ ka ba tʋm nɛ labaya la da kɛ ka li nie paalʋ, maliaknam la da kɛ ka gban'ar la nie nyain, ka li kɛ ka banɛ vʋe la baŋ ye Wina'am Onɛ Gaad Si'el Wʋsa la sʋ'oe ninsaal sʋ'ʋlim ka na tun'e nɔki li tis on gaŋ sɔ' wʋsa, la'am nɛ banɛ ka nidib gɔs ka nɛ'ɛs la.’
18 Tɔ: nɛ'ɛŋa an zaansʋŋ kanɛ ka man Na'ab Nebukadnɛza zaansim. Alazug, Belteseaza, yɛlimim zaansʋŋ la gbin, bɔzugɔ ya'am sɔb kae man teŋgbauŋ nwa nii na nyaŋi yɛlim zaansʋŋ kaŋa gbinnɛ. Amaa fʋn na nyaŋ, bɔzugɔ wina banɛ an kasi la siig bɛɛ fʋ ni.”
Daniel yɛl zaansʋŋ la gbin
19 Daniel (onɛ yʋ'ʋri mɛ lɛm buon ye Belteseaza la) da anɛ ki' ka pʋ pian'aa, ka li pak o hali. Ka man Na'ab la yɛl o ye, “Belteseaza, da kɛ ka zaansʋŋ la bɛɛ li gbin daami fɔ.”
Ka Belteseaza lɛbis ye, “M zugdaana, zaansʋŋ la ya'a aannɛ fʋ dataas la yɛla, ka li gbin pa'an banɛ kisif la yɛla li naan sɔn'ɔn! 20 Tiig kanɛ ka fʋ nyɛ ka li nɔbigi lieb titita'ar ka li wa'alim tʋn saŋgbauŋ, ka dunia wʋsa nyɛti li, 21 ka li vaand vɛnl ka li wala zu'oe ka sɔ' wʋsa dit, ka bʋnkɔnbid wʋsa digi li ma'asimin, ka zin'is bɛ ka niis na nyaŋi tɛɛ ba tɛɛdi li wila ni. 22 Naa, Na'aba, fʋnɛ an tiig la! Fʋ lieb nintita'ar ka mɔr kpi'euŋ; fʋ kpi'euŋ la nɔbignɛ hali keŋ tʋn saŋgbauŋ, ka fʋ sʋ'ʋlim la yadigi paae dunia wʋsa.
23 Naa, Na'aba, fʋ nyɛ sɔ' ka ba tʋm o, ka o an kasi naan arezana ni sigid na ka yɛt ye, ‘Nwaamɛ tiig la san'ami li, amaa basimi gbi'ir linɛ vilig nɛ kʋnt nɛ kʋntzɛn'ug la ka li bɛ mɔɔg la teŋsʋk, ka li nya'a la bɛ teŋin. Kɛl ka mɛligim linɛ yit agɔl la lii o zug; kɛl ka o lieb wʋʋ sian'arin bʋnkɔnbʋgʋ ti paae yʋma ayɔpɔi bɛn.’
24 Na'aba, zaansʋŋ la gbinnɛ nwa, ka Onɛ Gaad Si'el Wʋsa la gban'e si'em nwa zaŋi kennɛ fʋ yɛla, m zugdaan onɛ an Na'aba. 25 Ba na kadi fʋ yis nidib teŋsʋk ka fʋ keŋ bɛ nɛ bʋnkɔnbid; fʋ na ɔnbid yaama wʋʋ niigi ka mɛligim kanɛ yit agɔl la na madigif. Yʋma ayɔpɔi nya'aŋ ka fʋ na baŋ ye Wina'am Onɛ Gaad Si'el Wʋsa la mɔr kpi'euŋ ka sʋ'oe ninsaal sʋ'ʋlim, ka na tun'e nɔki lii tis on bɔɔd sɔ' wʋsa. 26 On tis nɔsi'a ye ba basim tigbi'ir la gbin pa'annɛ ye fʋ na lɛn sʋ'oe sʋ'ʋlim la ya'as, fʋ ya'a ti baŋ ye Arezana Wina'am sʋ'oe si'el wʋsa. 27 Alazugɔ, naa, Na'aba, niŋim suguru ka siaki m sa'alʋg la: pin'ilim tʋm linɛ nar ka bas tʋʋmbɛ'ɛd nɛ fʋ bugusim la, ka tʋm sʋ'ʋm tis banɛ bɛ mugusʋgin. Ka daasi'erɛɛ linɛ na sʋŋ ka fʋn bɛ ka si'el wʋsa an sʋ'ʋŋa si'em la na keŋ tuon.”
Zaansʋŋ la niŋ amɛŋa la yɛla
28 Nɛ' wʋsa sid da paae Na'ab Nebukadnɛza. 29 Nwadis pii nɛ ayi' nya'aŋ, Na'ab la da bɛɛ o na'am yir linɛ bɛ Babilon la ka dʋʋ bɛɛ o girimbisa zugʋ gɔɔndi giligid, 30 ka yɛl ye, “Babilon teŋ tita'ar kaŋa, ka' manɛ mɛ' ka li an m na'am zin'ig nɛ m paŋ nɛ m kpi'euŋ ye li tisim yʋ'ʋr girimaa?”
31 O nɔɔr da nam pʋ li teŋa, ka kʋkɔr naan agɔlli pian' ye, “Gban'e kanɛ gban'e fʋ yɛla nwa, Na'ab Nebukadnɛza: fʋ na'am kpi'euŋ la yii fʋ san'an. 32 Fʋ na yi nidib teŋsʋk ka keŋ bɛ mɔɔgin nɛ bʋnkɔnbid; fʋ na ɔnbid mɔɔd wʋʋ sian'arin niigi nɛ. Yʋma ayɔpɔi ya'a ti gaad ka fʋ yʋ'ʋn na baŋ ye Onɛ Gaad Si'el Wʋsa la mɔr kpi'euŋʋ sʋ'oe ninsaal sʋ'ʋlim ka nɔkidi tisid on bɔɔd sɔ' wʋsa.”
33 Li pʋ yuugɛ ka ban daa yɛl ye si'el na maal Na'ab Nebukadnɛza la sid maal o. Ba da kad o yis nidib sʋʋgin ka o ɔnbid mɔɔd wʋʋ naaf nɛ. Mɛligim da yit agɔlli lit o niŋgbina zug, hali ka o niŋgbiŋ kɔnbilʋg ti yii nwɛnɛ bʋnyua kɔnbid nɛ ka o nu'u-ɛɛns nɛ o nɔb-ɛɛns yii nwɛnɛ viiug nɔb-ɛɛns nɛ.
34 “Saŋa la bɛnnɛ ti paae la, ka mam Nebukadnɛza ʋki m nindaa gɔs arezana ka m ya'am lɛb na. Ka m zun'e Onɛ Gaad Si'el Wʋsa la, m da na'as o ka dʋ'ʋs o yʋ'ʋr, on onɛ vʋe saŋa linɛ ka' bɛn la.
O kpi'euŋ la bɛ nɛ yʋma linɛ ka' bɛnnɛ;
o sʋ'ʋlim la bɛnɛ nɛ nimbanɛ bɛ zʋmaana wʋsa.
35 Nidib banɛ bɛ dunia wʋsa
o gɔsid ka ba anɛ zaalim.
O tʋmnɛ on bɔɔd si'el
nɛ paŋ kanɛ bɛ arezana ni la
nɛ nimbanɛ bɛ dunia la.
Sɔ' kae na nyaŋi gu'oe o nu'ug ye o da tʋm
bɛɛ bu'os o ye, ‘Bɔ ka fʋ maan nɛ'?’
36 Saŋa kanɛ ka m ya'am daa lɛb na la, m girima nɛ m kpi'euŋ la da lɛbi m san'an na. Banɛ sa'annim nɛ m ninsʋma la da iee m zin'ig, ka m lɛbi m na'am gbauŋ la zug, hali ka paam kpi'euŋʋ gaad man da mɔr si'em yiiga la.
37 “Nannanna, man Nebukadnɛza wɔ'ɔg ka zun'e ka na'as Na'ab kanɛ bɛ arezana la, bɔzugɔ linɛ ka o maan wʋsa anɛ sʋ'ʋŋa, ka o suoya wʋsa dɔl sida suor. Ka banɛ ken nɛ nyɛɛsim la o nyaŋidi kɛt ka ba siedi ba mɛŋ.”