10
1 Nwɛnɛ pʋmpɔɔsi na kpi tudaari pʋʋgin ka li nyuug san'am si'em la,ala mɛn ka zɔlim ɛɛn paas ya'amin ka girima lɛn kae.
2 Ya'am sɔb sʋnf gban'adi bʋnsʋŋ.
Amaa zɔlʋg sʋnf gban'adi bɛ'ɛd.
3 Hali zɔlʋg ya'a dɔl pal zug, o ya'am kae,
ka on niŋid si'em la kɛtnɛ ka ba baŋ o gɛtim la yɛla.
4 Na'ab sʋnf ya'a duoe nɛ na'ayikpɛɛm, on da bas o kpɛuŋɔ.
An baanlimm ka o sʋnpɛɛn la na ba'asi li ka o tami fʋ bɛ'ɛd la.
5 Mam lɛn nyɛ bʋnsi'a dunia nwa ka li pʋ nara, ka linɛ an na'anamɛ yidigid yidig sieba la.
6 Ba nɔk zɔn ka ba gaad tuon,
ka mɛ lɛbis ya'am dim nya'aŋ.
7 Man nyɛ yammis ka ba ban'ad widi
ka tuongatib ken nɔbteŋ.
8 Onɛ mɛkama tu bʋmbɔk zulʋŋ na luu li pʋʋgin.
Onɛ nwa'ae guomi kpɛn' na, waaf na dum o.
9 Onɛ nwa'ae kuga na nyɛ kuga sapu'ad.
Onɛ wia'arid daad na nyɛ li dɛŋ.
10 Zɛnnir ya'a pʋ ditta ka fʋ pʋ saasɛ
asɛɛ ka fʋ wiak nɛ paŋ,
amaa mi'ilim na kɛ ka fʋ wiaki li na'ana.
11 Waaf ya'a dumif ka tiimdaan kae yamminɛ
o tiim la nyɔɔd kae.
12 Ya'am sɔb pian'adi kɛt ka nidib na'asid o,
amaa zɔlʋg nɔɔri dit o.
13 Pin'ilʋgʋn la o pian'ad anɛ zɔlim pian'ad,
ka naarin la ka li an bugisim nɛ gɛɛŋ pian'ad.
14 Ka zɔlʋg kpɛm pian'adi ken tuon, amaa sɔ' zi' dinɛ kennaa.
Anɔ'ɔnɛ mi' on na gaad ka dinɛ na lɛdigi tʋm?
15 Zɔlʋg tʋʋma gɛɛnsid o nɛ,
ka la'am nɛ wala o zi' suokanɛ wa'ae tempʋʋginɛ.
16 Yɛltɔɔg bɛɛ tis teŋ kanɛ na'abi an sankpan'as,
ka ba tuongatib nuud ka maan sumalisim bɛogʋn.
17 Yɛlsʋm bɛɛ tis teŋ kanɛ na'ab ka ba du'a o nɛ na'am.
Ka li tuongatib dit saŋa dinɛ nar ye ba nyɛ paŋ
ka ka' ye ba nuu bugɛ.
18 Nid ya'a an gbanya'a o yu'ada pun'odnɛ tɔ'ɔtɔ;
o nu'us ya'a pʋ bɔɔd tʋʋmaa, o yir nyunnɛ.
19 Di'ema ziid sumalisim na. Ka daam ma'ae sʋnf.
Amaa ligidi wɛligid yɛla wʋsa.
20 Da tɛn'ɛs na'ab yɛla bɛ'ɛdi fʋ sʋnfʋnɛ
bɛɛ zɛrig arezak sɔbi fʋ dɔɔginɛ,
ka niiŋ tun'e mɔri fʋ pian'ad la yi,
bʋn-ian'adir kanɛ bɛ ani na mɔɔli fʋ yɛla tis.