Sariakadib nɛ ti'ir yɛla
66
1 Zugsɔb la yɛl si'eli nwa:“Arezana anɛ m na'am gbauŋ,
ka dunia la aan m nɔba zi'esim zin'ig.
Yir bɔ buudi ka ya na mɛɛ tis mam?
Ka m vʋ'ʋsʋm zin'ig na bɛ yaanɛ?
2 Li ka'anɛ man nu'ugʋ maal bama wʋsa,
ka ba bɛ laa?”
Zugsɔb la yɛl ala.
“Banɛ ka m sʋnf malisi ba yɛla nwa:
onɛ sied o mɛŋ ka siak tiakir,
ka zɔtim ka di'edi m pian'ad.
3 Amaa onɛ wʋsa nɔk na'araugʋ kʋʋ maal maan
nwɛnɛ onɛ kʋ nid nɛ,
ka onɛ wʋsa kʋ pɛbil,
nwɛnɛ onɛ kɔ'ɔg baa niŋgɔɔnr nɛ.
Onɛ wʋsa nɔk zʋʋdi maal maan
nwɛnɛ onɛ nɔk kukur ziim maal maan nɛ,
onɛ wʋsa nyu'oe tiɛnr bʋnnyubisa
nwɛnɛ onɛ maan ba'ar nɛ.
Ba gaŋi ba mɛŋ suoya,
ka ba sʋnya malis nɛ yɛlkisa banɛ ka ba maan la.
4 Ala ka m mɛ na gaŋ tɔɔgʋ tisi ba
ka mɔr ban zɔt si'el la kɛɛn ba zugin na.
Bɔzugɔ man buol la, sɔ' pʋ siakɛ,
man pian' la, sɔ' pʋ kɛlisɛ.
Ba tʋm bɛ'ɛdi m san'an
ka gaŋ linɛ pʋ malisi ma.”
5 Wʋmmi Zugsɔb la pian'ad,
yanam banɛ nɔŋ o labaar la;
“Ya ba'abiis banɛ kisi ya
ka yisi ya kallin man yʋ'ʋr zug la, yɛl ye,
‘Kɛl ka ya Zugsɔb la nyɛ na'asi,
ka ti gɔsi ya sumalisim la!’
La'am nɛ wala ba na di nyan.
6 Wʋm tʋkpiidʋg kanɛ bɛ tempʋʋgin la,
Wʋm tʋkpiidʋg kanɛ bɛ Wina'am Pʋ'ʋsim Yin la!
Li anɛ Zugsɔb la vuudi
yɔɔd o bi'emnam linɛ wʋsa nar nɛ ba.
7 M tempʋkanɛ an kasi la nwɛnɛ pu'apʋʋg nɛ,
on ti ye o sa'ae saŋsi'a la
ka o pʋn du'a;
on ti ye o baŋ zabir saŋsi'a la,
ka o pʋn du'a biribiŋ.
8 Anɔ'ɔn nan mi' wʋm yɛlbama?
Anɔ'ɔn nan mi' nyɛ nɛ'?
Teŋ nan nyaŋi kpɛm pin'ili bɛ daar yinnee,
bɛɛ buudi kpɛn gbirigi bɛɛ?
La'am nɛ wala Zion sa'ae nɛ
ka li pʋ yuugɛ ka o du'a biis.
9 M na kɛ ka ya sa'ae
ka lɛɛ kʋ kɛ ka ya du'aa?” Zugsɔb la yɛl ala.
Ya Wina'am la yɛl ye, “Man na kɛ ka fʋ sa'ae
ka m lɛn giŋi fʋ du'am?
10 Maalim sumalisim nɛ Jerusalem, ka mɔr sumpielim
yanam banɛ wʋsa nɔŋ o la,
maalimi sumalisim bɛdegʋ nɛ o,
yanam banɛ wʋsa kum o yɛla la.
11 Ya na mu'a o bin'isim la tig
ka ya sʋnya ma'ae.
Ya na nuu li sʋ'ʋŋa
ka ya ya'amlɛog bɛ teŋ la kpan'am zu'oe si'em la ni.”
12 Zugsɔb la yɛl ye,
“M na tis o sumbʋgʋsʋm
ka li pʋbidi gɛɛn o nwɛnɛ kɔldaug nɛ,
ka tɛɛns bɛdegʋ kpan'am na pʋbidi ken o san'an.
O na yuoli ya o nu'usin nwɛnɛ biig nɛ
ka ya wa'ad o duma zug.
13 Nwɛnɛ biig ma suosid o si'em la,
ala ka m mɛ na bɛlisi ya;
ka ya na mɔr sumalisim Jerusalem yɛla.”
14 Ya ya'a nyɛ nɛ'ɛŋa, ya sʋnya na malis
ka ya na nɔbigi ma'ae siaa wʋʋ mɔɔd nɛ;
Zugsɔb la paŋ na nie tis o tʋmtʋmnib,
amaa o dataas na nyɛɛ o sʋnpɛɛn.
15 Gɔsima, Zugsɔb la kenna nɛ bugum,
ka o zaba tɛrekonam la nwɛnɛ sisi'epiliŋ;
o na sig na nɛ o sʋnpɛɛn wʋʋ bugum nɛ,
ka o tansʋg nwɛnɛ bugum pielim.
16 Bugum nɛ zaba sʋ'ʋg
ka Zugsɔb la na zaŋi kad nidib wʋsa saria,
ka na kʋ nidib bɛdegʋ.
17 “Nimbama nwa maali ba mɛŋ nyain ye ba keŋi maali ba bada linɛ bɛɛ ba lɔmbɔn'ɔdin la. Ba dɔlli taaba kpɛn'ɛdi ba lɔmbɔn'ɔdin la ɔnbid kukur nɛ dayuus ni'im nɛ ba kisbʋn wʋsa. Amaa m na san'ami ba wʋsa saŋa yinne,” Zugsɔb la yɛl ala.
18 “Ka ban tʋm si'el nɛ ban tɛn'ɛsidi makid si'em la zug, ka m bɔɔd ye m kena la'as nidib buudi nɛ pian'ad buudi wʋsa, ka ba na kena nyɛɛm na'am paŋ.
19 “M na maal zanbina ba sʋʋgin, ka tʋm banɛ nan vʋe la Tarsis nɛ Libiya nɛ Tubal nɛ Lud dim banɛ mi' tɔɔnb hali la, nɛ Put nɛ Girik dim tɛɛns la, nɛ tɛɛns banɛ lal ka ku'om gilig ka ba nam pʋ wʋmi m yɛla bɛɛ m na'am paŋ la. Ba na mɔɔli m na'am paŋ la yɛla tɛɛnsin la. 20 Ka ba na mɔri ya ba'abiis banɛ bɛ tɛɛns bɛdegʋ sʋʋgin la lɛb zuokanɛ an kasi bɛ Jerusalem la ni na, ka li na an wʋʋ maannɛ tis Zugsɔb la nɛ. Ba na ban'ad widi nɛ zaba tɛrekonam nɛ bʋmis nɛ yʋgʋma.” Zugsɔb la yɛl ala. “Ba na mɔri ba na wʋʋ Israel dimi mɔr zʋʋd maana nɛ maana la'abanɛ an nyain ken Zugsɔb Pʋ'ʋsim Yin na si'em la. 21 M na gaŋi ba sieba ka ba an Levi dim nɛ maanmaannib.” Zugsɔb la yɛl ala.
22 Zugsɔb la yɛl ye, “Nwɛnɛ arezana paal nɛ dunia paal linɛ ka m maal la na bɛɛ m san'anɛ yuug si'em la, ala ka ya yʋ'ʋr nɛ ya yaas mɛ na bɛɛ yuug. 23 Nwadpaalig malʋŋ daar nɛ Vʋ'ʋsʋm Daar wʋsa, ninsaalib wʋsa na kɛɛn m san'an na igini m tuon.” Zugsɔb la yɛl ala. 24 “Ba na yi yiŋi gɔs banɛ daa zan'asi m nɔɔr la kpii dig si'em; zunzunbanɛ diti ba la kʋ kpii, bɛɛ bugum kanɛ diti ba la kpiisɛ, ka nidib kʋ bɔɔd ye ba li'el anii.”