Sanlima ba'ar nɛ bugum la yɛla
3
1 Na'ab Nebukadnɛza da nɔk sanlima kud si'el ka li nwɛnɛ ninsaal nɛ zi'el ka li dʋʋ agɔla hali ka li yalʋŋ pʋ pɔɔda, ka o nɔki li zi'el Dura teŋ paalʋ linɛ bɛ Babilon sʋ'ʋlimin la. 2 O da la'as o gɔmenanam la nɛ ya'am dim nɛ sa'alsa'annib nɛ tuongatib nɛ banɛ su'ad ligidi nɛ banɛ kat saria nɛ lɔyanam nɛ kpɛɛmnam banɛ bɛɛ o sʋ'ʋlimin la wʋsa ye ba la'as na ka ba zuŋ bʋn linɛ ka o ya'abi zi'el la. 3 Alazug banɛ ka o da buol la wʋsa da la'as na ye ba zuŋ bʋn linɛ ka Na'ab Nebukadnɛza ya'abi zi'el la. Ba da la'asi zi'enɛ li tuon.4 Ba da mɔɔl nɛ kʋkɔtita'ar ye, “Nidib nɛ sʋ'ʋlim nɛ buudi wʋsa, 5 ya ya'a wʋm ka na'atana, nɛ wiis, nɛ bʋnnwɛ'ɛda la wʋsa dam, li anɛ tilas ye sɔ' wʋsa igin linɛ ka Na'ab Nebukadnɛza nɔk sanlimaa ya'abi zi'el la tuon ka wɔ'ɔgi li. 6 Onɛ wʋsa kʋ igini li tuon ka wɔ'ɔgi li, ba na ʋk o tɔ'ɔtɔ lɔs bugum tita'ar pʋʋgin.”
7 Alazug ban da wʋm ka bʋnnwɛ'ɛda la nɛ li buudi wʋsa nwɛ'ɛd la, nidib la nɛ sʋ'ʋlim la dim wʋsa nɛ buudi wʋsa da igin bʋn linɛ ka Na'ab Nebukadnɛza nɔk sanlime ya'abi zi'el la tuonnɛ wɔ'ɔgi li.
8 Li da anɛ saŋa kaŋa ka Babilon nidib la sieba paam suori yi paalʋ naa gbi' Jew dim la. 9 Ba da yɛl Na'ab Nebukadnɛza ye, “Naa, Na'aba! 10 Fʋ tis nɔɔr ye onɛ wʋsaa wʋm ka bʋnnwɛ'ɛda la nwɛ' on iginim fʋn nɔk sanlima kud si'eli zi'el la tuon, 11 ka onɛ wʋsa kʋ igini wɔ'ɔgi lii, li anɛ ba lɔb o bas bugum tita'ar la pʋʋgin. 12 Naa na'aba, Jew dim sieba banɛ ka fʋ tisi ba kpi'euŋ ka ba gɔsid yɛlsieba Babilon teŋ kaŋa ni la pʋ gi'igidi fɔ. Ba pʋ dɔlli fʋ bada la, ka mɛ pʋ siak ye ba igin linɛ ka fʋ nɔk sanlima ya'abi zi'el la tuonnɛ. Banɛ an; Siadirak nɛ Mesiak nɛ Abɛdnɛgo.” 13 Ka Na'ab la sʋnf duo nɛ ba hali, ka o tʋm buol dasam atan' la ka bu'osi ba ye, 14 “Siadirak nɛ Mesiak nɛ Abɛdnɛgo li anɛ sida ye ya pʋ siak ye ya wɔ'ɔg man ba'ar la ka mɛ pʋ siak ye ya igini na'as bʋn linɛ ka m zaŋ sanlima ya'abi zi'el laa? 15 Nannanna m ye m tisi ya nɛ suor ya'as ka ya igini wɔ'ɔg bʋn la yʋ'ʋs. Ya ya'a wʋm ka bʋnnwɛ'ɛda la nwɛ' ka ya igini wɔ'ɔgi li, yɛla naae ya. Amaa ya ya'a wʋm ka pʋ iginɛ, m na gban'e ya lɔs bugumin. Ba'asi'a kae na nyaŋi faaɛn ya yii m nu'uginɛ.” 16 Ka dasam atan' la lɛbisi yɛl ye, “Naa, li ka' ye ti bɔɔdi ye ti pian' tisi ti mɛŋ bʋʋd yɛl kaŋa nii. 17 Wina'am kanɛ ka ti dɔl la na nyaŋi faaɛn ti yii fʋ nu'ugin nɛ bugum la pʋʋgin. 18 Amaa hali baa o ya'a kʋ faaɛn ti, baŋim, Na'aba, ye tinam kʋ wɔ'ɔgi fʋ bada la bɛɛ igin bʋn linɛ ka fʋ nɔk sanlimaa maali zi'el la tuonnɛ.”
19 Nebukadnɛza sʋnf daa duoe nɛ hali ka o nindaa tiak nidiba atan' nwa yɛla. Ka o tis nɔɔr ye ba maalim bugum la ka li zu'oe gaad lin aan si'em la zin'is ayɔpɔi, 20 ka tis o soogia banɛ kpi'em la nɔɔr ye ba lɔ Siadirak nɛ Mesiak nɛ Abɛdnɛgo lɔs bugumin la. 21 Alazug ba da gban'e dap bama lɔɔ lɔs bugumin la nɛ ba fuud wʋsa. 22 Na'ab la da tis nɔsi'a la da anɛ tʋʋlig-tʋʋlig, ka bugum la mɛ tʋl hali ka zɛɛlim soogia banɛ gban'e Siadirak nɛ Mesiak nɛ Abɛdnɛgo lɔs bugumin la ka ba kpi. 23 Dap atan' nwa da li bugumin la wʋʋ ban lɔɔ ba si'em la.
24 Saŋkan la li da pak Na'ab Nebukadnɛza ka o vaae duoe zi'en ka bu'os banɛ san'an o la ye, “Ka' nidiba atan' ka ti lɔɔ lɔs bugumin laa?” Ka ba lɛbis ye, “Ɛɛn, Na'aba, ala yim.” 25 Ka o lɛbis ye, “Ka gɔsimiya! Man nyɛti nidib anaasi ka ba bɛ bugumin la ken, ka si'el pʋ lɔɔ ba bɛɛ maali ba niŋgbinaa; ka onɛ paas anaasi la nwɛnɛ maliak nɛ.” 26 Nebukadnɛza da ɛnrigi li'el bugum la ka tans nɛ kʋkɔtita'ar ye, “Siadirak nɛ Mesiak nɛ Abɛdnɛgo, Wina'am Onɛ Gaad Si'el Wʋsa la sankpan'asnama, yim kɛɛn kpɛla na!” Ka Siadirak nɛ Mesiak nɛ Abɛdnɛgo da naan bugumin la yina, 27 ka kpi'emnam banɛ da la'as la wʋsa kena giligi ba. Ba da nyɛya ka bugum la pʋ vʋnligi ba niŋgbiŋ, bɛɛ ba zuobid nyuusid kaanlʋgɔ; bugum la daa pʋ si'isi ba fuudɛ, ka bugum nyuug mɛ kae ba niŋgbiŋinɛ.
28 Ka Nebukadnɛza yɛl ye, “Wina'am onɛ an Siadirak nɛ Mesiak nɛ Abɛdnɛgo Wina'am la yʋ'ʋr paamim zun'or! O tʋm o maliak ka o kena faaɛn o yammis! Ba da niŋ o yadda ka zan'as man Na'ab la nɔɔr ka siak ye ba ya'a kpi sɔn'oe ban na pʋ'ʋs bɛɛ wɔ'ɔg man ba'ar bɛɛ teŋgban si'a ka ya'a ka' ba Wina'am la ma'aanɛ. 29 Alazug m tisidnɛ nɔɔr ye nidib wʋsa nɛ sʋ'ʋlim wʋsa nɛ buudi wʋsa banɛ pian' zɛrig Siadirak nɛ Mesiak nɛ Abɛdnɛgo Wina'am la, ba na ki'e o sɔba zɔrisi zɔris ka o yir la lieb dabɔɔg, bɔzugɔ ba'asi'a kae na nyaŋi faaɛn sɔ' anwana.”
30 Na'ab la da tis Siadirak nɛ Mesiak nɛ Abɛdnɛgo kpɛuŋ Babilon sʋ'ʋlim la ni.