Ya'am tʋʋma
11
1 Nɔkimi fʋ diibi lɔs ku'ominka dabisa bɛdegʋ nya'aŋ fʋ na lɛn di'e li.
2 Pʋdigim tis nidib ayɔpɔi bɛɛ anii,
bɔzugɔ fʋ zi' yɛlbɛ'ɛd kanɛ na ti lu teŋ la zugɔ.
3 Saŋgbana ya'a pɛ'ɛl nɛ ku'om, li niidnɛ saa basid teŋ zug.
Tiig ya'a lu dagɔbʋg bɛɛ datiuŋ, ani ka li digi.
4 Onɛ mɛkama kpansid sisi'em kʋ bʋdɛ.
Onɛ gɔsid saŋgbana mɛ kʋ bunɛ.
5 Fʋn zi' sisi'em suori an si'em la,
bɛɛ biigi kilimid o ma pʋʋgin si'em la,
ala mɛn ka fʋ kʋ baŋ Wina'am onɛ
maal si'el wʋsa la tʋʋmaa.
6 Bʋdimi fʋ bʋmbʋʋda bɛogʋn,
ka mɛ da bas zaam bʋdiga,
ka fʋ zi' tʋʋm kanɛ na maal sʋ'ʋŋa
li tun'e an bɛogʋn bɛɛ zaam din la, bɛɛ ayi' la wʋsa.
Tɛnr onɛ maalif la fʋ dasannimin
7 Nɛɛsim malis,
li an sʋm nɛ fʋn na vʋe ka fʋ nini na nyɛt winnig.
8 Baa nid ya'a vʋe yʋma bɛdegʋ, on kɛl ka li malis o.
Amaa o tiɛnm dabisbanɛ na ti an lik la bɔzugɔ dabisban la na ti zu'oe.
Bʋn kanɛ kenna wʋsa ka' gbinnɛ.
9 Dasaŋa, mɔr sumalisim fʋn nam mɔr paŋ la,
ka kɛ ka fʋ sʋnf malis fʋ dasannim saŋa.
Dɔlli fʋ sʋnf bɔɔdim nɛ fʋ nini nyɛ si'el ka bɔɔd.
Amaa tɛnr ye dabisir kenna ka Wina'am na kadi fʋ saria.
10 Alazugɔ basimi fʋ sʋntɔɔg nɛ fʋ pʋtɛn'ɛyaalis la,
ka da kɛ ka fʋ niŋgbiŋ yɛla daami fɔ,
ka dasannim nɛ li paŋ wʋsa ka' gbinnɛ.