Sariakadib nɛ faangir
65
1 “M nie m mɛŋi pa'al banɛ pʋ bu'osidi m yɛla la;ka banɛ pʋ ieedim la nyɛɛm.
Teŋ kanɛ pʋ buolim la,
m yɛli ba ye, ‘Manɛ nwa, manɛ nwa!’
2 Daar wʋsa, m tiɛn m nu'us
ye m di'e nimbanɛ tʋba zian'as
ka ba dɔlli ba mɛŋ bɔɔdim
nɛ ba mɛŋ pʋtɛn'ɛr la.
3 Nidib nwa kennɛ m san'an na saŋa wʋsa
duodi m sʋʋnr.
Ba maan maana lɔmbɔn'ɔdin,
ka nyu'od bʋnnyubisa tisid teŋgbana
bimbim banɛ ka ba nwɛ' tampiga mɛ' la zug.
4 Ba zin'inɛ yaadin yʋ'ʋŋ-yʋ'ʋŋ n
gu'usidi bɔɔd sʋŋir kpi'imnam san'an.
Ba ɔnbid kukur ni'im,
ka ba dʋgid pɛ'ɛl nɛ biim linɛ ka' nyainnɛ.
5 Ba yɛti ba taaba ye, ‘Tɔɔmi; da li'eli ma,
ka man anɛ kasi ka fʋ kʋ nyaŋi li'eli ma!’
Nimban la nwɛnɛ nyɔ'ɔsi na kpandi m nindaa,
ka nwɛnɛ bugum na dit dabismum ka pʋ kpiisɛ.
6 Gɔsima, li sɔbi zi'e m tuon.
M kʋ sinna, m na lɛbisi yɔ ka li paae li bɛn;
M na yɔɔ ba din nar si'em,
7 ban nɛ ba saamnam tʋʋmbɛ'ɛd la.”
Zugsɔb la yɛl ala.
“Ban nyu'od maana zuoya ni
ka diisi m nyan kʋkʋna zug la,
ka m na namisi ba wʋʋ lin nar si'em.”
8 Zugsɔb la yɛl si'eli nwa:
“Nwɛnɛ tiis wala na bi'igi tʋʋg
ka ba ye ba na nɔki li bas
ka nidib yɛt ye, ‘Da san'ami li
ka li nan an sʋm si'em la,’
ala ka m mɛ na niŋi m tʋmtʋmnib la;
m kʋ san'ami ba wʋsaa.
9 M na mɔr Jakob yaas na,
nɛ Juda dim banɛ na kena sʋ'oe m zuoya la;
m nimbanɛ ka m gaŋ la na dii li faar,
ani ka m tʋmtʋmnib la na bɛ.
10 M nimbanɛ ieedim la,
Saron na kilim yaama zin'igi tisi ba kɔnbid
ka Akor bɔn'ɔg la an zin'ikanɛ ka ba niigi vʋ'ʋsid.
11 Amaa yanam banɛ bas Zugsɔb la
ka tami m zuokanɛ an kasi la
ka ieed zusʋŋ tiim Gad onɛ an ba'ar san'an
ka pɛ'ɛl nwama nɛ daam kaanbid Meni la,
12 m na kɛ ka ba kʋʋ ya nɛ sʋ'ʋraug,
ka ya wʋsa na igini tis onɛ kʋʋdi ya la.
Bɔzugɔ, m buol ya, ka ya pʋ siakɛ,
m pian' ya amaa ya pʋ kɛlisɛ.
Ya tʋm tʋʋmbɛ'ɛdi m san'an
ka maan linɛ pʋ malisi ma.”
13 Dinzugɔ, Zugsɔb onɛ an Paŋtita'ar Sɔb la yɛl si'eli nwa:
“M tʋmtʋmnib la na di,
amaa yanam na ken nɛ kɔ'ɔm;
m tʋmtʋmnib la na nu,
amaa yanam na ken nɛ ku'onuud;
m tʋmtʋmnib la na maan sumalisim,
amaa ba na diis yanam nyan.
14 Man tʋmtʋmnib la na yʋ'ʋm
ka li anɛ sumalisim linɛ bɛ ba sʋnya ni la zug,
amaa yanam na kaasid
ka li anɛ ya sʋnsa'aŋ zug,
ya na kaas buki nɛ tɔɔg.
15 Ya yʋ'ʋr na anɛ nɔpɔɔri
tis banɛ ka m gaŋ la.
Zugsɔb onɛ an Paŋtita'ar Sɔb la na kʋʋ ya,
amaa o na tis o tʋmtʋmnib la yʋ'ʋpaala.
16 Onɛ wʋsa bɛ teŋ la zug ka sɔs bareka,
o na niŋ ala nɛ Wina'am Kanɛ an Sida Sɔb la yʋ'ʋr zug.
Onɛ wʋsa yɛl nɔɔri zi'el teŋ la zug
na pɔ nɛ Wina'am Kanɛ an Sida Sɔb la yʋ'ʋr zug.
Yɛlmugusa banɛ gaad la m na tami ba yɛla
ka kʋ lɛn tiɛn ba, baa bi'elaa.”
Arezana paal nɛ dunia paal
17 “Gɔsima, m na maal
arezana paal nɛ dunia paal.
Ba na tam yɛlkʋda la yɛla,
sɔ' kʋ lɛn tɛn'ɛsi ba yɛllɛ.
18 Amaa mɔri sumpielim ka maal sumalisim saŋa wʋsa
man ye m maal si'el la zug.
M na maal Jerusalem ka li mɔr ya'amlɛog
ka nimbanɛ bɛ ani la mɔr sumalisim.
19 M na mɔr sumalisim nɛ Jerusalem yɛla
ka mɔr ya'amlɛog nɛ m nidib la;
sɔ' kʋ lɛn wʋm kaasig nɛ kukuma ani ya'asɛ.
20 Bilies kʋdim kʋ lɛn kpi teŋin la
bɛɛ dau bɛ ka kʋ kʋdigi paae o bɛnnɛ;
onɛ kpi wʋʋ yʋma kɔbiga
ba na yɛl ye o kpinɛ kansir bɛɛ o anɛ na'akin;
onɛ pʋ paae yʋʋm kɔbiga ka kpi,
ba na yɛl ye nɔpɔɔri ya'a bɛɛ o zugin.
21 Ba na mɛɛ ba ya' ka kpɛn';
ba na sɛ tiwanna ba pɔɔdin ka dii li wala.
22 Ba kʋ lɛm mɛ' ya' ka sieba faaɛn kpɛn',
bɛɛ ba sɛ tiis ka sieba faaɛn li dii.
Bɔzugɔ, tiig dabisa zu'oe si'em la,
ala ka m nidib la dabisa mɛ na zu'oe;
m nidib la na dii ba nu'us tʋʋma nyɔɔd.
23 Ba kʋ namis zaalim
bɛɛ ba du'a biis ye ba nyɛ zutɔɔgʋ;
bɔzugɔ, ba na anɛ nimbanɛ ka Zugsɔb la niŋi ba zug bareka,
ban nɛ ba yaas wʋsa.
24 Ba ya'a ti ye ba buol la, ka m pʋn siak;
ba ya'a nam bɛɛ ani pian'ad la ka m pʋn wʋm.
25 Zaŋku'ar nɛ pɛbil na la'asi dit,
ka gbigim na ɔnbid mɔɔd wʋʋ naaf nɛ,
amaa tintanni nɛ na an waaf diib.
Ba kʋ pu'alim bɛɛ san'am taaba
m zuokanɛ aan m mɛŋ din kasi la nii.”
Zugsɔb la pian' li.